Ithomo rĩa 8

Mũtũũrĩre wa Famĩlĩ Ũrĩa Ũkenagia Ngai

Mũthuuri arĩ na ũnene ũrĩkũ thĩinĩ wa famĩlĩ? (1)

Mũthuuri aagĩrĩirũo gũtuga mũtumia wake atĩa? (2)

Ithe wa ciana ehokeirũo maũndũ marĩkũ? (3)

Wĩra wa mũtumia thĩinĩ wa famĩlĩ nĩ ũrĩkũ? (4)

Ngai endaga aciari na ciana meke atĩa? (5)

Mawoni ma Bibilia nĩ marĩkũ ũhoro-inĩ ũkoniĩ kweheranĩra na gũtigana? (6, 7)

1. Bibilia yugaga atĩ mũthuuri nĩwe mũtwe wa famĩlĩ yake. (1 Akorintho 11:3) No mũhaka mũthuuri akorũo na mũtumia o ũmwe tu. O maagĩrĩirũo makorũo mahikanĩtie kũringana na watho.—1 Timotheo 3:2; Tito 3:1.

2. Mũthuuri aagĩrĩirũo ende mũtumia wake o ta ũrĩa eendete we mwene. Aagĩrĩirũo amũtuge o ta ũrĩa Jesu aatugaga arũmĩrĩri ake. (Aefeso 5:25, 28, 29) Ndaagĩrĩirũo kũhũra mũtumia wake o na hanini kana kũmwĩka ũũru na njĩra o na ĩrĩkũ. Handũ ha ũguo-rĩ, aagĩrĩirũo amwĩkĩrĩre na amũtĩe.—Akolosai 3:19; 1 Petero 3:7.

3. Ithe wa ciana aagĩrĩirũo arute wĩra na kĩo nĩguo amenyerere famĩlĩ yake. No mũhaka ithe wa ciana acarĩrie mũtumia na ciana ciake irio, nguo, na nyũmba. O na ningĩ no mũhaka ithe wa ciana ahingie mabata ma kĩĩroho ma famĩlĩ yake. (1 Timotheo 5:8) We atongoragia nĩguo ateithie famĩlĩ yake ĩĩrute ũhoro wa Ngai na mĩoroto Yake.—Gũcokerithia Maathani 6:4-9; Aefeso 6:4.

4. Mũtumia aagĩrĩirũo atuĩke mũteithia mwega wa mũthuuri wake. (Kĩambĩrĩria 2:18) We aagĩrĩirũo gũteithia mũthuuri wake kũruta na kũmenyeria ciana ciao. (Thimo 1:8) Jehova endaga mũtumia atungate famĩlĩ yake na njĩra ya wendani. (Thimo 31:10, 15, 26, 27; Tito 2:4, 5) We aagĩrĩirũo etigĩre mũno mũthuuri wake.—Aefeso 5:22, 23, 33.

5. Ngai endaga ciana ciathĩkĩre aciari acio. (Aefeso 6:1-3) We erĩgagĩrĩra aciari marute na marũnge ciana ciao. Aciari mabatiĩ kũhũthĩra mahinda hamwe na ciana ciao na merute Bibilia hamwe nacio, macihingĩrie mabataro macio ma kĩĩroho na ma mawoni ma ngoro-inĩ. (Gũcokerithia Maathani 11:18, 19; Thimo 22:6, 15) Aciari matiagĩrĩirũo o na hanini kũrũnga ciana ciao na njĩra ya wĩĩ.—Akolosai 3:21.

6. Hingo ĩrĩa andũ erĩ mahikanĩtie maagĩa na mathĩna ũhoro-inĩ wĩgiĩ kũiguithania-rĩ, maagĩrĩirũo magerie kũhũthĩra itaaro rĩa Bibilia. Bibilia ĩtũringagĩrĩria tuonanie wendani na tuohanĩre. (Akolosai 3:12-14) Kiugo kĩa Ngai gĩtigaathagĩrĩria kweheranĩra atĩ nĩyo njĩra ya kũniina mathĩna manini manini. No hihi kwahoteka mũtumia agacagũra gũtiga mũthuuri wake angĩkorũo (1) mũthuuri nĩaregete e na ngoro nyũmũ kũhingĩria famĩlĩ yake mabata, (2) we nĩ mwĩĩ mũno ũũ atĩ ũgima mwega na muoyo wa mũtumia wĩ ũgwati-inĩ, kana (3) ũkararia wake mũkĩru nĩũgiragia kũhoteke mũtumia athathayie Jehova.—1 Akorintho 7:12, 13.

7. No mũhaka arĩa magwatanĩire ũhikania-inĩ makorũo marĩ ehokeku o mũndũ harĩ ũrĩa ũngĩ. Ũtharia nĩ mehia harĩ Ngai na harĩ ũrĩa mũhikanĩtie nake. (Ahibirania 13:4) Gũkomania nja ya ũhikania nokĩo gĩtũmi giiki tu kĩa Maandĩko gĩtĩkĩrĩtie gũtigana na gwĩtĩkĩria kũhikania rĩngĩ. (Mathayo 19:6-9; Aroma 7:2, 3) Jehova nĩathũire kuona andũ magĩtigana matarĩ na itũmi cia Maandĩko na makahikania na mũndũ ũngĩ.—Malaki 2:14-16.

[Pictures on page 16, 17]

Ngai erĩgagĩrĩra aciari marute ciana ciao na macirũnge

[Mbica karatathi ka 17]

Ithe wa ciana mwendani nĩahingagia mabata ma famĩlĩ yake ma kĩĩmwĩrĩ na kĩroho