No Wagagĩrie Kĩririkano Gĩaku

JEHOVA NGAI ombire tombo wa mũndũ ũrĩ na ũhoti wa magegania wa kũririkana. Aaũthondekire ũtuĩke mũthithũ wa kũhũthagĩrũo ũtegũte maũndũ ma bata marĩa maigĩtwo thĩinĩ waguo. Mũũmbĩre wa tombo nĩ ũringaine na muoroto wa Ngai atĩ andũ magĩrĩirũo nĩ gũtũũra mĩndĩ na mĩndĩ.—Thab. 139:14; Joh. 17:3.

No wahota kuona atĩ maingĩ ma maũndũ marĩa maingĩraga meciria-inĩ maku nĩ mariganagĩra. Ũgakorũo ndũramaririkana rĩrĩa ũramabatara. Ũngĩka atĩa wagagĩrie kĩririkano gĩaku?

Onania Wendi

Kuonania wendi harĩ ũndũ nĩ kwa bata harĩ kwagĩria kĩririkano. Tũngĩĩmenyeria gũikaraga tũkĩbaraga maũndũ, tũkonania nĩ tũrakenio nĩ andũ na maũndũ marĩa matũrigicĩirie, meciria maitũ nĩ marĩarahũragwo. Nĩ ũndũ ũcio, ũrĩkoragwo ũrĩ ũndũ mũhũthũ harĩ ithuĩ gũkorũo na mwerekera o ta ũcio rĩrĩa twathoma kana twaigua ũndũ wa bata.

Nĩ ũndũ mũhũthũ mũndũ kũriganĩrũo nĩ marĩĩtwa ma andũ. Ĩndĩ, tũrĩ Akristiano nĩ tũĩ atĩ andũ nĩ a bata—Akristiano arĩa angĩ, andũ arĩa tũhunjagĩria, na angĩ arĩa tũkoragwo nao mĩhangʼo-inĩ ya o mũthenya. Nĩ kĩĩ kĩngĩtũteithia kũririkana marĩĩtwa ma andũ arĩa kũna twagĩrĩirũo nĩ kũririkana? Mũtũmwo Paulo akĩandĩkĩra kĩũngano kĩmwe aagwetire marĩĩtwa 26 ma andũ a kĩũngano kĩu. Ũndũ ũrĩa wonanagia aarĩ na bata nao nĩ atĩ to marĩĩtwa mao aagwetire ĩndĩ nĩ nginya maũndũ oĩ megiĩ aingĩ ao. (Rom. 16:3-16) O na gũtuĩka amwe a arori arĩa magendaga mahinda-inĩ maya a Aira a Jehova moimaga kĩũngano kĩmwe nginya kĩrĩa kĩngĩ o kiumia-rĩ, nĩ maririkanaga wega marĩĩtwa ma andũ. Nĩ kĩĩ kĩmateithagia? Memenyagĩria kũhũthĩra rĩĩtwa rĩa mũndũ maita maigana ũna rita rĩa mbere makĩaria nake. Mageragia mũno kũririkana rĩĩtwa rĩa mũndũ ũcio kũringana na ũthiũ wake. Makĩria ma ũguo, nĩ mahũthagĩra mahinda na mũndũ ũmwe ũmwe ũtungata-inĩ na hĩndĩ ya kũrĩa. Rĩrĩa ũrĩcemania na mũndũ-rĩ, hihi nĩ ũrĩcoka kũririkana rĩĩtwa rĩake? Ambĩrĩria na kũgĩa na gĩtũmi kĩega gĩa kũririkana rĩĩtwa rĩake; ũcoke ũgerie kũhũthĩra mamwe ma maũndũ macio magwetwo.

Ningĩ kũririkana kĩrĩa ũrathoma nĩ kwa bata. Nĩ kĩĩ kĩngĩgũteithia ũkũrie ũhoti ũcio? Wendi na ũtaũku nĩ cia bata ũndũ-inĩ ũcio. Ũkũbatara gũkorũo na wendi mũnene harĩ ũndũ ũrĩa ũrathoma nĩguo ũhote kũiga meciria maku mothe harĩ guo. Ndũngĩririkana maũndũ angĩkorũo meciria maku marĩ kũndũ kũngĩ rĩrĩa ũrageria gũthoma. Ũtaũku waku nĩ wagĩraga ũngĩkuruhithania ũhoro ũrĩa ũrathoma na maũndũ marĩa ũĩ kana na ũmenyo ũrĩa ũrĩ naguo. Wĩyũrie ũũ: ‘Nĩ atĩa na nĩ rĩ ingĩhũthĩra ũhoro ũyũ ũtũũro-inĩ wakwa? Ingĩũhũthĩra atĩa gũteithia mũndũ ũngĩ?’ Ũtaũku ningĩ nĩ wagĩraga ũngĩthoma ciugo nyingĩ hamwe handũ ha gũthoma kiugo kĩmwe kĩmwe. Nĩ ũrĩhotaga kũnyita wega rĩciria rĩrĩa rĩrĩ ho na ũgataũkĩrũo nĩ maũndũ marĩa ma bata makĩria, ũndũ ũrĩmaririkanaga na njĩra hũthũ.

Hũthĩra Mahinda Gũcokera

Njorua cia maũndũ ma gĩthomo nĩ itĩtĩrithagia bata wa gũcokera. Mũrutani ũmwe wa korenji hĩndĩ ĩmwe agĩthomithia oigire atĩ ũngĩhũthĩra ndagĩka ĩmwe gũcokera o hĩndĩ ĩyo, ũkuongerera maita merĩ ũhoti waku wa kũririkana ũhoro ũrĩa wathoma. Kwoguo warĩkia gũthoma—kana wathoma gĩcigo kĩna—ũtekũrĩa marĩĩgu cokera meciria-inĩ maũndũ marĩa ma bata makĩria nĩguo maingĩre biũ meciria-inĩ maku. Wĩcirie ũrĩa ũngĩtaarĩria na ciugo ciaku maũndũ mageni marĩa ũngĩkorũo weruta. Kwĩririkania ũndũ kahinda kanini thutha wa kũũthoma, nĩ kũrĩgũteithagia kuongerera mahinda marĩa ũndũ ũcio ũgũikara meciria-inĩ maku.

Ningĩ thutha wa matukũ maigana ũna, caria mweke wa gũcokera kĩrĩa wathomire na njĩra ya kwĩra mũndũ ũngĩ. No wĩre mũndũ famĩlĩ-inĩ, kĩũngano-inĩ, wĩra-inĩ, cukuru, itũũra-inĩ, kana ũtungata-inĩ. Handũ ha gũcokera o ũhoro tu, cokera nginya itũmi cia Kĩĩmandĩko iria iraũnyita mbaru. Gwĩka ũguo nĩ gũgũkũguna, gũgũteithie gũkindĩra maũndũ ma bata meciria-inĩ maku; ningĩ nĩ gũkũguna andũ angĩ.

Wĩcũranie Maũndũ Marĩa ma Bata

Makĩria ma gũcokera kĩrĩa wathoma na kwĩra andũ angĩ ũhoro ũcio, nĩ ũkuona atĩ gwĩcũrania maũndũ marĩa ma bata weruta nĩ kũrĩ ũguni. Andĩki a Bibilia Asafu na Daudi nĩ meekaga ũguo. Asafu oigire ũũ: “Nĩngwĩririkania mawĩko ma Jehova; amu ngũkĩĩririkania maũndũ maku ma kĩgeganio marĩa wekaga tene. Ngwĩrurumia ũhoro wa wĩra ũcio waku wothe, mĩĩkĩre ĩo yaku ndĩkĩĩheehe ũhoro wa ũrĩa ĩtariĩ.” (Thab. 77:11, 12) Ũndũ ũmwe na ũcio Daudi aandĩkire ũũ: “Matuanĩra-inĩ ma camu wa ũtukũ nĩ ũhoro waku ndĩĩrurumagia,” na “ngĩririkana matukũ marĩa ma tene, mawĩko maku mothe ngerurumia ũhoro wamo.” (Thab. 63:6; 143:5) Wee nĩ wĩkaga ũguo?

Makĩria ma gũgũteithia kũririkana, gwĩthugunda na njĩra ndikĩru ũguo ũhoro wa mawĩko ma Jehova, ngumo, na wendi wake, harĩ ũndũ ũngĩ kũngĩgũteithia. Ũngĩmenyera gwĩcũrania na njĩra ĩyo, maũndũ marĩa ma bata kũna nĩ mekũingĩra biũ ngoro-inĩ yaku. Nĩ gũgũthondeka mũndũ waku wa ngoro thĩinĩ. Maũndũ marĩa ũrĩririkanaga nĩ marĩonanagia ũrĩa mathugunda maku ma thĩinĩ matariĩ.—Thab. 119:16.

Itemi rĩa Roho wa Ngai

Tũkĩgeria kũririkana ma ciĩgiĩ mawĩko ma Jehova na maũndũ marĩa maaririo nĩ Jesu Kristo nĩ tũheetwo ũteithio. Ũtukũ ũrĩa warĩ mbere ya gũkua gwake, Jesu eerire arũmĩrĩri ake ũũ: ‘Maũndũ macio nĩ ndĩmwĩrĩte tũrĩ o na inyuĩ. No mũteithia, o ũcio roho mũtheru, ũrĩa ũkaarekio nĩ Ithe witũ na rĩĩtwa rĩakwa, guo nĩ ũkaamũruta maũndũ mothe, na ũmũririkanagie mohoro mothe marĩa ndanamũhe.’ (Joh. 14:25, 26) Mathayo na Johana maarĩ ho. Hihi roho mũtheru nĩ watuĩkire mũmateithia? Ĩĩ, hatirĩ nganja! Kĩndũ mĩaka ĩnana thutha ũcio, Mathayo nĩ aarĩkirie ibuku rĩa mbere rĩrĩa rĩkoragwo na ũhoro mũingĩ wĩgiĩ ũtũũro wa Kristo, hamwe na maũndũ ma bata ta Mĩario ya Kĩrĩma-inĩ na kĩmenyithia kĩarĩ na ũhoro mũingĩ gĩa gũka gwa Kristo na kĩa mũthia wa mũtabarĩre ũyũ wa maũndũ. Mĩaka mĩrongo ĩtandatũ na ĩtano thutha wa gĩkuũ kĩa Jesu, mũtũmwo Johana nĩ aandĩkire Injiri yake, nginya maũndũ marĩa Jesu aaririe ũtukũ wa mũthia ũrĩa atũmwo maarĩ hamwe nake mbere ya kũruta muoyo wake. Hatarĩ nganja, Mathayo na Johana nĩ maaririkanaga wega maũndũ marĩa Jesu aarĩtie na ageka rĩrĩa maakoragwo nake, no roho mũtheru warĩ na itemi inene gũtigĩrĩra atĩ matinariganĩrũo nĩ maũndũ ma bata marĩa Jehova eendaga mandĩkwo Kiugo-inĩ gĩake.

Hihi roho mũtheru nĩ mũteithia wa ndungata cia Ngai ũmũthĩ? Hatirĩ nganja! Ma nĩ atĩ, roho mũtheru ndwĩkagĩra meciria-inĩ maitũ maũndũ marĩa tũtathomete, ĩndĩ nĩ ũtuĩkaga mũteithia harĩ gũtũririkania maũndũ ma bata marĩa twĩrutĩte. (Luk. 11:13; 1 Joh. 5:14) Ningĩ, bata ũngiumĩra, ũhoti witũ wa gwĩciria nĩ warahũragwo ‘tũkaririkana ciugo iria ciaaririo mbere nĩ anabii arĩa atheru, na rĩathani rĩa Mwathani na Mũhonokia.’—2 Pet. 3:1, 2.

‘Ndũkanariganĩrũo’

Maita maingĩ Jehova nĩ aaheaga Aisiraeli mũkaana ũyũ: ‘Ndũkanariganĩrũo.’ Ti kuuga atĩ eerĩgagĩrĩra maririkanage maũndũ mothe na njĩra nginyanĩru. Ĩndĩ matiaagĩrĩirũo gũkorũo na mĩhangʼo mĩingĩ nginya mariganĩrũo nĩ maũndũ marĩa Jehova aamekĩire. Maagĩrĩirũo kũririkana biũ ũrĩa Jehova aamahonokirie rĩrĩa mũraika wake oragire marigithathi mothe ma Misiri, o hamwe na rĩrĩa Jehova aagayũkanirie Iria Itune agĩcoka akĩrĩcokania, Firauni na mbũtũ yake magĩthirĩra kuo. Aisiraeli nĩ maagĩrĩirũo kũririkana atĩ Ngai nĩ aamahete Watho wake Kĩrĩma-inĩ gĩa Sinai na nĩ aamatongoririe kũgererera werũ-inĩ magĩkinya Bũrũri wa Kĩĩranĩro. Maagĩrĩirũo nĩ kũririkana na njĩra ya atĩ gwĩthugunda ũhoro wa maũndũ macio kwabataire gũthiĩ na mbere gũkorũo na ũgucania ũtũũro-inĩ wao wa o mũthenya.—Gũcok. 4:9, 10; 8:10-18; Tham. 12:24-27; Thab. 136:15.

O na ithuĩ nĩ twagĩrĩirũo kwĩmenyerera tũtikanariganĩrũo. Tũkĩhiũrania na mĩtangĩko ya ũtũũro, nĩ tũkũbatara kũririkana Jehova, tũririkanage ngumo ciake na wendo ũrĩa onanirie harĩ kũruta Mũriũ, ũrĩa warutire ũkũũri nĩ ũndũ wa mehia maitũ nĩguo tũkaagĩa na muoyo mũkinyanĩru tene na tene. (Thab. 103:2, 8; 106:7, 13; Joh. 3:16; Rom. 6:23) Gũthoma Bibilia o mũthenya na gũkoragwo na itemi mĩcemanio-inĩ ya kĩũngano na ũtungata-inĩ nĩ kũrĩtũmaga ma icio cia Bibilia ciikarage thĩinĩ witũ.

Rĩrĩa ũratua matua, manene kana manyinyi, ririkanaga ma icio cia bata, na ũrekage citongorie mwĩcirĩrie waku. Ndũkanariganĩrũo. Wĩhokage Jehova agũtongoragie. Handũ ha kuonaga maũndũ na muonere wa kĩĩmwĩrĩ kana kũrũmagĩrĩra merirĩria ma ngoro ĩtarĩ nginyanĩru, wĩyũrie, ‘Nĩ motaaro marĩkũ ma Bibilia magĩrĩirũo gũtongoria itua rĩakwa?’ (Thim. 3:5-7; 28:26) Ndũngĩririkana maũndũ ũtarĩ wathoma kana ũkaigua. Ĩndĩ o ũrĩa ũmenyo na wendo waku harĩ Jehova ũrongerereka, mũthithũ wa ũmenyo ũrĩa roho wa Ngai ũrĩgũteithagia kũririkana nĩ ũkwandandũka, na wendo waku mũnene nĩ ũrĩgũtindĩkaga gwĩka kũringana naguo.