GĨCUNJĨ KĨA 25

Ingĩhota Atĩa Gũtooria Mũtugo wa Gwĩkina?

“Ndaambĩrĩirie gwĩkina ndĩ na mĩaka ĩnana. Thutha-inĩ nĩ nderutire mawoni ma Ngai megiĩ mũtugo ũcio. Nĩ ndaiguaga ũũru mũno rĩrĩa rĩothe ndagwa igerio-inĩ rĩu rĩa gwĩkina. Ndioonaga ta Ngai angĩenda mũndũ ta niĩ.”—Luiz.

MŨNDŨ arĩ mĩaka-inĩ ya ũtinĩnja, merirĩria ma ngomanio nĩ makoragwo na hinya mũno. Nĩ ũndũ ũcio, no wambĩrĩrie mũtugo wa gwĩkina.a Andũ aingĩ moigaga atĩ ũcio ti ũndũ mũnene. Moigaga atĩrĩ, “Gũtakĩrĩ mũndũ ũragerũo ngero.” O na kũrĩ ũguo, harĩ na gĩtũmi kĩega gĩa gwĩthema mũtugo ũcio. Mũtũmwo Paulo aandĩkire ũũ: “Nĩ ũndũ ũcio-rĩ, ũragai ciĩga cia mĩĩrĩ yanyu . . . ũhoro-inĩ wĩgiĩ . . . merirĩria moru ma ngomanio.” (Akolosai 3:5) Gwĩkina gũtiũragaga merirĩria moru ma ngomanio no nĩ gũtũma gũtũmaga mongerereke. Makĩria ma ũguo, ta wĩcirie ũhoro wa maũndũ maya marũmĩrĩire:

● Mũtugo wa gwĩkina ũtũmaga mũndũ akorũo arĩ na mwĩyendo. Kwa ngerekano, rĩrĩa mũndũ arekina, eciragia o ũrĩa egwĩkenia we mwene.

● Mũndũ ũkoragwo na mũtugo wa gwĩkina no ambĩrĩrie kuona ũrĩa marĩ ndũgũ nake arĩ o kĩndũ gĩa kũmũhingĩria merirĩria make ma mwĩrĩ.

● Mwĩcirĩrie wa mwĩyendo ũrĩa ũkũragio nĩ mũtugo wa gwĩkina no ũtũme mũndũ age kũigania ngomanio kĩhiko-inĩ gĩake.

Handũ ha kũgwa mũtugo-inĩ wa gwĩkina, wĩrutanĩrie kũgirĩrĩria merirĩria macio. (1 Athesalonike 4:4, 5) Nĩguo ũhote gwĩka ũguo, Bibilia yonanagia atĩ nĩ wagĩrĩirũo gwĩthemaga maũndũ marĩa mangĩtũma ũgĩe merirĩria ma ngomanio. (Thimo 5:8, 9) Ĩ angĩkorũo nĩ ũmenyerete mũtugo wa gwĩkina? No gũkorũo nĩ ũgeretie gũtiga no ũkaremwo. Wahota kuona ta ũtangĩhota kũgarũrĩra na wĩcirie atĩ gũtirĩ hĩndĩ ũkaahota gũtũũra kũringana na ithimi cia Ngai. Ũguo nĩguo kamwana kamwe getagwo Pedro keeyonaga. Koigaga ũũ: “Ingĩacokereire mũtugo ũcio, ndaiguaga ũũru mũno. Ndoonaga ta itangĩoherũo mehia macio. Ndaaremagwo nginya nĩ kũhoya.”

Angĩkorũo ũguo nĩguo ũraigua, ndũgakue ngoro. Ũrĩ o na mwĩhoko. Andũ aingĩ ethĩ, nginya andũ agima, nĩ matooretie mũtugo ũcio wa gwĩkina. O nawe no ũhote gũtooria!

Rĩrĩa Ũritũhĩirũo nĩ Kũigua Ũhĩtĩtie

Kaingĩ andũ arĩa makoragwo na mũtugo wa gwĩkina nĩ maiguaga maritũhĩirũo nĩ kũigua mahĩtĩtie. Hatarĩ nganja, tũngĩgĩa ‘kĩeha na njĩra ya ũngai,’ ũndũ ũcio no ũtũhe hinya wa gũtooria mũtugo ũcio. (2 Akorintho 7:11) No kĩeha gĩkĩrĩtie njano no gĩkorũo na moimĩrĩro moru. No gĩtũme ũigue ũkuĩte ngoro nginya wage hinya wa kũrũa na mũtugo ũcio.—Thimo 24:10.

Kwoguo, geria kũrora maũndũ ũrĩa matariĩ kũna. Gwĩkina nĩ mũtugo ũtarĩ mũtheru. No ũtume ũkorũo ũrĩ “ngombo [ya] merirĩria na ikeno itiganĩte,” na nĩ ũtũmaga mũndũ agĩe na meciria matarĩ matheru. (Tito 3:3) O na kũrĩ ũguo, mũtugo wa gwĩkina ti mũthemba wa ngomanio itagĩrĩire, ta ngomanio gatagatĩ ka andũ matahikanĩtie. (Judasi 7) Angĩkorũo ũrĩ na mũtugo wa gwĩkina, ndũgatue atĩ nĩ wĩkĩte rĩhia rĩtangĩohanĩrũo. Ũndũ ũrĩa wa bata nĩ kwĩgirĩrĩria na ndũkanakue ngoro ũtige kũrũa na mũtugo ũcio!

Nĩ ũndũ mũhũthũ kũũrũo nĩ hinya rĩrĩa wacokerera mũtugo ũcio. No rĩrĩa wagwa mũtugo-inĩ ũcio, ti kuuga atĩ wĩ mũndũ mwaganu. Kwoguo ndũgakue ngoro. Handũ ha ũguo, tuĩria ũndũ ũrĩa ũtũmĩte ũcokerere mũtugo ũcio wa gwĩkina, na wĩtheme ũndũ ũcio nĩguo ndũkagwe mũtugo-inĩ ũcio rĩngĩ.

Caragia mahinda ma gwĩcũrania ũhoro wĩgiĩ wendo na tha cia Ngai. Daudi mwandĩki wa Thaburi, ũrĩa wekĩte maũndũ mamwe moru aaugire ũũ: “O ta ũrĩa mũthuri aiguagĩra ariũ ake tha, Jehova nĩ aiguagĩra tha arĩa mamwĩtigĩrĩte. Tondũ nĩ oĩ wega ũrĩa tũmbĩtwo, akaririkana atĩ tũrĩ o rũkũngũ.” (Thaburi 103:13, 14) Kwoguo, Jehova nĩ oĩ atĩ tũtirĩ akinyanĩru, na akoragwo ‘ehaarĩirie kuohanĩra.’ (Thaburi 86:5) O na kũrĩ ũguo, nĩ endaga twĩrutanĩrie biũ kũmwathĩkĩra. Kwoguo-rĩ, nĩ makinya marĩkũ ũngĩoya nĩguo ũhote gũtooria mũtugo ũcio?

Thuthuria maũndũ maku ma gwĩkenia. Hihi nĩ wĩroragĩra thenema kana tabarĩra cia TV kana ũgaceerera website ciarahũraga merirĩria ma ngomanio? Mwandĩki wa Thaburi aahoire Ngai ũũ: “Hũgũra maitho makwa matige kũrora ũndũ wa tũhũ.”b—Thaburi 119:37.

Wĩringĩrĩrie kũiga meciria maku harĩ maũndũ mangĩ. Mũkristiano ũmwe wĩtagwo William aaheanire ũtaaro ũyũ: “Ũtanathiĩ toro, thomaga ũhoro uumanĩte na Bibilia. Nĩ ũndũ wa bata mũno kũrĩkagĩrĩria mũthenya waku na ũndũ wa kĩĩroho.”—Afilipi 4:8.

Arĩrĩria thĩna waku na mũndũ ũngĩ. No ũigue ũconokete kwarĩrĩria na mũndũ ũngĩ ũhoro wĩgiĩ thĩna waku. No gwĩka ũguo no gũgũteithie gũtooria mũtugo ũcio! Ũguo nĩguo Mũkristiano ũmwe wĩtagwo David aamenyire. Aaugire ũũ: “Nĩ ndaaririe na baba ũhoro wĩgiĩ thĩna wakwa. Ndikaariganĩrũo nĩ ũrĩa aanjĩrire. Aanyũmĩrĩirie na akĩnjĩra ũũ akenete, ‘Nĩ wangenia mũno.’ Nĩ aamenyire nĩ ndaabatarire gũkorũo na ũmĩrĩru nĩguo ndĩmwĩre ũndũ ũcio. Ciugo icio nĩ cianjĩkĩrire hinya mũno, na ngĩgĩa wendi wa kwĩrutanĩria o na makĩria.

“Baba aacokire akĩnyonia maandĩko maigana ũna maandeithirie kuona atĩ ‘ndiorĩte mũno,’ agĩcoka akĩnyonia maandĩko mangĩ nĩguo atigĩrĩre atĩ nĩ ndataũkĩrũo nĩ ũritũ wa mũtugo ũrĩa ndaarĩ naguo mũũru. Aanjĩrire ndĩrutanĩrie gũtiga mũtugo ũcio, na thutha wa ihinda rĩigana ũna nĩ tũkaarĩrĩria ũndũ ũcio rĩngĩ. Aanjĩrire ndigakue ngoro ingĩgwa mũtugo-inĩ ũcio rĩngĩ, no ndĩrutanĩrie kwĩgirĩrĩria ihinda iraiharaihu thutha ũcio.” Ũndũ ũcio wateithirie David atĩa? Augaga ũũ: “Nĩ ndaagunĩkire mũno nĩ ũndũ wa kũmenyithia mũndũ ũngĩ thĩna wakwa na gwĩtĩkĩra andeithie.”c

[Ũhoro wa magũrũ-inĩ]

RĨANDĨKO RĨA MŨTHINGI

“Ũragĩra merirĩria ma wĩthĩ, ĩndĩ ũthingatage ũthingu, wĩtĩkio, wendo, thayũ, ũrĩ hamwe na arĩa makayagĩra Mwathani marĩ na ngoro theru.”—2 Timotheo 2:22.

ŨNDŨ ŨNGĨKA

Hoya merirĩria macio matanongerereka. Ĩra Jehova Ngai akũhe “hinya ũrĩa ũkĩrĩte wa ndũire” nĩguo ũhote kũhiũrania na igerio.—2 Akorintho 4:7.

HIHI NĨ ŨĨ . . . ?

Mũndũ o wothe ũtegiragĩrĩria no atoorio nĩ merirĩria make ma ngomanio. No mũndũ mũgimaru nĩ ahotaga kwĩgirĩrĩria o na rĩrĩa arĩ wiki.

MAKINYA MARĨA ŨNGĨOYA!

Nĩguo hote kũiga meciria makwa harĩ maũndũ matheru, ngwĩka ũũ ․․․․․

Handũ ha kũgwa mũtego-inĩ wa merirĩria moru, ngwĩka ũũ ․․․․․

Ũndũ ũrĩa ingĩenda kũria aciari akwa wĩgiĩ ũndũ ũyũ nĩ ․․․․․

ŨGWĨCIRIA ATĨA?

● Nĩkĩ nĩ ũndũ wa bata kũririkanaga atĩ Jehova akoragwo ‘ehaarĩirie kuohanĩra’?—Thaburi 86:5.

● Tondũ Ngai ũrĩa wakũũmbire ũrĩ na merirĩria ma ngomanio nowe ũkwĩrĩte ũkũrie ngumo ya kwĩgirĩrĩria-rĩ, ũndũ ũcio ũronania akoragwo na ma no ũhote gwĩka atĩa?

Kuuma ndatooria thĩna ũcio, nĩ ndaagĩire thamiri theru mbere ya Jehova, na ndingĩenda gwĩka ũndũ o wothe ũngĩmĩthũkia!’’—Sarah

Ũngĩgwa ũgĩtengʼera, ũguo ti kuuga atĩ ũkũbatara gũtengʼera rĩngĩ kuuma kĩambĩrĩria. Na njĩra o ta ĩyo, gũcokerera mũtugo wa gwĩkina ti kuuga atĩ nĩ waremwo kũũtooria