Metĩkĩtie Atĩa?

AIRA A JEHOVA metĩkĩtie Ngai Mwene Hinya Wothe, Jehova, Mũũmbi wa igũrũ na thĩ. Gũkorũo na magegania ma ũũmbi ũrĩa ũtũthiũrũrũkĩirie nĩ ũira wa kwonania atĩ kũrĩ na Mũũmbi ũrĩ na ũũgĩ wa igũrũ mũno na wĩna ũhoti. O ta ũrĩa mawĩra ma arũme na atumia monanagia maũthĩ mao no taguo Jehova Ngai. Biblia ĩtwĩraga atĩ “maũndũ make marĩa matonekaga—na nĩmo hinya wake ũrĩa ũtũũraga o ho, o naguo ũngai wake-rĩ—nĩmonagwo wega tondũ wa ũrĩa makũũranĩkaga nĩ ũndũ wa indo iria ciombirũo.” O na ningĩ, hatarĩ mũgambo kana ciugo-rĩ, “igũrũ nĩ kũmemerekia rĩmemerekagia riri wa Mũrungu.”—Aroma 1:20; Thaburi 19:1-4.

Andũ matiũmbaga nyũngũ cia rĩũmba kana magathondeka televiconi kana kompiuta hatarĩ gĩtũmi. Thĩ na ũũmbi wa mĩmera na nyamũ nĩ wa magegania makĩria. Mũmbĩre wa mwĩrĩ wa mũndũ o hamwe na tũgũcĩ-gũcĩ [cells] tiririoni nyingĩ nĩ ũndũ tũtangĩhota gũtaũkĩrũo –o na tombo ũrĩa twĩciiragia naguo o naguo nĩ wa magegania mũno! Angĩkorũo andũ nĩ makoragwo na gĩtũmi gĩa tũindo tũtarĩ kĩene tũrĩa magundũragia-rĩ, ma nĩ atĩ Jehova Ngai aarĩ na gĩtũmi kĩa ũũmbi wake wa magegania! Thimo 16:4 yuugaga ũũ: “Jehova nĩombire kĩndũ o gĩothe nĩ ũndũ wa gĩtũmi gĩakĩo.”

Jehova ombire thĩ arĩ na gĩtũmi, ta ũrĩa erire andũ a mbere erĩ: “Ciarai mũno, mũthegee, mũiyũrie thĩ . . . ; ningĩ mwathage ciũngũyũ cia iria, na nyamũ iria irĩ njoya cia rĩera-inĩ, o na nyamũ o yothe ĩrĩa ĩthiangaga thĩ.” (Kĩambĩrĩria 1:28) Nĩ ũndũ wa ũremi wao-rĩ, mũthuri na mũtumia ũcio makĩremwo kũiyũria thĩ na famĩlĩ thingu iria ingĩahotire gũtungata thĩ na mĩmera o na nyamũ na njĩra ya wendo. No kũremwo kwao gũtingĩgiria itanya rĩa Jehova rĩhinge. Thutha mĩaka ngiri nyingĩ, kwandĩkirũo ũũ: “Ngai, na nĩwe wathondekire thĩ . . . ndaamĩũmbire hatarĩ ũrĩa yatariĩ.” We “aamĩũmbire ĩtũũragwo.” Ti ya kwanangwo, ĩndĩ “thĩ ĩtũũraga ĩrĩ o ho tene na tene.” (Isaia 45:18; Kohelethu 1:4) Gĩtũmi kĩa Jehova kũũmba thĩ nĩ gĩkamenyeka: “Kĩrĩra gĩakwa nĩgĩgaikara kĩrũmĩte wega, namo maũndũ mothe marĩa nyendaga gwĩka-rĩ, nomo ngeka.”—Isaia 46:10.

Nĩ ũndũ ũcio-rĩ, Aira a Jehova metĩkĩtie atĩ thĩ ĩgũtũũra tene na tene na atĩ andũ othe, arĩa me muoyo na arĩa akuũ, arĩa maagĩrĩra mũbango-inĩ wa Jehova wa thĩ ĩrĩa ĩgakorũo ĩrĩ ngemie mũno, mahote kũmĩtũũra tene na tene. Andũ othe nĩ magaĩte kwaga gũkinyanĩra kuuma kwĩ Adamu na Hawa, na kwoguo-rĩ othe nĩ ehia. (Aroma 5:12) Biblia ĩtwĩraga ũũ: “Mũcara wa wĩhia nĩ gĩkuũ.” “Arĩa me mũoyo no moĩ atĩ nĩmagakua; no arĩa makuĩte-rĩ, matirĩ ũndũ moĩ.” “[“Muoyo,” NW] ũrĩa wĩhagia nĩguo ũgakua.” (Aroma 6:23; Kohelethu 9:5; Ezekieli 18:4, 20) Mangĩkĩhota atĩa gũtũũra rĩngĩ nĩguo magae irathimo icio cia thĩ? No kũhĩtũkĩra tu thĩinĩ wa igongona rĩa mũkũũri Jesu Kristo, tondũ oigire ũũ: “Nĩ niĩ kũriũka na nĩ niĩ muoyo; ũrĩa wĩĩ’hokete niĩ, o na aakua, no agatũũra muoyo.” “Arĩa othe me thĩinĩ wa mbĩrĩra makaigua mũgambo wake, na moime kuo.”—Johana 5:28, 29; 11:25; Mathayo 20:28.

Ũũ ũkahinga atĩa? Ũtaarĩirio thĩinĩ wa “Ũhoro-ũrĩa–Mwega wa ũthamaki,” ũrĩa Jesu ambĩrĩirie kũhunjia rĩrĩa aarĩ gũkũ thĩ. (Mathayo 4:17-23) Ĩndĩ ũmũthĩ Aira a Jehova marahunjia ũhoro ũyũ mwega na njĩra ya mwanya mũno.

[Chart on page 13]

ŨRĨA AIRA A JEHOVA METĨKĨTIE

Wĩtĩkio Gĩtũmi kĩa Maandĩko

Rĩĩtwa rĩa Ngai nĩ Jehova Thab. 83:18; Isa. 26:4; 42:8; Thama 6:3

Aaganu makaninwo biũ kaimana Mat. 25:41-46; 2 Thes. 1:6-9

Ũgo no mũhaka ũregwo biũ Gũcok. 18:10-12; Gal. 5:19-21; Alaw. 19:31

Maathani ma Biblia megiĩ mĩtugo 1 Kor. 6:9, 10; Ahib. 13:4; no mũhaka maathĩkĩrũo 1 Tim. 3:2; Thim. 5:1-23

[Mbica karatathi ka 12]

THĨ . . . yombirwo nĩ Jehova . . . ĩmenyererũo nĩ mũndũ . . . ĩtũũrũo tene na tene