Njĩra Ithano cia Kũgĩa na Mũrutwo wa Bibilia

1. Angĩkorũo nĩ ũndũ mũritũ kũgĩa na mũrutwo wa Bibilia gĩcigo-inĩ gitũ-rĩ, twagĩrĩirũo gwĩka atĩa, na nĩkĩ?

¹ Hihi nĩ wonaga ũrĩ ũndũ mũritũ kũgĩa na mũndũ ũngĩĩruta nake Bibilia? Thiĩ na mbere gũcaria. Jehova nĩ arathimaga arĩa matakuaga ngoro makĩgeria gwĩka wendi wake. (Gal. 6:9) Haha mũhuro harĩ na njĩra ithano ingĩgũteithia.

2. Tũngĩhũthĩra njĩra ya ĩmwe kwa ĩmwe atĩa kwambĩrĩria wĩruti wa Bibilia?

² Njĩra ya Ĩmwe kwa Ĩmwe: Andũ aingĩ nĩ moĩ atĩ nĩ tũheanaga ngathĩti cia Mũrangĩri na Amkeni!, ĩndĩ no makorũo matoĩ atĩ nĩ tũrutaga andũ Bibilia. Githĩ ti wega kũgeria njĩra ya ĩmwe kwa ĩmwe ũkĩhunjia nyũmba kwa nyũmba? Ningĩ no ũũrie andũ arĩa marakenio nĩ ũhoro arĩa ũceeragĩra kana no mende wĩruti wa Bibilia. Mangĩrega-rĩ, no ũthiĩ na mbere kũmatigagĩra mabuku na kũgeria gũkũria wendi wao. Mũrũ wa Ithe witũ ũmwe nĩ aakoretwo agĩtwarĩra mũthuri ũmwe na mũtumia wake magathĩti kwa mĩaka mĩingĩ. Hĩndĩ ĩmwe thutha wa kũmatwarĩra magathĩti ma ica ikuhĩ-rĩ, nĩ aahũndũkire athiĩ no agĩciria amoorie: “No mwende kwĩruta Bibilia?” Ũndũ ũrĩa wamũgegirie nĩ atĩ maacokirie ĩĩ. Na rĩu nĩ abatithie.

3. Hihi nĩ twagĩrĩirũo gũtua atĩ andũ othe arĩa mokaga mĩcemanio nĩ mareruta Bibilia? Taarĩria.

³ Arĩa Mokaga Mĩcemanio: Ndwagĩrĩirũo gũtua atĩ andũ arĩa othe wonaga magĩũka mĩcemanio ya kĩũngano nĩ mareruta Bibilia. Mũrũ wa Ithe witũ ũmwe oigire ũũ: “Makĩria ma nuthu ya arutwo arĩa ndaanathoma nao ndamonire na njĩra ya kwaria na arĩa mokaga mĩcemanio.” Mwarĩ wa Ithe witũ ũmwe nĩ aatuire itua rĩa kwaria na mũtumia ũmwe warĩ thoni ũrĩa warĩ na aarĩ abatithie thĩinĩ wa kĩũngano. Mũtumia ũcio aakoretwo agĩthiĩ mĩcemanio mĩaka 15 na hĩndĩ ciothe aakinyaga thĩinĩ wa Nyũmba ya Ũthamaki mĩcemanio ĩkĩambĩrĩria na akoima yarĩka o ũguo. Mũtumia ũcio agĩĩtĩkĩra kwĩruta na thutha-inĩ akĩiyũkia ũhoro wa ma. Mwarĩ wa Ithe witũ ũcio aandĩkire ũũ: “Nĩ ndĩĩriraga mũno atĩ ndaarekire mĩaka 15 ĩhĩtũke itarĩ ndaamũria kana no ende kwĩruta!”

4. Tũngĩgĩa na mũrutwo atĩa na njĩra ya kũũrĩrĩria?

⁴ Kũũrĩrĩria: Mwarĩ wa Ithe witũ ũmwe nĩ erutanagĩria gũtwara andũ arĩa angĩ kũrĩ arutwo ao a Bibilia. Thutha wa kwaria na ũrĩa ũrarutana, ithomo rĩarĩka akooria mũrutwo ũcio kana nĩ oĩ andũ angĩ hihi mangĩenda kwĩruta. Rĩrĩa ũrahe mũndũ ũkoretwo ũgĩceerera ibuku rĩa Bibilia Ĩrutanaga no ũmũũrie ũũ: “Hihi nĩ harĩ mũndũ ũngĩ ũĩ ũngĩkenera kũgĩa na ibuku rĩrĩ?” Rĩmwe na rĩmwe, maũndũ nĩ maagaga gwĩtĩkĩria ahunjia na mapainia kwĩruta na andũ amwe gĩcigo-inĩ kĩao. Kwoguo reke andũ arĩa angĩ mamenye atĩ no wende kwĩruta Bibilia na mũndũ.

5. Nĩ kĩĩ kĩngĩtũma tũũrie athuri kana atumia arĩa matetĩkĩtie arĩa mahikanĩtie na Akristiano kana no mende kwĩruta?

⁵ Athuri na Atumia Arĩa Matarĩ Etĩkia: Hihi kĩũngano-inĩ kĩanyu nĩ kũrĩ ahunjia marĩ na athuri kana atumia matarĩ etĩkia? Andũ amwe arĩa matetĩkĩtie nĩ maregaga kwarĩrĩria Bibilia na Akristiano arĩa mahikanĩtie nao, ĩndĩ no metĩkĩre kwĩruta na mũndũ ũtarĩ wa famĩlĩ yake. Kaingĩ nĩ wega kwamba kwaranĩria na ũrĩa wĩtĩkĩtie nĩguo ũmenye njĩra ĩrĩa njega makĩria ũngĩhũthĩra.

6. Mahoya nĩ ma bata atĩa rĩrĩa mũndũ arageria gũcaria mũrutwo?

⁶ Mahoya: Ndũkanahũthie hinya wa mahoya. (Jak. 5:16) Jehova nĩ oigĩte atĩ nĩ arĩiguaga mahoya maitũ mangĩkorũo nĩ maringaine na wendi wake. (1 Joh. 5:14) Mũrũ wa Ithe witũ ũmwe warĩ na mawĩra maingĩ nĩ aambĩrĩirie kũhoya aheo mũrutwo wa Bibilia. Mũtumia wake nĩ aarigagwo kana nĩ arĩonaga ihinda rĩa kũrũmbũiya mũrutwo, na makĩria mũrutwo ũcio angĩkorũo na mathĩna maingĩ. Nĩ ũndũ ũcio nĩ aamenyithagia Jehova maũndũ macio akĩhoera mũthuriwe agĩe na mũrutwo. Mahoya mao nĩ maacokirio thutha wa ciumia igĩrĩ rĩrĩa painia ũmwe kĩũngano-inĩ kĩao onire mũndũrũme wendaga kwĩruta na akĩheana mũrutwo ũcio kũrĩ mũrũ wa Ithe witũ ũcio. Mũtumia wake aandĩkire ũũ: “Mũndũ o wothe ũngĩona ta atangĩhota kwĩruta na mũndũ Bibilia, ngũmwĩra atĩrĩ: Gweta ũndũ ũcio mahoya-inĩ ĩmwe kwa ĩmwe, na ndũgatige kũhoya igũrũ rĩaguo. Nĩ tũgĩte na gĩkeno kĩingĩ gũkĩra ũrĩa ndeeciragia.” Ũngĩthiĩ na mbere kwĩrutanĩria-rĩ, o nawe wahota kũgĩa na mũrutwo wa Bibilia na wĩyonere gĩkeno kĩrĩa kiumanaga na gũteithia mũndũ one ‘njĩra ĩrĩa ĩkinyaga kũrĩa kwĩ muoyo.’—Mat. 7:13, 14.