Kũhũthĩra Ciĩga cia Mwĩrĩ

ANDŨ a kũndũ kũmwe nĩ mahũthagĩra ciĩga cia mwĩrĩ gũkĩra a kũrĩa kũngĩ. O na kũrĩ ũguo, andũ othe makĩaria nĩ mahũthagĩra ũthiũ na ciĩga ingĩ cia mwĩrĩ. Ũguo nĩguo kũrĩ andũ marĩ ndeereti-inĩ cia o mũthenya na hĩndĩ ya kũruta mĩario mbere ya andũ.

Warĩ ũndũ wa ndũire harĩ Jesu na arutwo ake kũhũthĩra ciĩga cia mwĩrĩ. Rĩrĩa mũndũ ũmwe eerire Jesu atĩ nyina na ariũ a nyina nĩ meendaga kwaria nake, Jesu oririe ũũ: “Maitũ nũ? O na ariũ a maitũ nĩa?” Bibilia ĩcokaga ĩkoiga: ‘Nake akĩorota arutwo ake, akiuga, onei maitũ, na ariũ a maitũ!’ (Mat. 12:48, 49) Thĩinĩ wa Atũmwo 12:17 na 13:16, Bibilia yonanagia atĩ mũtũmwo Petero na Paulo o nao nĩ maahũthĩrire ciĩga cia mwĩrĩ makĩaria.

Makĩria ma kuonanio na mũgambo, rĩciria rĩrĩa mũndũ arĩ narĩo na ũrĩa araigua ngoro-inĩ nĩ cionekaga kũgerera ciĩga cia mwĩrĩ na ũthiũ. Kwaga kũhũthĩra ciĩga icio wega kwahota kuonania atĩ mwaria ndarĩ na bata mũno na ũhoro ũrĩa araheana. Ĩndĩ njĩra icio cia kwaranĩria cingĩhũthĩrũo hamwe wega, nĩ ciagagĩria mĩario mũno. O na rĩrĩa ũraria na thimũ, ũngĩhũthĩra ũthiũ na ciĩga cia mwĩrĩ ũrĩa kwagĩrĩire, mũgambo waku no wonanie ũritũ wa kĩrĩa ũroiga o hamwe na ũrĩa ũraigua ngoro-inĩ. Kwoguo-rĩ, o na angĩkorũo nĩ kwaria ũraria kana nĩ gũthoma, kana athikĩrĩria aku nĩwe marorete kana maratwarana nawe Bibilia-inĩ ciao, kũhũthĩra ũthiũ na ciĩga ingĩ cia mwĩrĩ nĩ kwa bata.

Ndwagĩrĩirũo kwĩgerekania harĩ kũhũthĩra ũthiũ na ciĩga ingĩ cia mwĩrĩ. Ndwarutirũo gũtheka kana kũrakara. Nĩ ũndũ ũcio, kũhũthĩra ciĩga cia mwĩrĩ kwagĩrĩirũo kuonania ũrĩa ũraigua ngoro-inĩ. O ũrĩa kũhũthĩra ciĩga cia mwĩrĩ kũrerehe mũndũ akĩaria, noguo mĩario ĩgũkorũo ĩrĩ mĩega.

Gũkoragwo na njĩra igĩrĩ cia kũhũthĩra ciĩga cia mwĩrĩ: ya gũtaarĩria maũndũ na ya gũtĩtĩrithia. Ya gũtaarĩria yonanagia gĩĩko kana mwena mũna na kũndũ kũna. Thĩinĩ wa cukuru ĩno, ũkĩrutĩra wĩra ũhũthĩri wa ciĩga cia mwĩrĩ, ndũkaiganĩre na kũhũthĩra o ĩmwe kana igĩrĩ tu. Geria kũhũthĩra ciĩga cia mwĩrĩ na njĩra ya ndũire mĩario-inĩ yaku yothe. Angĩkorũo nĩ ũritũhagĩrwo nĩ gwĩka ũguo, no ũteithĩke ũngĩhũthĩra ciugo ironania mwena mũna, ũraihu mũna, mũigana mũna, kũndũ kũna, kana ithimi ingĩ ta icio. O na kũrĩ ũguo, kaingĩ, ũrĩa ũrabatara gwĩka no kũrikĩra mĩario-inĩ yaku, ũtegũtindanĩrĩra na ũrĩa ũroneka, ĩndĩ warie na wĩke maũndũ o ũrĩa ũngĩka ũtũũro-inĩ wa o mũthenya. Rĩrĩa mũndũ akindĩirie, kũhũthĩra ciĩga cia mwĩrĩ kwĩrehaga kuo kwene.

Njĩra ya gũtĩtĩrithia yonanagia ũũma wa ũndũ na ũrĩa mwaria araigua ngoro-inĩ. Nĩ ĩkĩraga ũhoro ũritũ na nĩ ya bata. No nĩ wega kwĩmenyerera! Kũhũthĩra ciĩga cia mwĩrĩ gũtĩtĩrithia no gũtuĩke kamenyeri. Ũngĩhũthĩra ciĩga cia mwĩrĩ na njĩra o ĩmwe tu, athikĩrĩria mahota kwambĩrĩria gwĩciria ũhoro wa njĩra ĩyo handũ ha mĩario. Mũrori wa cukuru angĩkwĩra atĩ nĩ ũrĩ na thĩna ũcio, kwa ihinda, geria kũhũthĩra njĩra ya gũtaarĩria iki. Thutha wa ihinda, ambĩrĩria kũhũthĩra rĩngĩ njĩra ya gũtĩtĩrithia.

Nĩguo ũmenye ũkũhũthĩra njĩra ya gũtĩtĩrithia na gĩthimi kĩrĩkũ na nĩ ĩrĩkũ yagĩrĩire, wĩcirie mawoni ma athikĩrĩria aku. Kuorota athikĩrĩria no gũtũme maigue mataiganĩire. Kũndũ kũmwe kwĩnyita kanua mũndũ akĩonania kĩmako, nĩ mũtugo wa atumia. Kũndũ kũmwe thĩinĩ wa thĩ atumia kwaria makĩhiũragia moko nĩ ũndũ ũtagĩrĩire. Kwoguo thĩinĩ wa kũndũ ta kũu, aarĩ a Ithe witũ mekũbatara kũhũthĩra ũthiũ. Hakuhĩ kũndũ guothe thĩinĩ wa thĩ mũndũ angĩhũthĩra ciĩga cia mwĩrĩ na njĩra ĩkĩrĩtie njano arĩ mbere ya gakundi kanini ka andũ, mahota kuona ta arĩ ithako.

O ũrĩa ũgũthiĩ ũkĩgĩaga na ũmenyeru na ũgĩthiragwo nĩ guoya ũkĩaria, kũhũthĩra ciĩga cia mwĩrĩ gũtĩtĩrithia nĩ kũrĩonanagia ũrĩa ũraigua ngoro-inĩ, na gũkonania ũrĩa kũna wĩtĩkĩtie. Gwĩka ũguo nĩ kũrĩongagĩrĩra mĩario yaku mũcamo.

Ũthiũ Waku. Maita maingĩ ũthiũ waku nĩguo wonanagia biũ ũrĩa kũna ũraigua ngoro-inĩ. Maitho, kanua, na mũtwe waku ciothe nĩ iteithagia kũhingia ũndũ ũcio. O na ũtekwaria, ũthiũ waku no wonanie kũregana na ũndũ, kũrakara, mĩtangĩko, kũgega, kana gĩkeno. Maũndũ macio hamwe na ciugo, mateithagia athikĩrĩria kũhũũra mbica ya ũndũ ũrĩa ũrarĩrĩrio na makahutio ngoro. Ngai akũũmbĩte ũrĩ na makĩria ma mĩkiha 30 thĩinĩ wa ũthiũ waku. Hakuhĩ nuthu ya mĩkiha ĩyo nĩ ĩhũthĩkaga rĩrĩa ũkenete.

O na angĩkorũo ũrĩ rĩarĩrio-inĩ, kana ũrĩ ũtungata-inĩ, muoroto waku nĩ kũheana ndũmĩrĩri njega, ĩrĩa ĩngĩtũma ngoro cia athikĩrĩria ikene. Gũcanjamũka nĩ gũteithagia ũndũ-inĩ ũcio. O na kũrĩ ũguo, ũngĩaga gũkorũo na ũthiũ mũcanjamũku, athikĩrĩria mahota gwĩkĩrĩra nganja ũrĩa ũroiga.

Makĩria ma ũguo rĩrĩa wonania ũthiũ mũcanjamũku andũ nĩ monaga atĩ nĩ ũrameciria. Ũndũ ũcio nĩ wa bata makĩria matukũ-inĩ maya, marĩa kaingĩ andũ metigagĩra mũndũ matoĩ. Ũcanjamũku waku no ũteithie andũ mage gwĩtigĩra na makĩria mathikĩrĩrie ũhoro waku.