Gwaka na Gwĩkĩra Ngoro

WĨRA ũrĩa tũheetwo nĩ wa kũhunjia ndũmĩrĩri ya ũhoro ũrĩa mwega. Jesu oigire ũũ: “Ũhoro-ũrĩa-Mwega ndũrĩ hingo ũtakaamba kũhunjĩrio ndũrĩrĩ ciothe.” (Mar. 13:10) Jesu we mwene nĩ aaigire kĩonereria na njĩra ya kũhunjia “Ũhoro-ũrĩa-Mwega wa ũthamaki wa Ngai.” (Luk. 4:43) Ndũmĩrĩri ĩrĩa atũmwo maahunjagia o nayo ĩtagwo “Ũhoro-ũrĩa-Mwega wa Ngai” na “Ũhoro-ũrĩa-Mwega wa Kristo.” (1 Thes. 2:2; 2 Kor. 2:12) Ndũmĩrĩri ĩyo nĩ ya gwaka na gwĩkĩra ngoro.

Kũringana na “Ũhoro-Mwega ũtagathira o na tene” ũrĩa ũmemerekagio nĩ ‘mũraika ũrĩa ũrerete rĩera-inĩ gatagatĩ-rĩ,’ tũhatagĩrĩria andũ ũũ: “Wĩtigĩrei Ngai, na mũmũgooce.” (Kũg. 14:6, 7) Twĩraga andũ kũndũ guothe ũhoro wĩgiĩ Ngai ũrĩa wa ma, rĩĩtwa rĩake, ngumo ciake cia magegania, mawĩko make ma magegania, muoroto wake wa wendo, ũigĩrĩrĩki witũ harĩ we na ũrĩa endaga twĩke. Ũhoro ũrĩa mwega ningĩ nĩ atĩ Jehova Ngai nĩ akaanina arĩa oru, arĩa matamũtĩĩte na mathũkagia mĩtũũrĩre ya arĩa angĩ. Ĩndĩ ti wĩra witũ gũtuĩra arĩa tũhunjagĩria. Mwĩhoko witũ mũnene nĩ atĩ andũ aingĩ o ũrĩa kũngĩhoteka nĩ megwĩtĩkĩra ndũmĩrĩri ya Bibilia nĩguo kũna ĩtuĩke ũhoro mwega harĩ o.—Thim. 2:20-22; Joh. 5:22.

Ndũkarĩrĩrie Mũno Maũndũ Moru. Ma nĩ atĩ, kũrĩ na mathĩna ũtũũro-inĩ. Tũtingĩĩtua atĩ tũtiramona. Nĩguo wambĩrĩrie ndeereti, no ũgwete thĩna mũna ũrĩa ũrĩ meciria-inĩ ma andũ itũũra-inĩ rĩrĩa mũrahunjia na ũwarĩrĩrie na njĩra nguhĩ. Hatirĩ bata kwarĩrĩria thĩna ũcio na njĩra ndaya. Tondũ andũ nĩ mamenyerete kũigua maũndũ matarĩ mega, kwarĩrĩria maũndũ moru no gũtũme marege gũtũthikĩrĩria. O kĩambĩrĩria-inĩ kĩa ndeereti yanyu, wĩrutanĩrie kwerekeria mũthikĩrĩria harĩ ma cia gũcanjamũra thĩinĩ wa Kiugo kĩa Ngai. (Kũg. 22:17) Nĩ ũndũ ũcio, o na angĩrega mũtwarithie ndeereti, nĩ ũgũkorũo ũmwĩrĩte ũndũ wa gwaka angĩtigwo agĩciria. Gwĩka ũguo no gũtũme ende gũthikĩrĩria hĩndĩ ĩngĩ.

Ũndũ ũmwe na ũguo, angĩkorũo nĩ mĩario ũraruta ndũkahe athikĩrĩria ũhoro mũingĩ wĩgiĩ maũndũ moru atĩ tondũ kũrĩ na ũhoro mũingĩ ta ũcio. Mwaria angĩarĩrĩria mũno gũthũka kwa wathani wa andũ, riboti cia wĩki-naĩ na ũhinya, na wongerereku mũnene wa mĩtugo ya kũmakania ya waga-thoni, athikĩrĩria no makue ngoro. Gweta maũndũ moru makonainie na kĩrĩa ũrarĩrĩria angĩkorũo tu nĩ megũgũteithia kũhingia muoroto mũna. Kũgweta maũndũ ta macio na njĩra nguhĩ no gũgũteithie kuonania atĩ mĩario yaku nĩ ya ihinda rĩrĩa rĩagĩrĩire. Ningĩ gwĩka ũguo no gũkũhe mweke wa kũguũria kĩhumo gĩa thĩna mũna na kuonania nĩkĩ ũtongoria wa Bibilia nĩ wa kũguna. Kũngĩhoteka, aria cara rũkũ ũtegũtindĩrĩra mathĩna macio.

Gũtingĩhoteka na ningĩ gũtiagĩrĩire gwĩthema kũgweta maũndũ mothe moru ũkĩruta mĩario. Ũndũ ũrĩa wa bata ũkĩruta mĩario nĩ kũgĩa na ũigananĩru harĩ kũgweta maũndũ mega na moru na moimĩrĩro makorũo arĩ gwaka andũ. Nĩguo wĩke ũguo, no mũhaka ũmenye maũndũ marĩa ũkwaria, marĩa ũgũtigĩrĩra, na harĩa ũgũtĩtĩrithia. Mahunjio-inĩ ma Kĩrĩma-inĩ, Jesu aatarire athikĩrĩria ake metheme njĩra cia mwĩyendo cia andĩki na Afarisai, na akĩheana ngerekano nyinyi gũthathaũra ũndũ ũcio. (Mat. 6:1, 2, 5, 16) O na kũrĩ ũguo, handũ ha gũtenderia maũru ma atongoria acio a ndini, Jesu aatĩtĩrithirie bata wa gũtaũkĩrũo nĩ njĩra cia ma cia Ngai na gũtũũra kũringana nacio. (Mat. 6:3, 4, 6-15, 17-34) Moimĩrĩro maarĩ mega mũno.

Aria Maũndũ ma Gwaka. Ũngĩheo mĩario kĩũngano-inĩ kĩanyu ĩgiĩ mũtũũrĩre wa Gĩkristiano, wĩrutanĩrie kwarĩrĩria maũndũ ma gwaka andũ handũ ha kũmaruta mahĩtia. Tigĩrĩra atĩ nĩ wĩkaga maũndũ marĩa ũrekĩra andũ ngoro meke. (Rom. 2:21, 22; Ahib. 13:7) Reke maũndũ marĩa ũkuga matindĩkwo nĩ wendo, no ti marakara. (2 Kor. 2:4) Angĩkorũo nĩ wĩtĩkĩtie biũ atĩ Akristiano arĩa angĩ nĩ marenda gũkenia Jehova, maũndũ marĩa ũkwaria nĩ mekuonania ũguo, na moimĩrĩro megũkorũo marĩ mega. Ta ũrĩa mũtũmwo Paulo onanirie wĩtĩkio ta ũcio harĩ athikĩrĩria ake thĩinĩ wa 1 Athesalonike 4:1-12; 2 Athesalonike 3:4, 5; na Filemona 4, 8-14, 21.

Nĩ kũrĩ hĩndĩ kũbataranagia athuri a kĩũngano maheane mũkaana mũna. No wĩnyihia nĩ ũkũmateithia kwaria na andũ a kĩũngano na njĩra ya ũhooreri. (Gal. 6:1) Njĩra ĩrĩa ĩkũhũthĩrũo kwaria yagĩrĩirũo kuonania atĩ arĩa marĩ thĩinĩ wa kĩũngano nĩ maraheo gĩtĩo. (1 Pet. 5:2, 3) Makĩria anake nĩ mataaragwo nĩ Bibilia marorage ũndũ ũcio. (1 Tim. 4:12; 5:1, 2; 1 Pet. 5:5) Rĩrĩa kwabatarania gũkaania andũ, kũmarũithia, o na kũrũngĩrĩria maũndũ, ũndũ ũcio wagĩrĩirũo gwĩkwo kũringana na ũrĩa Bibilia yo nyene yugaga. (2 Tim. 3:16) Mwaria ndagĩrĩirũo o na hanini gũtindĩkĩrĩria kana kũgonyora Rĩandĩko nĩguo rĩnyite mbaru mawoni make kĩũmbe. O na rĩrĩa athikĩrĩria marabatara ũtaaro wa kũrũngwo, no makenere mĩario angĩkorũo mwaria aratĩtĩrithia mũno ũrĩa mangĩĩthema kwĩingĩria maũndũ-inĩ moru, ũrĩa mangĩniina mathĩna, ũrĩa mangĩtoria moritũ, ũrĩa mangĩrũnga mũthiĩre mũru, na ũrĩa ithimi cia Jehova itũgitagĩra.—Thab. 119:1, 9-16.

Ũkĩhaarĩria mĩario, wĩcirie mũno ũrĩa ũgũtiriha ũndũ o wothe wa bata makĩria na ningĩ mĩario ĩrĩ yothe. Ũndũ ũrĩa mũndũ agwetaga mũthia-inĩ kaingĩ nĩguo ũririkanagwo mũno. Hihi ũndũ ũcio nĩ ũgũkorũo ũrĩ wa gwaka?

Tũgĩtereta na Akristiano Arĩa Angĩ. Aira a Jehova nĩ moyaga na ũritũ mĩeke ya kũnyitanĩra na aarĩ na ariũ a Ithe witũ mĩcemanio-inĩ ya Gĩkristiano. Makoragwo marĩ mahinda ma gũcanjamũrũo kĩĩroho. Bibilia ĩtwĩkagĩra ngoro tũkoragwo na muoroto wa ‘kũhatanĩrĩria’ rĩrĩa twacemania kũrĩa tũthathayagĩria. (Ahib. 10:25) Ũndũ ũcio ũhingagio kũgerera mĩario na gũcokia ciũria hĩndĩ ya mĩcemanio o hamwe na gũteereta mbere na thutha wa mĩcemanio.

O na gũtuĩka ti ũũru gũteereta ũhoro wĩgiĩ maũndũ ma mũtũũrĩre witũ wa o mũthenya, njĩra ĩrĩa nene biũ ya gwĩkĩrana ngoro nĩ kwaria maũndũ ma kĩĩroho. Macio nĩ hamwe na maũndũ marĩa twĩyonagĩra rĩrĩa tũrĩ ũtungata-inĩ mũtheru. Kũrũmbũyania biũ mũndũ na ũrĩa ũngĩ nĩ njĩra ĩngĩ ya gwaka.

Nĩ tũrabatara kwĩmenyerera tũtigathũkio nĩ thĩ ĩrĩa ĩtũthiũrũrũkĩirie. Akĩandĩkĩra Akristiano thĩinĩ wa Efeso, Paulo oigire: “Nĩ ũndũ ũcio-rĩ, eheriai maheni na mwaranagĩrie ũhoro wa ma o mũndũ na ũrĩa ũngĩ.” (Ef. 4:25) Kwaria ma handũ ha maheeni nĩ hamwe na gwĩthema gũtũgĩria andũ na indo iria thĩ ĩtũgagĩria. Ningĩ, Jesu nĩ aaheanire mũkaana wĩgiĩ “maheni ma ũtonga.” (Mat. 13:22) Kwoguo rĩrĩa tũrateereta mũndũ na ũrĩa ũngĩ, nĩ tũkũbatara kwĩmenyerera tũtikagathĩrĩrie maheeni macio na njĩra ya kũgemereria bata wa gũkorũo na indo cia kĩĩmwĩrĩ.—1 Tim. 6:9, 10.

Akĩonania bata wa gwaka arĩa angĩ, mũtũmwo Paulo atũhatĩrĩirie tũtigatuagĩre kana kũhũthia Mũkristiano ũrethema ũndũ mũna nĩ ũndũ wa ‘kũnyihĩrũo nĩ wĩtĩkio,’ tondũ wa kwaga gũtaũkĩrũo biũ nĩ wĩyathi wa Gĩkristiano. Nĩguo ndeereti citũ ciake arĩa angĩ, no mũhaka twĩcirie ũhoro wa maũndũ mao na gĩkĩro kĩa ũkũri wao wa kĩĩroho. Na githĩ to ũkorũo ũrĩ ũndũ wa kĩeha mũndũ ‘gwĩka mũrũ kana mwarĩ wa Ithe witũ ũndũ wa kũmũgũithia, kana wa kũmũhĩngithia’!—Rom. 14:1-4, 13, 19.

Arĩa marahiũrania na mathĩna maritũ—ta mũrimũ mũru—nĩ mekagĩrũo ngoro nĩ ndeereti cia kũmaaka. Mũndũ ũrĩ na thĩna ta ũcio no kũhoteke nĩ erutanagĩria mũno nĩguo akorũo mĩcemanio-inĩ. Arĩa moĩ thĩna wake no mamũrie: “Ũraigua atĩa?” Hatarĩ nganja nĩ arĩkenagĩra kũrũmbũiyo ũguo. O na kũrĩ ũguo, no gũkorũo ũndũ ũrĩa ũngĩmwĩkĩra ngoro mũno ti kwarĩrĩria mũrimũ wake. Ciugo cia kũmũgathĩrĩria no imũcanjamũre mũno. Hihi nĩ wonaga wendo ũrĩa akoragwo naguo harĩ Jehova na ũkirĩrĩria wake hĩndĩ ya mathĩna? Hihi nĩ wĩkagĩrũo ngoro agĩcokia ciũria mĩcemanio-inĩ? Githĩ to ũkorũo ũrĩ ũndũ wa gwaka makĩria kũmũgwetera mohoti make na maũndũ marĩa ahingagia kĩũngano-inĩ handũ ha kũgweta mawathe make?—1 Thes. 5:11.

Nĩguo ndeereti citũ ikorũo irĩ cia gwaka, harĩ bata makĩria gwĩciria ũrĩa Jehova onaga ũndũ ũrĩa tũrarĩrĩria. Thĩinĩ wa Isiraeli ya tene, arĩa maanugunĩkagĩra arĩa Jehova aahũthagĩra na magateta nĩ ũndũ wa maana, nĩ maaherithirio nĩ Ngai. (Ndar. 12:1-16; 21:5, 6) Tuonanagia kũna atĩ nĩ tũgunĩkĩte nĩ ngerekano icio rĩrĩa tũrahe athuri gĩtĩo na tũgakenera irio cia kĩĩroho iria tũheagwo kũgerera ngombo ĩrĩa ĩĩhokekete na njũgĩ.—1 Tim. 5:17.

Tũrĩ na Akristiano arĩa angĩ, ti kaingĩ twagaga maũndũ mega ma kwaria. O na kũrĩ ũguo, angĩkorũo ndeto cia mũndũ itiraaka, oya ikinya rĩa mbere gũcenjia ndeereti ĩyo ĩtuĩke ya gwaka.

Tũkĩhunjia, tũkĩruta mĩario, kana tũgĩtereta na Akristiano arĩa angĩ, rekei tũhũthagĩre ũtaũku nĩguo mũthithũ-inĩ wa ngoro citũ kuumage “ciugo iria ciagĩrĩire cia kũguna andũ hĩndĩ ĩrĩa mabataire, nĩguo itũme arĩa maciiguaga magĩage na Wega wa Ngai.”—Ef. 4:29.