Video ya Maajabu ya Uumbaji Yanafunua Utukufu wa Mungu
Andũ aingĩ nĩ makenaga makĩĩrorera ũũmbi. Ĩndĩ rĩrĩa mareka ũguo, nĩ anyinyi mamenyaga atĩ ũũmbi ũguũragia maũndũ maingĩ megiĩ ũrĩa Mũũmbi witũ Mũnene eciragia na ũrĩa aiguaga. (Rom. 1:20) Hĩndĩ ya tene, Daudi erutire ũhoro wa Jehova kũgerera Kiugo Gĩake kĩrĩa gĩtongoretio na roho. Ĩndĩ kũgerera ũũmbi, nĩ aahotire ‘kũmuona’ na kũmũkuhĩrĩria. (Thab. 8:3, 4) Video ĩrĩ na kĩongo Maajabu ya Uumbaji Yanafunua Utukufu wa Mungu nĩ ĩteithagia ciana ciitũ, na arutwo aitũ a Bibilia meyonere maũndũ mamwe ma ũũmbi wa Jehova, makona ngumo na ũmũndũ wa Mũũmbi witũ Mũnene, na nĩ ũndũ ũcio makamũkuhĩrĩria. Thutha wa kwĩrorera video ĩyo, rora kana no ũhote gũcokia ciũria ici.
(1) Ũnene na mũbangĩre wa igũrũ na thĩ iria tuonaga wongagĩrĩra atĩa wendo waku harĩ Jehova? (Isa. 40:26) (2) Rĩrĩa twerorera maĩ, tũngĩĩruta atĩa igũrũ rĩgiĩ Ũrĩa wamombire? (Kũg. 14:7) (3) Ũnene wa thĩ na gũkuhanĩrĩria kwayo na riũa kuonanagia atĩa ũũgĩ wa Jehova? (4) Wĩra wa mweri nĩ ũrĩkũ? (Thab. 89:37) (5) Jehova ombĩte andũ atĩa ũndũ mangĩkenera ũtũũro? (6) DNA nĩ kĩĩ? (Thab. 139:16) (7) Harĩ indo iria ciothe Jehova ombire thĩinĩ wa thĩ-rĩ, andũ nĩ ngũrani na njĩra ĩrĩkũ? (Kĩam. 1:26) (8) Nĩ maũndũ marĩkũ wĩriragĩria kuona thĩinĩ wa thĩ njerũ?
Mambo ya Ziada: (9) Marangi moimaga kũ? (10) Maĩ mahotaga atĩa kwambata nginya mũtĩ gacumbĩrĩ? (11) Wĩra wa maĩ nĩ ũrĩkũ mĩĩrĩ-inĩ itũ? (12) Heana ngerekano cia ũiguano ũrĩa ũkoragwo gatagatĩ ka indo iria ĩrĩ muoyo. (13) Nyamũ imenyaga atĩa kũnyitanĩra hamwe na iria ingĩ? (14) “Pembe bora” nĩ kĩĩ, na yonekanaga atĩa thĩinĩ wa ũũmbi?
‘Wĩrorere’ na Kinyi Wĩra wa Moko ma Jehova: Jesu aatwĩkĩrire ngoro, ‘tũrorage nyoni cia rĩera-inĩ, na tũtaranagie ũhoro wa itoka cia gĩthaka.’ (Mat. 6:26, 28) Gwĩka ũguo no kuongerere wĩtĩkio witũ hinya, gũtũme tũkorũo na mwĩhoko biũ harĩ Mũũmbi, na tũkorũo na ngatho nyingĩ nĩ ũndũ wa ũũgĩ wa Jehova, hinya wake wa kũhonokia na wendo wake. Handũ ha kũreka maũndũ ma gũkũ thĩ makũgirĩrĩrie, caragia mahinda na wĩkagĩre kĩyo kwĩrorera magegania ma ũũmbi wa Jehova, na wĩcũũranagie ũrĩa maũndũ macio matũrutaga igũrũ rĩgiĩ Ngai witũ.—Thab. 19:1.