Kwagagĩria Ũtungata Witũ—Gũteithia Arutwo a Bibilia Mahũthagĩre Njĩra Njega cia Kwĩruta

Ũndũ Ũcio nĩ wa Bata Nĩkĩ? Nĩguo arutwo wa Bibilia magimare kĩĩroho, no mũhaka makorũo na makĩria ma morutani ma mũthingi ma Kiugo kĩa Ngai meciria-inĩ na ngoro-inĩ ciao. (Ahib. 5:12–6:1) Kwĩruta nĩ kũbataraga mũndũ erutanĩrie. Nĩ kũhutĩtie kũringithania maũndũ marĩa tũĩ na marĩa tũreruta na kũmenya bata wa kũmahũthĩra. (Thim. 2:1-6) Arutwo mangĩĩruta gwĩka ũthuthuria, ũndũ ũcio no ũmateithie gũcokagia ciũria cia Bibilia makĩhũthĩra mabuku maitũ ma Gĩkristiano. Mangĩkĩra kĩyo harĩ kũhũthĩra maũndũ marĩa mareruta no makorũo mehaarĩirie kwĩhanda wega rĩrĩa maacemania na magerio.—Luk. 6:47, 48.

Ũrĩa Tũngĩka:

Tĩtĩrithia bata wa gũcaria ũteithio wa Jehova kũgerera mahoya hĩndĩ ciothe mbere ya kwambĩrĩria kwĩruta.—Joh. 14:26; 1 Kor. 2:10.
Kuuma o kĩambĩrĩria, ĩkĩra mũrutwo waku ngoro ahaaragĩrie kabere harĩa mũgũthoma. Muonie ibuku rĩaku rĩrĩa mwĩrutaga nake, na ũmuonie ũrĩa angĩkururĩra o harĩa macokio marĩ.
Teithia mũrutwo waku acokagie ciũria akĩhũthĩra ciugo ciake. Wĩruti wanyu ndũgakorũo ũrĩ o ciũria na macokio harĩa mũrutwo ekũbatara o gũcokia ciũria ĩmwe kwa ĩmwe kuuma ibuku-inĩ.
Ĩkĩra mũrutwo waku ngoro athomage gĩcunjĩ kĩa Bibilia o mũthenya. Muonie mũtaratara wa gũthoma Bibilia thĩinĩ wa jw.org, ũrĩa wonanagia ũrĩa angĩhota gwĩka ũguo. Gũthomaga Bibilia o mũthenya nĩ gũkũbatarania mũndũ akorũo atuĩte itua, no moimĩrĩro marĩkoragwo marĩ mega.—Thab. 1:2, 3.
Onia mũrutwo waku ũrĩa angĩona macokio ma ciũria cia Bibilia akĩhũthĩra Watchtower Library kana ŨTHUTHURIA INTANETI-INĨ. Mũteithie amenye ũrĩa mabuku marĩa tũhũthagĩra kaingĩ mĩcemanio-inĩ metagwo na njĩra nguhĩ.

Geria Gwĩka ũũ Mweri-inĩ Ũyũ:

Thutha wa kũrĩkia gũthoma kĩongo kĩnini kana gĩcunjĩ gĩothe, ũria mũrutwo waku wa Bibilia ataarĩrie na njĩra nguhĩ maũndũ marĩa eruta. Angĩkorũo ndũrĩ na mũrutwo, wĩmenyerie gũtaarĩria na njĩra nguhĩ gĩcunjĩ kĩa Bibilia kana kĩbungo kĩa ngathĩti ya Mũrangĩri kĩrĩa wathoma nĩguo wagagĩrie ũthomi waku.