Ũngĩĩmenya wega no ũhote gwĩtiria moritũ manene
KŨRĨ ANDŨ ETHĨ
9 Kwĩmenya
ŨGUO NĨ KUUGA ATĨA?
Kwĩmenya kũhutĩtie makĩria ma kũmenya ũrĩa wĩtagwo na ũrĩa ũhaana na nja. Nĩ hamwe na kũmenya ithimi ciaku, maũndũ marĩa wĩtĩkĩtie, na ũmũndũ waku. Kwoguo kwĩmenya kũhutĩtie kũmenya maũndũ mothe makwĩgiĩ, ma thĩinĩ na ma na nja.
ŨNDŨ ŨCIO NĨ WA BATA NĨKĨ?
Ũngĩkorũo wĩmenyete wega, nĩ ũrĩrũmagia maũndũ marĩa wĩtĩkĩtie handũ ha gwĩtĩkĩra gũtongorio nĩ andũ a riika rĩaku.
“Andũ aingĩ mahaana ta ndoori iria ihũthagĩrũo nduka-inĩ cia kwendia nguo. Itithuuraga nguo iria ikwĩhumba; andũ arĩa angĩ nĩo macihumbaga.”—Adrian.
“Nĩ ndĩrutĩte kũrũmagia ũndũ ũrĩa mwega o na rĩrĩa atarĩ ũndũ mũhũthũ gwĩka ũguo. No hote kũmenya arata akwa a ma nĩ arĩkũ kũringana na ciĩko ciao na kũringana na ũrĩa njĩkaga maũndũ rĩrĩa tũrĩ nao.”—Courtney.
ŨTAARO WA BIBILIA: “Na mũtige kwĩgerekanagia na mũtabarĩre ũyũ wa maũndũ, ĩndĩ mũgarũrũke na njĩra ya kũgarũrĩra meciria manyu.”—Aroma 12:2.
ŨRĨA ŨNGĨKA
Wĩmenye ũrĩ mũndũ wa mũthemba ũrĩkũ rĩu na ũngĩenda gũtuĩka mũndũ wa mũthemba ũrĩkũ, kũgerera gũthuthuria ũhoti waku, mawathe maku, na maũndũ marĩa wĩtĩkĩtie. Njĩra njega ya kwambĩrĩria gwĩka ũguo nĩ gũcokia ciũria ici irũmĩrĩire.
Ũhoti: Nĩ iheo irĩkũ ngoragwo nacio, kana nĩ ũhoti ũrĩkũ ngoragwo naguo? Nĩ ngumo irĩkũ njega ngoragwo nacio? (Kwa ngerekano: Hihi nĩ njũĩ kũiga mahinda? Nĩ hotaga kwĩgirĩrĩria? Nĩ ndutaga wĩra na kĩyo? Ndĩ mũtaana?) Nĩ maũndũ marĩkũ mega njĩkaga?
GERIA ŨŨ: Hihi nĩ wonaga arĩ ũndũ mũritũ gwĩciria ũhoro wa maũndũ mega wĩkĩte kana ũkoiga? Ũria mũciari kana mũrata wĩhokete akwĩre ngumo ciaku njega na akwĩre aroiga ũguo nĩkĩ.
ŨTAARO WA BIBILIA: “O mũndũ nĩ athuthurie ciĩko ciake mwene, na hĩndĩ ĩyo nĩ ekũgĩa na gĩtũmi gĩa gũkena nĩ ũndũ wake mwene, no ti kwĩringithania na mũndũ ũrĩa ũngĩ.”—Agalatia 6:4.
Mawathe: Nĩ maũndũ marĩkũ megiĩ ũmũndũ wakwa ndĩrabatara kũrutĩra wĩra makĩria? Nĩ mahinda-inĩ marĩkũ ingĩgwa magerio-inĩ na njĩra hũthũ? Nĩ maũndũ-inĩ marĩkũ ndĩrabatara kwĩgirĩrĩria makĩria?
ŨTAARO WA BIBILIA: “Tũngiuga, ‘Tũtirĩ na mehia,’ nĩ kwĩheenia tũngĩkorũo tũkĩĩheenia.”—1 Johana 1:8.
Maũndũ marĩa wĩtĩkĩtie: Nĩ ithimi irĩkũ cia mĩtugo nũmagĩrĩra, na nĩkĩ? Hihi nĩ njĩtĩkĩtie Ngai? Nĩ ũira ũrĩkũ ũtũmĩte njĩtĩkie atĩ arĩ kuo? Nĩ maũndũ marĩkũ nyonaga matarĩ ma kĩhooto, na nyonaga ũguo nĩkĩ? Nĩ maũndũ marĩkũ njĩtĩkĩtie megiĩ ihinda rĩrĩa rĩũkĩte?
ŨTAARO WA BIBILIA: “Ũhoti wa gwĩciria nĩ ũrĩkũgitagĩra, naguo ũtaũku ũgakũrangĩra.”—Thimo 2:11.