Hihi ũrathondekera ciana ciaku njĩra ĩhaana atĩa ya kũrũmĩrĩra?
KŨRĨ ACIARI
8 Kĩonereria Kĩega
ŨGUO NĨ KUUGA ATĨA?
Aciari arĩa maigaga kĩonereria kĩega nĩ marũmagĩrĩra maũndũ marĩa marutaga ciana ciao. Kwa ngerekano, ndũngĩrĩgĩrĩra mwana waku aragie ma angĩigua ũkiuga, “Mwĩre ndirĩ kuo,” rĩrĩa ũtarenda kwaria na mũndũ ũgũceereire.
“Andũ aingĩ moigaga ‘Ĩka ũrĩa ndĩroiga, no ti ũrĩa ndĩreka.’ No ũndũ ũcio ndũngĩteithia ciana. Ikoragwo itariĩ ta thibonji ĩragucia maũndũ marĩa mothe tuugaga na tũgeka, na no itwĩre rĩrĩa kĩonereria gitũ gĩtaratwarana na maũndũ marĩa tũraciruta.”—David.
ŨTAARO WA BIBILIA: “Wee ũhunjagia, ‘Ndũkanaiye-rĩ,’ nĩ ũiyaga?”—Aroma 2:21.
ŨNDŨ ŨCIO NĨ WA BATA NĨKĨ?
Ciana o hamwe na arĩa marĩ mĩaka-inĩ ya ũtinĩnja nĩ mahutagio mũno nĩ maũndũ marĩa aciari ao mekaga na makoiga o na gũkĩra ũrĩa mahutagio nĩ maũndũ marĩa mũndũ ũngĩ o wothe angĩka kana oige, nginya arata ao. Kwoguo ũrĩ mũciari nĩwe wagĩrĩire makĩria gũtongoria ciana ciaku ũrĩa kwagĩrĩire, na njĩra ya gwĩkaga maũndũ marĩa ũciĩraga ciĩke.
“No tũcokere kaũndũ maita maingĩ mũno nginya tũkarigwo kana mwana witũ nĩ athikagĩrĩria, no tũngĩka ũndũ ũtaratwarana na ũrĩa tuugaga o na riita rĩmwe, mwana witũ nĩ atwĩraga. Ciana nĩ iroraga mũno maũndũ marĩa tũreka, o na rĩrĩa tũtareciria atĩ nĩ irarora.”—Nicole.
ŨTAARO WA BIBILIA: “Ũũgĩ ũrĩa uumaga igũrũ . . . ndũrĩ ũhinga.”—Jakubu 3:17.
ŨRĨA ŨNGĨKA
Thuthuria maũndũ marĩa wĩkaga. Nĩ maũndũ marĩkũ ma gwĩkenia wee wĩroragĩra? Ũhiũranagia atĩa na ũrĩa mũhikanĩtie nake o hamwe na ciana ciaku? Ũkoragwo na arata a mũthemba ũrĩkũ? Hihi nĩ ũrũmbũyagia andũ arĩa angĩ? Na njĩra ĩngĩ-rĩ, hihi no wende ciana ciaku ihaane tawe?
“Tũrĩ na mũthuri wakwa tũtiĩraga ciana citũ ciĩke maũndũ marĩa ithuĩ tũtekaga.”—Christine.
Hoyaga mũhera wahĩtia. Ciana ciaku nĩ ciũĩ atĩ ndũrĩ mũkinyanĩru. Ũngĩhoyaga mũhera kũrĩ ũrĩa mũhikanĩtie nake kana ciana ciaku rĩrĩa wahĩtia, nĩ ũrĩtũmaga o nao merute gũkorũo marĩ ehokeku na enyihia.
“Ciana citũ nĩ ciagĩrĩirũo kũigua tũgĩtĩkĩra mahĩtia maitũ rĩrĩa twahĩtia, na nĩ ciagĩrĩirũo kũigua tũkĩhoya mũhera nĩ ũndũ wa mahĩtia maitũ. Tũngĩaga gwĩka ũguo, itingĩĩruta gwĩtĩkĩra mahĩtia ma cio rĩrĩa ciahĩtia.”—Robin.
“Ciana citũ nĩ ihutagio mũno nĩ maũndũ marĩa twĩkaga na tũkoiga tũrĩ aciari, na no tũcirute makĩria kũgerera kĩonereria gitũ tondũ tũkoragwo hamwe nacio hingo ciothe. Kĩonereria gitũ gĩtariĩ ta ibuku rĩkoragwo rĩrĩ ihingũre hingo ciothe, rĩrĩa ciana citũ ithomaga.”—Wendell.