Ũhoro Mwega Ũrĩa Mekwenda Wee Ũigwe

RĨRĨA Jesu aarĩ gũkũ thĩ, arutwo ake magĩũka kũrĩ we na makĩmũũria atĩrĩ: “Kĩmenyithia kĩa rĩrĩa ũgoka, o na gĩa ithirĩro rĩa mahinda maya, nĩ kĩrĩkũ?” Aacokirie atĩ nĩgũgakorũo na mbaara cia ndũrĩrĩ nyingĩ, ngʼaragu, mĩrimũ, ithingithia, na uuni wa watho, arutani a ndini a maheni akũhĩtithia kĩrĩndĩ, kũmenwo na kũnyarirũo kwa arũmĩrĩri ake a ma, na wendani wa andũ aingĩ wa ũthingu nĩ ũkanyiha. Rĩrĩa maũndũ macio makambĩrĩria gwĩkĩka, nĩkuonania atĩ Kristo arĩkuo atekuonekana na Ũthamaki wa Ngai wĩ hakuhĩ. Kaĩ ũyũ nĩ ũhoro-ĩ—ũhoro mwega! Hakĩrĩ ũguo Jesu akĩongerera ciugo ici irĩ ta gĩcunjĩ kĩa rũri: “Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.”—Mathayo 24:3-14.

Maũndũ marĩa marekĩka thĩ matukũ-inĩ maya nĩ mooru biũ, no ũrĩa maronania nĩ mwega, gũkorũo kuo gwa Kristo. Maũndũ macio magwetetwo hau igũrũ maambĩrĩirie kuonekana mwaka-inĩ ũrĩa ũũĩkaine mũno wa 1914! Monanirie mũthia wa Mahinda ma Ndũrĩrĩ na kĩambĩrĩria kĩa ũgarũrũku wa waathani wa andũ na gũtonyio kwa waathani wa Kristo wa Mĩaka Ngiri Ĩmwe (Mileniamu).

Kwonania atĩ nĩ gũkagĩa na ũgarũrũku kũgwetetwo thĩinĩ wa Thaburi ya 110, mũhari wa 1 na 2, na Kũguũrĩrio 12:7-12. Hau honanĩtie atĩ Kristo aangĩaikarire thĩ guoko-inĩ kwa ũrĩo kwa Ngai kũu igũrũ o nginyagia hĩndĩ yake ya gũtuĩka Mũthamaki. Hamwe na ũguo-rĩ, maciaro ma mbaara ya igũrũ marehire kũharũrũkio gwa Shaitani gũkũ thĩ, gũkĩrehe haro gũkũ thĩ, na ningĩ Kristo agĩthamaka gatagatĩ-inĩ ga thũ ciake. Kũninwo kwa waganu wothe gũgoka na ũndũ wa [‘mĩnyamaro mĩnene’] mũthia wayo nĩ mbaara ya Hari-Magedoni na ĩrũmĩrĩrũo nĩ waathani wa Kristo wa Mĩaka Ngiri Ĩmwe wa thayũ.—Mathayo 24:21, 33, 34; Kũguũrĩrio 16:14-16.

Biblia yuugĩte ũũ: “No rĩrĩ, ũndũ ũyũ ũmenye wega, atĩ matukũ marĩa ma kũrigĩrĩria nĩgũkagĩa mahinda ma ũgwati. Tondũ andũ nĩmagatuĩka eendi, na endi mbia, na egani, na egathi, na arumani, andũ matangĩigua aciari ao, na matarĩ ngatho, na matarĩ atheru; ningĩ makorũo maagĩte wendani ũrĩa wa ndũire, andũ matangĩteithũrĩkana, na magacambanagia, na arĩa matoĩ kwĩgirĩrĩria, andũ eĩ, na arĩa matenda maũndũ mega, na arĩa makunyanagĩra andũ arĩa angĩ, na arũũgĩrĩri, na eĩkĩrĩri, o na arĩa mendaga gwĩkenia gũkĩra ũrĩa mendaga Ngai; nĩo metuaga ta meamũrĩire Ngai, no kũrega nĩmaregaga hinya ũrĩa uumaga ũhoro-inĩ ũcio: acio nao ũmathemage.”—2 Timotheo 3:1-5.

Angĩ no makararie moige atĩ maũndũ maya maanekĩka rĩngĩ historia-inĩ ya mũndũ, no ũhoro wa ma nĩ atĩ matirĩ mekĩka rĩngĩ mũigana ta ũcio. Ta ũrĩa a historia na amemerekia moigaga-rĩ, gũtirĩ kwagĩa na ihinda thĩinĩ wa thĩ tarĩrĩa rĩonetwo kuuma 1914 gũthiĩ na mbere. (Rora karatathi ka 7.) Haaro ikoretwo i nyingĩ makĩria gũkĩra mbere ĩyo. Hamwe na ũguo-rĩ, ha ũhoro wa marũũri mangĩ ma Kristo ma matuku ma kũrigĩrĩria itũmi ici no mũhaka irorũo: Ũhunjia wa thĩ yothe wa gũkorũo kuo kwa Kristo na Ũthamaki wĩkĩtwo na njĩra nene makĩria thĩinĩ wa historia. Kũnyamario nĩũndũ wa kũhunjia gũtingĩringithanio na ũndũ o wothe ũrĩa Aira a Jehova monete. Magana maingĩ mao moragĩirũo ithamĩrio-inĩ thĩinĩ wa Nazi. Nginyagia ũmũthĩ ũyũ kũndũ kũingĩ Aira a Jehova makoretwo rungu rwa marubuku, kũngĩ makanyitwo, makohwo, kũnyamario, na kũragwo. Ũũ wothe nĩ gĩcunjĩ kĩa rũri rũrĩa Jesu aaheanire.

Ta ũrĩa kwarathirwo thĩinĩ wa Kũguũrĩrio 11:18, ‘ndũrĩrĩ nacio nĩciabucunire’ [nĩciarakarire] igũrũ rĩa Aira eehokeku a Jehova, na ũndũ ũyũ ũkũonania atĩ “marakara” ma Jehova makerekerio igũrũ rĩa ndũrĩrĩ icio. Rĩandĩko o rĩu riugaga atĩ Ngai “nĩ a kũnina arĩa monũhaga thĩ.” Gũtirĩ kwagĩa ihinda rĩngĩ o rĩothe thĩinĩ wa historia ya mũndũ rĩrĩa ũhoti wa thĩ wa gũtũũria mĩoyo ĩkuhĩrĩirie kũninwo. Ĩndĩ rĩu, maũndũ nĩ magarũrũku! Athomi aingĩ a sayanisi maheanĩte mũkaana atĩ mũndũ angĩthiĩ na mbere gũthũkia thĩ, nĩ ĩrĩaga gũtũũrwo. No Jehova “aamĩũmbire ĩtũũragwo nĩ andũ,” nĩ arĩ nina athũkia matanamĩũnũha biũ.—Isaia 45:18.

IRATHIMO CIA THĨ RUNGU RŨA ŨTHAMAKI

Rĩciiria rĩa andũ gũtũũra thĩinĩ wa thĩ marĩ raiya a Ũthamaki wa Ngai-rĩ, no rĩoneke arĩ kĩhĩngĩca harĩ etĩkia aingĩ a Biblia arĩa meciragia atĩ andũ othe ahonokie marĩ igũrũ. Biblia yonanagia atĩ no gakundi kanini gagathiĩ igũrũ na ningĩ atĩ arĩa magatũũra tene na tene gũkũ thĩ magakorũo marĩ kĩrĩndĩ kĩnene gĩtarĩ ithabu. (Thaburi 37:11, 29; Kũguũrĩrio 7:9; 14:1-5) Ũrathi ũmwe thĩinĩ wa ibuku rĩa Danieli wonanĩtie atĩ Ũthamaki wa Ngai rungu rũa Kristo ũkaiyũra thĩ na ũmĩthamake.

Thĩinĩ wa ibuku rĩu Ũthamaki wa Kristo ũhananĩtio na ihiga rĩtinĩtio kuuma kĩrĩma-inĩ kĩa mũhaano kĩa wathani wa Jehova. Rĩagũthire na rĩkĩhehenja mũhianano ũrĩa wa rũgamĩrĩire ndũrĩrĩ irĩ hinya cia thĩ, na “ihiga rĩu rĩagũthire mũhianano ũcio rĩkĩneneha, rĩgĩtuĩka rũaro rũa ihiga, naruo rũkĩiyũra thĩ yothe.” Ũrathi ũthiĩte na mbere kuuga ũũ: “Na rĩrĩ, hĩndĩ ya athamaki acio-rĩ, nĩguo Ngai-wa-Igũrũ akahanda ũthamaki ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”—Danieli 2:34, 35, 44.

Nĩ Ũthamaki ũyũ na mwĩhoko wa muoyo wa tene na tene igũrũ rĩa thĩ ĩrĩa thambie na ĩkagemio na ũrĩa ũnyitĩtwo mbaru nĩ Maandĩko nĩguo Aira a Jehova marenda gũkũmenyithia. Mamilioni arĩa rĩu me muoyo, na mamilioni aingĩ arĩa me mbĩrĩra-inĩ, nĩ makagĩa na mweke wa kũmĩtũũra tene na tene. Mworoto wa Jehova wa mbere wa kũũmba thĩ na kũiga andũ a mbere nĩ ũkahingio rungu rũa Wathani wa Miaka Ngiri Ĩmwe wa Kristo Jesu. Paradaisi ĩyo ya thĩ gũtirĩ hĩndĩ ĩkanogania. O ta ũrĩa Adamu aheirũo wĩra thĩinĩ wa mũgũnda wa Edeni, o ũndũ ũmwe andũ nĩmakagĩa na mawĩra maingĩ ma gũtungata thĩ na mĩmera na nyamũ. “Nĩmarĩkenagĩra wĩra wa moko mao ihinda iraya.”—Isaia 65:22; Kĩambĩrĩria 2:15.

Maandĩko maingĩ no mahũthĩrũo ma kuonania mũikarĩre ũrĩa ũgakorũo kuo hĩndĩ ĩrĩa mahoya marĩa Jesu atũrutire magacokio: “Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.” (Mathayo 6:10) Ĩndĩ, reke tũiganĩre na ũguo rĩu: “Na ngĩigua mũgambo mũnene woima gĩtĩ-inĩ kĩrĩa gĩa ũthamaki woiga, Atĩrĩrĩ, gĩikaro kĩa Ngai kĩĩ hamwe na andũ, nake nĩegũikarania nao, nao matuĩke andũ ake, nake Ngai we mwene agĩage o hamwe nao, [e Ngai wao]; nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira. Nake ũrĩa ũtũire aikarĩire gĩtĩ-gĩa-ũthamaki akiuga, Nĩ atĩrĩ, maũndũ mothe nĩ kũmerũhia ndĩramerũhia. Nake akiuga, Andĩka; amu ciugo icio nĩ cia kwĩhokwo na nĩ cia ma.”—Kũguũrĩrio 21:3-5.

[Mbica karatathi ka 15]

“Nĩ gũkagĩa mahinda ma ũgwati,”

NA “hĩndĩ ĩo nĩrĩo ithirĩro rĩgakinya”

[Mbica karatathi ka 18]

Netherlands

[Mbica karatathi ka 18]

Nigeria