Kwaria Ciugo Iraiguĩka Wega

NĨGUO mũthikĩrĩria anyite ũhoro wega, no mũhaka ũwarie na njĩra ĩraiguĩka. Ũhoro ũrĩa ũrenda kwaria no ũkorũo ũrĩ wa kũgucĩrĩria, kana wa bata, no ciugo ciaku ingĩaga kũiguĩka wega, mũingĩ waguo ũkũũrĩra thĩ.

Andũ matirurumũragwo nĩ ũhoro matarataũkĩrũo nĩguo. O na mũndũ angĩkorũo na mũgambo ũrĩ na hinya na ũraiguĩka, angĩmeria ciugo, citingĩrurumũra andũ. Angĩkorũo atariĩ ta mũndũ ũraria rũthiomi rũgeni, rũtangĩmenyeka nĩ mũthikĩrĩria. (Jer. 5:15) Bibilia ĩtũririkanagia ũũ: “Karumbeta kangĩkĩgamba mũgambĩre ũtangĩhota gũkũũranwo ũrĩa ũkuuga-rĩ, nũ ũngĩgwata gwĩthagathagĩra ita? Na noguo na inyuĩ, nĩmĩ cianyu ingĩkĩaga kwaria ũhoro ũngĩhũthĩra kũiguĩka-rĩ, kaĩ ũhoro ũrĩa uugĩtwo ũrĩkĩmenyekaga atĩa? Amu mwaya gũtuĩka ta andũ megũikia mũgambo o ũguo rĩera-inĩ.”—1 Kor. 14:8, 9.

Nĩ kĩĩ Kĩngĩtũma Ũhoro Wage Kũiguĩka Wega? Ũndũ ũcio no ũrehwo nĩ kwaga gwathamia kanua ũrĩa kwagĩrĩire. Kũũmia mĩkiha ya thĩa na kwaria ũnyitithanĩtie mĩromo no gũtũme ciugo ciage kũiguĩka.

Kwaria narua mũno o nakuo no gũtũme andũ maage kũnyita ũhoro ũrĩa ũraario. Gwĩka ũguo nĩ ta gũtengʼeria ciugo cia kĩnanda gũkĩra ũrĩa ciarongoreirio. Ciugo nĩ iraario, ĩndĩ ũhoro mũingĩ nĩ ũrĩa ũkũũrĩra thĩ.

Rĩmwe na rĩmwe, ciugo citekũiguĩka wega ciumanaga na mawathe ciĩga-inĩ cia kwaria. Ĩndĩ o na arĩa makoragwo na thĩna ta ũcio no mateithĩke mũno mangĩrũmĩrĩra ũtaaro ũrĩa ũrĩ gĩcunjĩ-inĩ gĩkĩ.

O na kũrĩ ũguo, kaingĩ ũhoro no wage kũiguĩka wega nĩ ũndũ wa kũmeria ciugo—gũcinyitithania ũndũ athikĩrĩria mategũtaũkĩrũo nĩcio. Thĩna no ũkorũo arĩ kwagarara ndemwa iria itamũkagwo irĩ hamwe kana kwaga gũtamũka kiugo gĩothe. Rĩrĩa mũndũ araria akĩnyitithanagia ciugo, athikĩrĩria ake mahota gũtaũkĩrũo nĩ maũndũ mamwe ĩndĩ marĩa mangĩ megererie. Kwaga gũtamũka ciugo wega, no gũthũkie mũrutanĩre wa mũndũ.

Kwaria na Njĩra Ĩraiguĩka Wega. Njĩra ĩmwe ya kũgweta ciugo wega nĩ kũmenya mũbangĩre wa ciugo cia rũthiomi rwanyu. Thiomi-inĩ nyingĩ, ciugo ithondekagwo nĩ ndemwa iria itamũkagwo irĩ hamwe. Ndemwa icio ikoragwo irĩ ĩmwe kana makĩria na itamũkanagĩrio hamwe. Thiomi-inĩ ta icio, ndemwa icio nĩcio kaingĩ ciiguĩkaga rĩrĩa ũraria, o na gũtuĩka ciothe ititĩtĩrithagio na njĩra ĩmwe. Ũngĩenda ciugo ciaku ciiguĩkage wega, thiĩ kahora na wĩrutanĩrie biũ kũgweta ndemwa o ciothe iria citamũkagwo hamwe. Kĩambĩrĩria-inĩ ũndũ ũcio no woneke ta arĩ gũkĩria njano, ĩndĩ o ũrĩa ũremenyeria, kahora kahora nĩ ũgũcokerera kwaria na njĩra ĩrũmanĩrĩire wega. Nĩguo ũhoro ũthĩrĩrĩke wega, hatarĩ nganja no ũbatare kũnyitithania ciugo imwe, no ũndũ ũcio wagĩrĩirũo gwĩthemwo angĩkorũo gwĩka ũguo nĩ gũgũtũma andũ mage gũtaũkĩrũo nĩ ciugo.

Ririkana: Nĩguo ũtamũke ciugo wega, no ũbatare kwĩmenyeria kwaria na gũthoma kiugo kĩmwe kĩmwe. No ndũkahũthagĩre njĩra ĩyo hingo ciothe ũkĩaria. Wekaga ũguo ũrĩonekaga ta arĩ gwĩtua.

Angĩkorũo ciugo ciaku citiiguĩkaga wega, wĩrute gũtiira mũtwe waku na gũikara ũinamũkĩte. Rĩrĩa ũrathoma Bibilia, mĩoe na igũrũ wega nĩ getha ũkorũo ũrĩ ũndũ mũhũthũ gũikara ũgĩikagia riitho harĩ athikĩrĩria. Gwĩka ũguo nĩ kũrĩtũmaga ciugo ciaku ciiguĩkage wega.

Kwĩmenyeria kũniina guoya na njĩra ya kũhũmũka o nakuo no kwagagĩrie mwarĩrie waku. Mĩkiha ya ũthiũ kana ĩrĩa ĩteithagia harĩ kũhuhia ĩngĩĩgaatha mũno nĩ ũndũ wa guoya, mwarĩrie waku no ũthũke biũ. Kwĩgaatha ta kũu gũthũkagia ũiguano ũrĩa wagĩrĩirũo gũkorũo gatagatĩ ka meciria maku, ciĩga cia mũgambo, na kũhuhia—iria ciagĩrĩirũo kũrutithania wĩra wega.

Mĩkiha ya thĩa yagĩrĩirũo gũkorũo ĩrĩ mĩregeru nĩguo ĩrutithanie wĩra wega na tombo. Ningĩ mĩromo nĩ yagĩrĩirũo gũkorũo ĩrĩ mĩregeru. Yagĩrĩirũo gũtumio na gũtumũrũo na ihenya nĩguo mĩgambo mĩingĩ ĩrĩa yumaga kanua na mũmero ĩiguĩke wega. Angĩkorũo thĩa na mĩromo nĩ ciĩgathĩte, kanua gatingĩhingũka ũrĩa kwagĩrĩire, na mũgambo ũrĩtindĩkagĩrĩrio uumĩre magego-inĩ. Ũndũ ũcio ũrĩtũmaga ciugo ciage kũiguĩka wega. O na kũrĩ ũguo, kwaga kũregeria thĩa na mĩromo ti kuga warie na ũthayo. Ũndũ ũcio ũrabatara gũtwarana na mũtamũkĩre wa ciugo nĩguo ciiguĩke wega.

Nĩguo wĩmenye, no ũkorũo ũrĩ ũndũ mwega gũthoma na kayũ. Rora wega ũrĩa ũrahũthĩra ciĩga icio cia magegania cia kwaria. Hihi nĩ wathamagia kanua ũrĩa kwagĩrĩire nĩguo ciugo ciiguĩke hatarĩ kĩgirĩrĩria? Ririkana atĩ, rũrĩmĩ to ruo kĩĩga gĩa kwaria, o na gũtuĩka nĩ kĩmwe kĩa iria ihũthĩkaga mũno. Ngingo, rũthĩa rwa thĩ, mĩromo, mĩkiha ya ũthiũ, na mĩkiha ya mũmero ciothe nĩ ikoragwo na itemi. Rĩrĩa ũraria-rĩ, hihi nĩ ũhũthagĩra ũthiũ waku? Angĩkorũo ndwĩkaga ũguo-rĩ, kũrĩ na ũhotekeku mũnene atĩ ciugo ciaku itiiguĩkaga wega.

Angĩkorũo ũrĩ na macini ya kuoya mũgambo, oya mũgambo waku ũkĩaria na mwarĩrie waku kĩũmbe, ta ũrĩa ũngĩarĩria mũndũ ũtungata-inĩ. Oya mũgambo waku ndagĩka cigana ũna. Gũthikĩrĩria mũgambo ũcio waku macini-inĩ no gũgũteithie kũmenya kũrĩa ũrĩ na thĩna harĩ gũtamũka ciugo imwe na njĩra ĩraiguĩka wega. Kwa ngerekano thikĩrĩria kana nĩ ũrameria ciugo, ũgacitamũka ũũru, kana gũcinyitithania, na ũgerie gũtuĩria gĩtũmi. Kaingĩ thĩna ũcio no ũthire ũngĩhũthĩra ũtaaro ũcio warĩrĩrio.

Hihi nĩ ũkoragwo na wathe mũna wa kwaria? Wĩmenyerie gwathamagia kanua gũkĩra ũrĩa ũkoretwo ũgĩka, na ũgeragie gũtamũka ciugo ũbarĩrĩire. Hũmũka, na warie kahora kahora. Gwĩka ũguo nĩ kũhotithĩtie aingĩ arĩa makoragwo na mawathe ma kwaria maagagĩrie mwarĩrie wao. O na gũtuĩka thĩna waku no wage gũthira biũ, ndũgakue ngoro. Ririkana atĩ o na gũtuĩka no kũhoteke Musa aarĩ na wathe wa kwaria, Jehova nĩ aamũhũthĩrire gũkinyĩria Aisiraeli o hamwe na Firauni wa Misiri ndũmĩrĩri cia bata. (Tham. 4:10-12) Angĩkorũo ũrĩ na wendi, o nawe Jehova nĩ egũkũhũthĩra, na nĩ egũkũrathima atũme ũgaacĩre ũtungata-inĩ waku.