Ithomo Rĩa 1

Ngai Nĩakũũragia Ũtuĩke Mũrata Wake

Ngai nĩendaga ũtuĩke mũrata wake. Hihi wee ũrĩ weciria o rĩ o rĩ atĩ no ũhote gũtuĩka mũrata wa Mũndũ ũrĩa mũnene makĩria thĩinĩ wa thĩ na igũrũ? Iburahimu, ũrĩa watũũraga ihinda iraya ithiru, eetagwo mũrata wa Ngai. (Jakubu 2:23) Angĩ magwetetwo thĩinĩ wa Bibilia nĩmekenirie na ũrata wa Ngai o nao, na makĩrathimwo mũno. Ũmũthĩ, andũ kuuma mĩena yothe ya thĩ nĩmatuĩkĩte arata a Ngai. Wee o nawe no ũtuĩke mũrata wa Ngai.

Gũkorũo ũrĩ mũrata wa Ngai nĩ wega makĩria gũkĩra gũkorũo ũrĩ mũrata wa mũndũ o na ũrĩkũ. Ngai ndarĩ hingo o na rĩ atũmaga arata ake ehokeku mate mwĩhoko harĩ we. (Thaburi 18:25) Gũkorũo ũrĩ mũrata wa Ngai nĩ ũndũ mwega makĩria gũkĩra kũgĩa na ũtonga. Rĩrĩa gĩtonga gĩakuarĩ, andũ angĩ nĩo moyaga mbia ciakĩo. Ĩndĩ, arĩa mekenagia na ũrata wa Ngai marĩ na kĩgĩĩna kĩrĩa gũtarĩ mũndũ ũngĩmatunya.—Mathayo 6:19.

Andũ amwe hihi no magerie gũkũgiria wĩrute ũhoro ũkoniĩ Ngai. O na amwe a arata aku na a famĩlĩ yaku hihi no meke ũguo. (Mathayo 10:36, 37) Angĩ mangĩgũthekerera kana magwĩkĩre guoya-rĩ, wĩyũrie ũũ, ‘Nũũ ngwenda gũkenia—andũ kana Ngai?’ Ta wĩcirie ũũ: Mũndũ angĩkwĩra ũtige kũrĩa irio-rĩ, wamwathĩkĩra? Hatarĩ nganja aca! Nĩũbatairio nĩ irio nĩguo ũtũũre muoyo. Ĩndĩ Ngai no atũme ũtũũre muoyo tene na tene! Kwoguo ndũkanareke o na rĩ mũndũ o na ũrĩkũ akũgirie wĩrute ũhoro wa ũrĩa ũngĩhota gũtuĩka mũrata wa Ngai.—Johana 17:3.