Hihi nĩ Kũrĩ Hĩndĩ Warĩ Painia wa Hĩndĩ Ciothe?
1. Aingĩ makenagĩra mĩeke ĩrĩkũ, no amwe makinyĩrĩirũo nĩ gwĩka atĩa?
1 Ihinda-inĩ rĩa mĩaka mĩingĩ, makiri ma ahunjia nĩ makeneire mweke wa mwanya wa “kũrutana na kũheana ũhoro ũrĩa mwega” marĩ ta ndungata cia mahinda mothe. (Atũm. 5:42, NW) O na kũrĩ o ũguo, angĩ nĩ ũndũ wa maũndũ matiganĩte nĩ makinyĩrĩirũo nĩ gũtiga ũpainia. Angĩkorũo hĩndĩ ĩmwe wee nĩ warĩ painia wa hĩndĩ ciothe-rĩ, hihi nĩ ũthuthurĩtie maũndũ maku marĩa ũrĩ namo rĩu nĩguo wone kana no ũcokerere ũpainia?
2. Arĩa manatuĩka painia a hĩndĩ ciothe magĩrĩirũo nĩ gũthuthuria maũndũ mao rĩngĩ nĩkĩ?
2 Maũndũ nĩ Magarũrũkaga: Kwahoteka rĩngĩ ũndũ ũrĩa watũmire ũtige ũpainia nĩ wathirire. Kwa mũhaano, angĩkorũo watigire nĩ ũndũ nĩ waaremagwo kũhingia mathaa 90 o mweri-rĩ, hihi no ũcokerere ũpainia rĩu mathaa maanyihanyihirio nginya 70? Hihi mabataro maku ma wĩra kana ma famĩlĩ nĩ manyihanyihĩte kuuma rĩrĩa watigire ũpainia? Mwarĩ wa Ithe witũ ũmwe watigĩte ũpainia nĩ ũndũ wa mathĩna ma mwĩrĩ nĩ ahotire gũcokerera arĩ na ũkũrũ wa mĩaka 89. Ndaakoretwo athiĩte thibitarĩ gwa kahinda ka mwaka ũmwe na kwoguo akĩigua atĩ no ahote gũcokerera ũpainia!
3. Andũ a famĩlĩ mangĩteithania atĩa nĩguo ũmwe wao atuĩke painia?
3 Hihi no akorũo wee ndwarĩ painia, no ũmwe wa famĩlĩ yanyu nĩ aatigire nĩguo ahote gũtumberia mũndũ wa famĩlĩ, rĩngĩ ta mũciari mũkũrũ. (1 Tim. 5:4, 8) Angĩkorũo nĩguo-rĩ, hihi wee kana angĩ thĩinĩ wa famĩlĩ no mũteithĩrĩrie ũcio watigire ũpainia nĩguo acokerere? Kaĩ mũtangĩarĩrĩria ũndũ ũcio mũrĩ hamwe? (Thim. 15:22) O na gũteithĩrĩria ũmwe thĩinĩ wa famĩlĩ gũtuĩka painia nĩ ũndũ wa bata mũno.
4. Nĩ atĩa ũngĩka angĩkorũo ndũngĩhota gũcokerera ũpainia kahinda-inĩ gaka?
4 Ndũgakue ngoro angĩkorũo maũndũ maku kahinda-inĩ gaka matingĩreka wambĩrĩrie ũpainia rĩngĩ. Gũkorũo ũrĩ na wendi ũcio nĩ gũkenagia Jehova. (2 Kor. 8:12) Hũthĩra maũndũ marĩa werutire rĩrĩa warĩ painia, ũtungata-inĩ waku wa ihinda rĩrĩ. Hoyaga igũrũ rĩa wendi ũcio waku, na ũikarage wĩ maitho kuona mĩeke ĩngĩtũma ũcokerere ũpainia. (1 Joh. 5:14) Hihi no akorũo thutha wa ihinda, Jehova nĩ arĩkũhingũrĩra “mũrango mũnene” wa ũtungata nĩguo ũkaahota gũkenera rĩngĩ ikeno cia ũpainia wa hĩndĩ ciothe! —1 Kor. 16:9.