Mĩnyamaro Yothe Ĩrĩ Hakuhĩ Gũthira!

Rĩngĩ na rĩngĩ thĩinĩ wa mũtũũrĩre waku no gũkorũo nĩ wĩyũrĩtie, ‘Gĩtũmi kĩa mĩnyamaro ĩno yothe nĩ kĩĩ? ’ Ihinda rĩa mĩaka ngiri nyingĩ, famĩlĩ cia andũ nĩ inyamarĩkĩte mũno kuuma kũrĩ mbaara, mathĩna, wanangĩki, ũgeri ngero, wagi wa kihooto, mĩrimũ, na gĩkuũ. Mĩaka ĩyo igana mĩhĩtũku nĩgũkoretwo na mĩnyamaro mĩingĩ gũkĩra ihinda rĩothe rĩrĩa rĩhĩtũku. Mĩnyamarĩko ĩyo yothe hihi kũrĩ hĩndĩ ĩgathira?

Ĩĩni, icokio rĩa kũhoreria ngoro mũno nĩ atĩ ũũ ũgwĩkĩka narua! Biblia, Kiugo kĩa Ngai yuugĩte: “Ũrĩa mwaganu acoke aagwo . . . No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.” Magatũũra ihinda rĩigana atĩa? “Arĩa athingu nĩo makagaya thĩ, na gũtũũra mamĩtũũre o nginya tene.”​​—⁠Thaburi 37:​10, 11, 29.

Ngai aarĩkia kũnina waganu na mĩnyamaro-rĩ, thĩ ĩkagarũrũo ĩtuĩke paradiso. Hĩndĩ ĩyo andũ makaahota gũtũũra tene na tene me na ũgima mwega wa mwĩrĩ na gĩkeno. Kiugo kĩa Ngai gĩtwĩraga ũũ: “[Ngai] nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo.”​​—⁠Kũguũrĩrio 21:​4.

Thĩinĩ wa thĩ ĩyo njerũ-rĩ, o na akuũ nĩmakariũkio magĩe na irathimo icio: “Kwĩ hĩndĩ gũkariũkio andũ arĩa athingu o na arĩa matarĩ athingu.” (Atũmwo 24:15) Na nĩ kĩo gĩtũmi Jesu Kristo erire mwĩhia ũmwe werirĩte ũũ: ‘Nĩ ũgakorũo na niĩ thĩinĩ wa Paradiso.’​​—⁠Luka 23:43.

Mĩnyamaro Yambĩrĩirie Nĩkĩ?

Na tondũ Ngai aatanyĩte andũ magĩe na ihinda rĩega rĩrĩa rĩũkĩte-rĩ, nĩkĩ gĩagĩtũmire etĩkĩrie mĩnyamaro yambĩrĩrie? Nĩ kĩĩ gĩtũmĩte amĩtĩkĩrie ihinda iraya ũguo?

Hĩndĩ ĩrĩa Ngai ombire Adamu na Hawa-rĩ, aamombire marĩ akinyanĩru mĩĩrĩ na meciria. Aamaigire mũgũnda wa paradiso na akĩmahe wĩra wa gũtũma makene. Biblia yuugĩte ũũ: “Ngai agĩkĩona atĩ kĩndũ o gĩothe kĩrĩa ombĩte nĩ kĩega mũno.” (Kĩambĩrĩria 1:​31) Korũo nĩ maathĩkĩire Ngai-rĩ, nĩ mangĩaciarire ciana nginyanĩru, na thĩ yothe ĩngĩatuĩkire paradiso, kũrĩa andũ mangĩatũũrire marĩ na thayũ na gĩkeno tene na tene.

Ngai nĩ ekĩrire thĩinĩ wa Adamu na Hawa kĩheo kĩa magegania gĩa gwĩthurĩra wega na ũũru kĩrĩ gĩcunjĩ kĩa mũũmbĩre wa andũ. Matiombirũo ta machini ĩtarĩ meciria. No ningĩ-rĩ, gĩkeno kĩao gĩa gũthiĩ na mbere kĩehocetie ũrĩa mangĩahũthĩrire wĩyathi wao na njĩra njega​​—⁠ya gwathĩkĩra watho wa Ngai. O ta ũrĩa Ngai oigaga: “Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera.” (Isaia 48:17) Kũhũthĩra wĩyathi ũcio na njĩra njũru kwamareheire ũgwati, tondũ andũ matiombĩtwo mahote gũtoria mĩtũũrĩre yao matehocetie he Ngai. Biblia yuugaga ũũ: “Gũtirĩ mũndũ wa gũkũ thĩ ũngĩhota gwĩthondekera mĩthiĩre yake we mwene, o na kana arũngĩrĩrie makinya make njĩra-inĩ ĩrĩa yerekereire.”​​—⁠Jeremia 10:23.

Ũhoro wa kĩeha nĩ atĩ, aciari aitũ a mbere meciririe atĩ no mahote gũtoria matehocetie he Ngai. No rĩrĩa meyeheririe wathani-inĩ wa Ngai, ndaigana kũmarũmbũiya rĩngĩ, ũndũ-inĩ wĩgiĩ ũkinyanĩru wao. Kwoguo makĩambĩrĩria kũhinyĩrĩrĩka na mũthia-inĩ magĩkũra na magĩgĩkua. Kũringana na watho wa mũciarĩre-rĩ, tũgaĩte kwaga gũkinyanĩra na gĩkuũ.​​—⁠Aroma 5:​12.

Kĩũria Kĩrĩa Kĩnene Nĩ ​​—⁠Wathani

Nĩkĩ kĩagiririe Ngai anine Adamu na Hawa na ambĩrĩrie rũciaro rũngĩ rwa andũ angĩ erĩ? Nĩ tondũ wathani wa Ngai wa igũrũ na thĩ, kĩhoto gĩake gĩa gwathana nĩ gĩakararĩtio. Kĩũria kĩarĩ gĩkĩ, Nũũ warĩ na kĩhooto gĩa gwathana na nĩ wathani waũ warĩ wa ma? Na njĩra ya kũongerera-rĩ, andũ nĩ mangĩahotire kwĩyatha wega mategwathwo nĩ Ngai? Na ũndũ wa kũmetĩkĩria ihinda rĩiganu rĩa kũgeria wĩyathi wao biũ, Ngai nĩ angĩahotire kũonania wega na njĩra ĩtarĩ ya gũcokerũo kana gũkorũo watho-inĩ wake nĩguo wagĩrĩire kana nĩ wao o ene. Ihinda rĩrĩa rĩtĩkĩrĩtio nĩ ĩraihu ũũ atĩ andũ nĩ mahotete kũgeria mĩthemba yothe ya ũteti, maũndũ ma mũingĩ, biacara, mũtabarĩre wa ndini matekwĩhocia ũtongoria-inĩ wa Ngai.

Uumĩrĩro wa maũndũ macio ũkoretwo ũrĩ atĩa? Mĩaka ngiri nyingĩ ya historia ya mũndũ ĩgũtuonia atĩ gũkoretwo kũrĩ na mĩnyamaro mĩingĩ makĩria. Thĩinĩ wa mĩaka igana mĩhĩtũku rũciaro rwa andũ rũkoretwo rũhatĩkĩtwo nĩ mĩnyamaro mĩũru makĩria. Milioni nyingĩ cioragirũo hĩndĩ ya mbaara ya kerĩ ya thĩ. Makĩria ya andũ milioni 100 nĩ moragĩtwo mbaara-inĩ. Uuni wa watho na ũhũthĩri wa hinya nĩ maũndũ ma ndũire. Ndawa cia kũrĩithia andũ irehete mũthiro. Mĩrimũ ya ngomanio ĩrathiĩ na mbere gũtheerema. Makũmi ma mamilioni makuaga o mwaka o mwaka nĩ ngʼaragu na mĩrimũ. Mũtũũrĩre wa famĩlĩ na mĩtugo ya wagi thoni nĩ yongererekete kũndũ guothe. Gũtirĩ thirikari ya andũ o na ĩmwe ĩngĩheeana macokio ma mathĩna maya. Gũtirĩ o na ĩmwe ĩhotete kũnina ũkũrũ, mĩrimũ, na gĩkuũ.

Mũikarĩre wa andũ no ta ũrĩa Biblia yaarathire ũndũ wĩgiĩ mahinda maitũ. Kiugo kĩa Ngai kĩonanĩtie ihinda rĩrĩ riitũ tũrĩ “matukũ marĩa ma kũrigĩrĩria” ma mũtabarĩre ũyũ wa maũndũ marĩ “mahinda ma ũgwati.” O ta ũrĩa Biblia yuugĩte, ‘andũ arĩa aaganu na ahenania magakĩrĩrĩria kwagana.’​​—⁠2 Timotheo 3:​1-5, 13.

Mĩnyamaro Ĩrĩ Hakuhĩ Gũthira

Ũira wothe ũkuonania atĩ tũkuhĩrĩirie mũthia wa mũndũ wa kũgeria maũndũ mothe ma kwĩnina na ũndũ wa kũrega wathani wa Ngai. Nĩ kuonetwo wega atĩ wĩyathi wa andũ hatarĩ Ngai ndũrĩ hingo ũngĩtoria. No wathani wa Ngai wiki tu ũngĩrehe thayũ, gĩkeno, ũgima mwega wa mwĩrĩ, na muoyo wa tene na tene. Kwoguo gũkirĩrĩrio kwa waganu na mĩnyamaro nĩ Jehova kũrĩ hakuhĩ mũthia. O ica ikuhĩ Ngai nĩ arĩingĩrĩra maũndũ ma andũ na ũndũ wa kwananga mũtabarĩre wao wa maũndũ ũtarĩ mwagĩrĩru.

Ũnabii wa Biblia uugĩte ũũ: “Hĩndĩ ya athamaki acio-rĩ, [wathani ũrĩa ũrĩ ho rĩu wa andũ] nĩguo Ngai-wa-Igũrũ akahanda ũthamaki [igũrũ] ũrĩa ũtagacoka gũthario . . . no nĩ kũmemenda ũkamemenda mothamaki macio mangĩ, [mothamaki marĩa marĩ ho rĩu] ũmanine biũ, naguo ũtũũre wĩhandĩte tene na tene.” (Danieli 2:​44) Gũtetera kwa wathani wa Jehova, kĩhoto gĩake gĩa gwathana, kũgerera Ũthamaki-inĩ wake wa igũrũ nĩguo ũrutani ũrĩa mũnene wa Biblia. Akĩonanĩrĩria rũri rũrĩa rũnene rwa “matukũ ma kũrigĩrĩria,” Jesu oigire ũũ: “Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.”​​—⁠Mathayo 24:14.

Rĩrĩa mũthia ũgakinya-rĩ, nũũ ũkahonoka? Biblia yuugaga ũũ: “Nĩ gũkorũo andũ arĩa arũngĩrĩru nĩo a gũtũũra bũrũri, acio akinyanĩru-rĩ, nĩo a gũgatigara kuo. No andũ arĩa aaganu nĩ kũrindũrũo makarindũrũo bũrũri.” (Thimo 2:​21, 22) Andũ arĩa arũngĩrĩru nĩ arĩa merutaga wendi wa Jehova na makawĩka. Jesu Kristo oigire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.” (Johana 17:3) Ĩĩni, “na thĩ nĩ gũthira ĩrathira . . . , no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene.”​​—⁠1 Johana 2:​17.

O honanĩtio ũndũ ũngĩ-rĩ, Maandĩko marĩa monanitio haha thĩinĩ nĩ kuuma The Bible in Kikuyu caba ya 1965.