Nyĩmbo Njerũ cia Ũthathaiya!
1 Thĩinĩ wa mũcemanio wa o mwaka ũrĩa wĩrĩgĩte gwĩkwo ica ikũhĩ wa Watch Tower Bible and Tract Society of Pennsylvania, ũrĩa wekirũo Oktomba 4, 2014, nĩ kwanĩrĩirũo mĩbango ĩgiĩ gũcokerũo kwa ibuku rĩrĩa tũrĩ narĩo rĩa rwĩmbo. Hatarĩ nganja, ũhoro ũcio warĩ wa gũcanjamũra mũno! Andũ othe arĩa maarĩ kuo nĩ maaririkanirio itemi rĩa bata rĩrĩa nyĩmbo cia Ũthamaki ibatiĩ gũkorũo narĩo thĩinĩ wa ũthathaiya witũ.—Thab. 96:2.
2 Hihi no wĩyũrie atĩrĩ, ‘Nĩkĩ nĩ harĩ bata gũcokera ibuku rĩu rĩa rwĩmbo?’ Harĩ na itũmi cigana ũna. Kĩa mbere biũ nĩ atĩ, ũtheri wĩgiĩ ũtaũku witũ wa maandĩko no ũrathiĩ ũgĩthererũkaga, na ũndũ ũcio no ũhutie ciugo cia nyĩmbo ciitũ. (Thim. 4:18) Gĩtũmi kĩngĩ nĩ atĩ ciugo nyingĩ iria ĩhũthĩrĩtwo thĩinĩ warĩo, ciarutirwo thĩinĩ wa Bibilia ĩrĩa ya hau kabere ya New World Translation. Ciugo icio no mũhaka igarũrwo nĩguo itwarane na iria ihũthĩrĩtwo thĩinĩ wa Bibilia njerũ. Tondũ wĩra mũnene wa kũgarũra ciugo icio no wabataranagia-rĩ, nĩ gwatuirwo itua rĩa kuongerera nyĩmbo cigana ũna njerũ ibuku-inĩ rĩu.
3 Hihi tũgũbatara gweterera nginya ibuku rĩerũ rĩgacabwo nĩguo twambĩrĩrie kũina nyĩmbo icio njerũ? Aca. Tũrĩ na gĩkeno kũmũmenyithia atĩ, thutha wa mĩeri ĩigana ũna, nyĩmbo imwe cia icio njerũ nĩ igekĩrũo thĩinĩ wa Web site itũ ya jw.org. Rwĩmbo rũerũ rũarutwo, nĩ rũrĩbangagĩrũo kũinwo mũthia-inĩ wa Mũcemanio wa Ũtungata na nĩ rũrĩkoragwo ruonanĩtio wega atĩ nĩ “rwĩmbo rwerũ.”
4 Ũrĩa Tũngĩĩruta Nyĩmbo Icio Njerũ: Ti ũndũ mũhũthũ kwĩruta rwĩmbo rwerũ. O na kũrĩ ũguo, o ta mwandĩki wa Thaburi, tũngĩenda kũina rĩrĩa tũrĩ mĩcemanio-inĩ itũ, handũ ha “gũkira.” (Thab. 30:12) Nĩguo wĩrute rwĩmbo rwerũ, no ũrũmĩrĩre njĩra ici hũthũ.
Thikĩrĩria kaingĩ mũgambo wa rwĩmbo rũu rũrĩa rũgekĩrũo thĩinĩ wa Web site itũ. O ũrĩa ũrĩthikagĩrĩria mũgambo ũcio kaingĩ, noguo ũrĩkoragwo ũrĩ ũndũ mũhũthũ kũũririkana.
Wĩrute ciugo cia rwĩmbo rũu na ũgerie gũciga meciria-inĩ.
Twarana na mũgambo ũkĩinaga, nginya ũnyite rwĩmbo rũu biũ.
Mwĩmenyeriei nyĩmbo icio njerũ maita maigan ũna hĩndĩ ya Ũthathaiya wa Famĩlĩ, nginya andũ a famĩlĩ yaku maigue nĩ marahota kũciina wega biũ.
5 Mĩeri-inĩ ĩrĩa yũkĩte rĩrĩa rwĩmbo rwerũ rwekĩrũo mũthia-inĩ wa Mũcemanio wa Ũtungata, kĩũngano kĩrĩambaga gũthikĩrĩria mũgambo rita rĩmwe. Thutha-inĩ athikĩrĩria makarũina magĩtwaranaga na mũgambo o ta ũrĩa twĩkaga rĩrĩa tũraina nyĩmbo icio ingĩ.
6 Nĩ ũndũ ũtũrehagĩra gĩkeno mũno rĩrĩa tũraina tũrĩ mĩcemanio-inĩ itũ, tũkĩgoocaga Jehova na mĩgambo itũ tũrĩ hamwe. Nĩ ũndũ ũcio nĩ tũbatiĩ gwĩthema mũtugo wa kuuma nja hatarĩ na gĩtũmi kĩega rĩrĩa twanyitwo ũgeni tũine rwĩmbo tũrĩ mĩcemanio-inĩ.
7 Nĩ harĩ njĩra ĩngĩ tũngĩonania nayo atĩ nĩ tũcokagia ngatho nĩ ũndũ wa nyĩmbo citũ. Rĩrĩa tũrĩ igomano-inĩ, o gĩcunjĩ gĩtanambĩrĩria nĩ tũthikagĩrĩria tũrwĩmbo twa kĩnanda. Maita merĩ o mwaka, aarĩ na ariũ a Ithe witũ kuuma icigo itiganĩte thĩinĩ wa thĩ yothe, nĩ merutagĩra gũthiĩ Patterson, New York, nĩguo makahaarĩrie nyĩmbo njega iria tũhũthagĩra ũthathaiya-inĩ witũ. Nĩ ũndũ ũcio, rĩrĩa mũikarĩri gĩtĩ atwĩra tũcarie handũ ha gũikara na tũthikĩrĩrie tũrwĩmbo twa kĩnanda tũrĩa tũhaarĩrĩirio, nĩ wega gwĩka ũguo. Gwĩka ũguo nĩ kũrĩtũteithagia kũhaarĩria ngoro citũ nĩ ũndũ wa ũhoro ũrĩa ũkũrũmĩrĩra.—Ezar. 7:10.
8 Ũmũthĩ tũkũrĩkĩrĩria mĩcemanio itũ na rwĩmbo rũerũ rũrĩa rũrĩ na kĩongo “Ũthamaki nĩ Ũhandĩtwo—Reke Ũũke.” Rwĩmbo rũrũ, rwarĩ rũmwe rwa maũndũ marĩa maarĩ mũcemanio-inĩ ũcio wa o mwaka, na rwatungĩtwo rũrĩ rwa kũririkana mĩaka 100 ya gũciarũo kwa Ũthamaki.
9 Hatarĩ nganja, nyĩmbo icio njerũ nĩ “maũndũ mega”kuuma kũrĩ Jehova. (Mat. 12:35a) Rekei tũtue itua rĩa kwĩruta nyĩmbo ici njerũ na gũciinaga kuuma ngoro thĩinĩ na tũkĩheaga Ngai witũ rũgooco na gĩtĩo kĩrĩa kĩmwagĩrĩire!—Thab. 147:1.