Kũhũthĩra Wega Indo Cia Kuonereria

WAGĨRĨIRŨO kũhũthĩra indo cia kuonereria ũkĩrutana nĩkĩ? Gwĩka ũguo no kũgaacĩrithie ũrutani waku makĩria. Jehova Ngai na Jesu Kristo nĩ mahũthĩrĩte indo cia kuonereria, na no twĩrute nao. Indo cia kuonereria ciahũthĩrũo hamwe na ciugo cia gũtaarĩria, ndũmĩrĩri ĩiyũkagio nĩ maitho na matũ. Gwĩka ũguo no gũteithie kũnyita meciria ma athikĩrĩria aku na gwĩkĩre ũndũ hinya. Ũngĩhũthĩra atĩa indo cia kuonereria ũkĩhunjia ũhoro ũrĩa mwega? Ũngĩtigĩrĩra atĩa atĩ nĩ ũracihũthĩra wega?

Ũrĩa Arutani Arĩa Anene Mahũthĩrĩte Indo cia Kuonereria. Jehova akĩrutana maũndũ ma bata aahũthagĩra indo cia kuonereria na njĩra ĩtangĩriganĩra na ihenya. Ũtukũ ũmwe eerire Iburahimu oime nja akĩmwĩra: “Ta tiira maitho, ũbare igũrũ, ũtare njata, okorũo wakĩhota gũcitara . . . Ũguo noguo mbeũ yaku ĩkaigana.” (Kĩam. 15:5) O na gũtuĩka maitho-inĩ ma andũ ũndũ ũrĩa eerĩirũo nĩ ũngĩonekire ta ũtangĩhoteka-rĩ, Iburahimu nĩ aagucĩrĩirio mũno na akĩgĩa na wĩtĩkio harĩ Jehova. Hĩndĩ ĩngĩ, Jehova eerire Jeremia athiĩ nyũmba-inĩ ya mũũmbi wa indo cia rĩũmba, aingĩre harĩa hoombagĩrũo erorere mũndũ ũcio agĩkũmbania ndoro. Githĩ ũcio ti ũndũ ũtangĩriganĩra atĩ Mũũmbi nĩwe ũkoragwo na ũnene igũrũ rĩa andũ! (Jer. 18:1-6) Ningĩ nĩ ũkuona ta Jona angĩariganĩirũo nĩ ũrutani wĩgiĩ tha ũrĩa Jehova aamũrutire akĩhũthĩra rũũngũ? (Jona 4:6-11) Jehova o na nĩ eeraga anabii ake mahũthĩre indo imwe njagĩrĩru nĩguo monanie ndũmĩrĩri cia ũrathi. (1 Ath. 11:29-32; Jer. 27:1-8; Ezek. 4:1-17) Hema ya gũtũnganwo hamwe na hekarũ, cio nyene nĩ cionereria cia gũtũteithia tũtaũkĩrũo nĩ maũndũ ma igũrũ. (Ahib. 9:9, 23, 24) Ningĩ Ngai nĩ aahũthĩrire cioneki nyingĩ gũkinyĩria andũ ndũmĩrĩri cia bata.—Ezek. 1:4-28; 8:2-18; Atũm. 10:9-16; 16:9, 10; Kũg. 1:1.

Jesu aahũthĩrire indo cia kuonereria atĩa? Rĩrĩa Afarisai na arũmĩrĩri a kĩama kĩa Herode maageragia kũmũcarĩria mahĩtia mĩario-inĩ yake, aametirie ciringi na akĩmonia mbica ya Kaisari ĩrĩa yarĩ ho. Agĩcoka agĩtaarĩria atĩ indo cia Kaisari ciagĩrĩirũo kũrĩhwo Kaisari nacio indo cia Ngai irĩhwo Ngai. (Mat. 22:19-21) Akĩrutana igũrũ rĩgiĩ gũtĩa Ngai na indo iria ciothe tũrĩ nacio, Jesu onanĩrĩirie mũtumia mũthĩni wa ndigwa hekarũ-inĩ ũrĩa wahothire kĩrĩa gĩothe aarĩ nakĩo—tũthendi twĩrĩ. (Luk. 21:1-4) Narĩo hĩndĩ ĩngĩ akĩhũthĩra ngerekano ya kaana kanini kuonania bata wa wĩnyihia, na kwaga mwĩtũgĩrio. (Mat. 18:2-6) Ningĩ nĩ onanĩrĩirie ũrĩa wĩnyihia ũtariĩ, na njĩra ya gũthambia arutwo ake magũrũ.—Joh. 13:14.

Njĩra cia Kũhũthĩra Indo cia Kuonereria. Ngũrani na ũrĩa Jehova eekaga, tũtingĩhota kũhũthĩra cioneki kwaranĩria na andũ. O na kũrĩ ũguo, mabuku ma Aira a Jehova nĩ makoragwo na mbica nyingĩ cia kũgucĩrĩria. Cihũthĩre gũteithia andũ arĩa makenagio nĩ ũhoro ũrĩa mwega mahũre mbica ya Paradiso ĩrĩa ĩranĩirũo Kiugo-inĩ kĩa Ngai. Ũkĩruta mũndũ Bibilia, no ũmwĩre arore mbica ĩrĩa ĩkonainie na kĩrĩa ũramũruta na ũmũrie arona ũndũ ũrĩkũ. Rĩrĩa mũnabii Amosi onagio cioneki imwe, Jehova aamũririe: “Amosi, nĩ kĩ kĩu ũkuona?” (Amos 7:7, 8; 8:1, 2) No ũrie ciũria ta icio ũkĩenda andũ mone mbica iria irongoreirio kũhũthĩka ta indo cia kuonereria cia kũrutana.

Ũngĩandĩka kana ũhũthĩre mĩcoro kuonania mahinda marĩa maũndũ ma mwanya meekĩkire mathingatanĩte, no ũteithie andũ mataũkĩrũo wega nĩ morathi ta “mahinda mũgwanja” marĩa magwetetwo nĩ Danieli 4:16 na “ciumia mĩrongo mũgwanja” cia Danieli 9:24. Indo ta icio cia kuonereria nĩ ikoragwo mabuku-inĩ mamwe maitũ.

Hĩndĩ ya wĩruti wanyu wa Bibilia wa famĩlĩ, mũkĩarĩrĩria maũndũ ta hema ya gũtũnganwo, hekarũ ya Jerusalemu, na hekarũ ĩrĩa Ezekieli onirio thĩinĩ wa kĩoneki no mũtaũkĩrũo na njĩra hũthũ mũngĩhũthĩra mbica kana mĩcoro. Indo icio no cioneke thĩinĩ wa Insight on the Scriptures, thĩinĩ wa ũhoro muongerere Bibilia-inĩ ya New World Translation of the Holy Scriptures—With References, na icunjĩ-inĩ ngũrani cia Mũrangĩri.

Hũthagĩrai mabu mũgĩthoma Bibilia na famĩlĩ yaku. Rorai njĩra ĩrĩa Iburahimu aagereire kuuma Uru nginya Harani erekeire Betheli. Thuthuria njĩra ĩrĩa Aisiraeli maagereire rĩrĩa moimaga Misiri na magĩthiĩ Bũrũri wa Kĩĩranĩro. Cariai gĩcigo kĩrĩa rũrĩrĩ o rũrĩrĩ rwa Isiraeli rũaheirũo gĩtuĩke igai. Rorai ũrĩa bũrũri ũrĩa Suleimani aathamakaga waiganaga. Rũmĩrĩrai njĩra ĩrĩa Elija aagereire agĩĩthara kuuma Jezireeli nginya werũ-inĩ ũrĩa warĩ mbere ya Biri-shiba, rĩrĩa Jezebeli eendaga kũmũraga. (1 Ath. 18:46–19:4) Caria matũũra marĩa Jesu aahunjagia. Rũmĩrĩra ngʼendo cia Paulo ta ũrĩa ibuku rĩa Atũmwo rĩtaarĩirie.

Indo cia kuonereria nĩ iteithagia mũndũ gũtaarĩria arutwo a Bibilia maũndũ ma kĩũngano. No wonie mũrutwo waku mũtaratara mũcabe wa igomano na irũrũngano na ũmũtaarĩrie maũndũ marĩa marutanagwo kuo. Andũ aingĩ managucĩrĩrio nĩ gũceera thĩinĩ wa Nyũmba ya Ũthamaki kana wabici-inĩ ya rũhonge ya Aira a Jehova. Ĩyo no ĩkorũo ĩrĩ njĩra njega ya gũteithia andũ mataũkĩrũo wega nĩ wĩra witũ na muoroto waguo. Ũgĩceria mũndũ thĩinĩ wa Nyũmba ya Ũthamaki, mũtaarĩrie ũrĩa ĩrĩ ngũrani na nyũmba ingĩ cia kũhoera. Tĩtĩrithia atĩ nĩ kũndũ kwagĩrĩru gwa kwĩrutĩra maũndũ ma kĩĩroho. Muonie indo iria ikonainie makĩria na wĩra witũ wa kũhunjia—harĩa tuoyaga mabuku, mabu cia kũrĩa tũhunjagia, na mathandũkũ ma mĩhothi (mũgarũ na tũkabu twa kũngania mĩhothi).

Angĩkorũo kwanyu nĩ kũrĩ na video ihaarĩirio nĩ Kĩama Kĩrĩa Gĩtongoragia, cihũthĩre gũteithia arutwo mehoke Bibilia, mamenye wega wĩra wa Aira a Jehova, na gwĩkĩra andũ ngoro matũũre kũringana na motaaro ma Bibilia.

Kũhũthĩra Indo cia Kuonereria Ũkĩarĩria Athikĩrĩria Aingĩ. Indo cia kuonereria cingĩhaarĩrio wega na ihũthĩrũo na njĩra njega, no ikorũo na moimĩrĩro mega harĩ kũruta gĩkundi kĩnene kĩa andũ. Nĩ gũkoragwo na indo ta icio ngũrani ngũrani kuuma kũrĩ ngombo ĩrĩa ĩĩhokekete na njũgĩ.

Icunjĩ cia wĩruti cia Mũrangĩri kaingĩ nĩ ikoragwo na mbica irĩ cio indo cia kuonereria iria ingĩhũthĩrũo nĩ ũrĩa ũratongoria gwĩkĩra hinya maũndũ ma bata. Ũguo noguo kũrĩ mabuku-inĩ marĩa mahũthagĩrũo hĩndĩ ya Wĩruti wa Bibilia wa Kĩũngano.

Matemo mamwe ma mĩario ya andũ othe no mabatare mwaria ahũthĩre indo cia kuonereria agĩtaarĩria maũndũ. O na kũrĩ ũguo, kaingĩ ũguni ũrĩa mũnene umanaga makĩria na kũhũthĩra Bibilia, tondũ nĩyo athikĩrĩria aingĩ makoragwo nayo. Angĩkorũo nĩ ũkahũthĩra mbica kana maũndũ makuhĩ wandĩkĩte ma gũtĩtĩrithia ũndũ ũmwe kana maũndũ maigana ũna ma bata mĩario-inĩ yaku, tigĩrĩra atĩ kĩndũ kĩu gĩa kuonereria nĩ gĩkoneka (kana gĩthomeke) nĩ arĩa magakorũo maikarĩte thutha. Indo ta icio ciagĩrĩirũo kũhũthĩrũo na ũigananĩru.

Muoroto witũ wa kũhũthĩra indo cia kuonereria tũkĩaria na tũkĩrutana ti gũthekia athikĩrĩria. Kĩndũ gĩa kuonereria kĩrĩa kĩagĩrĩru kĩahũthĩrũo, kĩagĩrĩirũo gũteithia athikĩrĩria mahũre mbica ya ũndũ ũrĩa ũrabatara gwĩkĩrũo hinya. Indo ta icio cihingagia muoroto wega rĩrĩa ciateithia harĩ gũtaarĩria ũndũ, igatũma ũtaũkĩre andũ na njĩra hũthũ, kana rĩrĩa cionania ũira mũrũmu wĩgiĩ ũndũ mũna ũrĩa ũrarĩrĩrio. Kĩndũ gĩa kuonereria kĩrĩa kĩagĩrĩru kĩngĩhũthĩrũo wega, no kĩhutie ngoro mũno ũũ atĩ kĩo kĩene na ũrutani wakĩo nĩ irĩririkanagwo mĩaka mĩingĩ.

Ũhoti wa kũigua na kuona nĩ ikoragwo na itemi rĩa bata harĩ kwĩruta. Ririkana ũrĩa cihũthĩrĩtwo nĩ Arutani arĩa anene, na wĩrutanĩrie kwĩgerekania nao harĩ gũkinyĩra ngoro cia andũ.