ŨHORO WA KŨRĨKĨRĨRIA

1, 2. Tũrabatara gũkũria wĩtĩkio nĩkĩ? Heana ngerekano.

WĨTĨKIO. Nĩ kiugo kĩrũgamĩrĩire ngumo njega mũno. O na kũrĩ ũguo, rĩrĩa tuona kana kũigua kiugo kĩu, nĩ wega gwĩciria ũhoro wa kiugo gĩkĩ kĩngĩ: “Narua!” Tũngĩkorũo tũtarĩ na wĩtĩkio, nĩ tũrabatara kũũkũria narua. Na tũngĩkorũo na wĩtĩkio, nĩ tũrabatara kũũgitĩra na kũwĩkĩra hinya narua. Nĩkĩ?

² Ta hũũra mbica ũgĩtuĩkania werũ-inĩ mũnene. Nĩ ũrabatara maĩ mũno. Ũngĩmona, no mũhaka ũmagitĩre matikahũe nĩ ũndũ wa riũa. Ningĩ nĩ ũrabatara gũthiĩ ũkĩongagĩrĩra mangĩ ũndũ mangĩkũigana nginya ũkinye kũrĩa ũrathiĩ. Ũmũthĩ tũratũũra thĩinĩ wa thĩ ĩtonaga bata wa gũthathaiya Jehova, kũrĩa wĩtĩkio ũrĩa wa ma, o ta maĩ macio, nĩ hinya kuoneka, na nĩ ũhiũhaga kũhũa narua o tiga ũgitĩirũo na wongererũo. O ta ũrĩa tũtangĩhota gũtũũra tũtarĩ maĩ, noguo tũtangĩhota gũtũũria ũrata mwega na Jehova tũtarĩ na wĩtĩkio.—Rom. 1:17.

3. (a) Nĩ kĩĩ Jehova atũheete nĩguo tũkũrie wĩtĩkio? (b) Nĩ maũndũ marĩkũ merĩ twagĩrĩirũo nĩ kũririkana?

³ Jehova nĩ oĩ nĩ tũrabatara wĩtĩkio narua, na nĩ oĩ atĩ ti ũndũ mũhũthũ gũkũria na gũtũũria wĩtĩkio ũmũthĩ. Nĩkĩo atũheete cionereria iria tũngĩĩgerekania nacio. Jehova aatongoririe mũtũmwo Paulo kwandĩka ũũ: “Mwĩgerekanagie na andũ arĩa magayagĩrũo maũndũ marĩa meranĩirũo, nĩ ũndũ wa ũrĩa metĩkĩtie na magakirĩrĩria.” (Ahib. 6:12) Na nĩkĩo ithondeka rĩa Jehova rĩtwĩkĩraga ngoro twĩrutanĩrie kwĩgerekania na cionereria cia athuri na atumia ehokeku, ta acio twarĩrĩirie thĩinĩ wa ibuku rĩrĩ. Rĩu twagĩrĩirũo nĩ gwĩka atĩa? Rekei tũririkanage maũndũ maya merĩ: (1) Nĩ tũrabatara gũikaraga tũgĩkagĩra wĩtĩkio witũ hinya; (2) nĩ tũrabatara kũigaga kĩĩrĩgĩrĩro giitũ meciria-inĩ.

4. Shaitani akoretwo arĩ thũ ya wĩtĩkio na njĩra ĩrĩkũ, na nĩkĩ tũtiagĩrĩirũo gwĩtigĩra?

⁴ Ĩkagĩra wĩtĩkio waku hinya. Shaitani nĩ thũ nene ya wĩtĩkio. Mũtongoria ũcio wa thĩ ĩno agarũrĩte mũtabarĩre ũyũ wa maũndũ ũkahaanana na werũ ũrĩa ũigaga wĩtĩkio ũgwati-inĩ. Arĩ na hinya gũtũkĩra. Hihi nĩ twagĩrĩirũo gwĩtigĩra gũkũria wĩtĩkio na kũwĩkĩra hinya? Aca! Jehova nĩ Mũrata mũnene wa arĩa othe makũragia wĩtĩkio wa ma. Atwĩraga tũtikagĩe na nganja, tondũ arĩ hamwe na ithuĩ no tũhote kũregana na Mũcukani na nginya amũingate nĩguo atũũrĩre. (Jak. 4:7) Tũreganaga nake na njĩra ya kũhũthĩra ihinda o mũthenya gwaka wĩtĩkio witũ na kũwĩkĩra hinya. Tũngĩka ũguo atĩa?

5. Athuri na atumia ehokeku arĩa marĩ thĩinĩ wa Bibilia maakũririe wĩtĩkio atĩa? Taarĩria.

⁵ O ta ũrĩa twĩrutĩte ibuku-inĩ rĩrĩ, athuri na atumia arĩa marĩ thĩinĩ wa Bibilia matiaciarirũo marĩ na wĩtĩkio. Ũtũũro wao nĩ woonanirie atĩ maagĩire na wĩtĩkio nĩ ũndũ wa roho mũtheru. (Gal. 5:22, 23) Nĩ maahoire ũteithio, na Jehova aaikarire agĩkĩraga wĩtĩkio wao hinya. Rekei twĩke o ta ũrĩa meekire, tũtekũriganĩrũo atĩ Jehova nĩ aheanaga roho wake kũrĩ arĩa mamũhoya na mageka kũringana na mahoya mao. (Luk. 11:13) Hihi nĩ harĩ ũndũ ũngĩ tũngĩka?

6. Tũngĩgunĩka atĩa kuumana na wĩruti witũ wa cionereria iria irĩ thĩinĩ wa Bibilia?

⁶ Thĩinĩ wa ibuku rĩrĩ, twarĩrĩirie o cionereria nini cia andũ maarĩ na wĩtĩkio. Kũrĩ na ingĩ nyingĩ! (Thoma Ahibirania 11:32.) Mũndũ no ahũthĩre ihinda rĩake kũrikĩra thĩinĩ wa o kĩonereria hĩndĩ ya wĩruti wake. Tũngĩthoma cionereria iria irĩ thĩinĩ wa Bibilia tũhunyĩrĩire, no twage gwĩkĩra wĩtĩkio witũ hinya. Nĩguo tũgunĩke biũ tũgĩthoma Bibilia, tũrabatara kũhũthĩra mahinda maitũ gwĩka ũthuthuria mũrikĩru wĩgiĩ cionereria iria irĩ thĩinĩ wayo. Angĩkorũo hĩndĩ ciothe nĩ tũrĩririkanaga atĩ athuri na atumia acio mataarĩ akinyanĩru maarĩ na “mũũmbĩre ũmwe na ithuĩ,” nĩ tũrĩmonaga marĩ arata aitũ. (Jak. 5:17) No tũhũũre mbica ũrĩa mangĩkorũo maaiguaga rĩrĩa maacemanagia na mĩhĩnga na moritũ mahanaine na maitũ.

7-9. (a) Athuri na atumia amwe a mahinda ma Bibilia mangĩaiguire atĩa igũrũ rĩgiĩ gũthathaiya Jehova ta ũrĩa twĩkaga ũmũthĩ? (b) Twagĩrĩirũo gwĩkĩra wĩtĩkio witũ hinya kũgerera ciĩko nĩkĩ?

⁷ Ningĩ nĩ twĩkĩraga wĩtĩkio witũ hinya kũgerera ciĩko citũ tondũ Bibilia yugaga ‘wĩtĩkio ũtarĩ na ciĩko njega nĩ mũkuũ.’ (Jak. 2:26) Ta wĩcirie ũrĩa athuri na atumia acio twarĩrĩirie mangĩakenire korũo maahetwo wĩra ta ũrĩa tũheetwo nĩ Jehova ũmũthĩ!

⁸ Kwa ngerekano, ĩ angĩkorũo Iburahimu eerirũo athathaiye Jehova hamwe na ikundi cia athathaiya thĩinĩ wa Nyumba cia Ũthamaki na irũrũngano-inĩ nene kũrĩa ciĩranĩro iria onaga “irĩ kũraya” ciaragĩrĩrio na igathathaũrũo na njĩra ya magegania, handũ ha kũmũthathaiya magongona-inĩ ma mahiga marĩa maakĩtwo werũ-inĩ? (Thoma Ahibirania 11:13.) Ĩ angĩkorũo Elija eerĩtwo atwaragĩre andũ ndũmĩrĩri ya kũmahonokia akĩmomagĩrĩria na akĩmaheaga mwĩhoko, handũ ha wĩra wa kũũraga anabii aganu a Baali agĩtungatĩra Jehova hĩndĩ ya mũthamaki mũũru na mũregenyũki? Nĩ ũhũthũ athuri na atumia acio nĩ mangĩetĩkĩrire narua wĩra ũcio wa gũthathaiya Jehova o ta ũrĩa twĩkaga ũmũthĩ.

⁹ Kwoguo rekei tũthiĩ na mbere gwĩkĩra wĩtĩkio witũ hinya kũgerera ciĩko citũ. Tweka ũguo, tũgũkorũo tũkĩĩgerekania na cionereria icio. O ta ũrĩa hagwetetwo thĩinĩ wa Ũhoro wa Kwambĩrĩria, tũrĩmonaga marĩ arata aitũ a mĩaka mĩingĩ. O na kũrĩ ũguo, ica ikuhĩ ũrata witũ hamwe nao nĩ ũkaneneha makĩria.

10. Tũgakorũo na gĩkeno kĩrĩkũ thĩinĩ wa Paradiso?

¹⁰ Igaga kĩĩrĩgĩrĩro gĩaku meciria-inĩ. Hĩndĩ ciothe athuri na atumia acio ehokeku meekagĩrũo hinya nĩ kĩĩrĩgĩrĩro kĩrĩa maakoragwo nakĩo. Ĩ wee nawe? Kwa ngerekano, ta hũũra mbica gĩkeno kĩrĩa ũgakorũo nakĩo ũgĩcemania na ndungata njĩhokeku cia Ngai hĩndĩ ĩrĩa “gũkariũkio andũ arĩa athingu.” (Thoma Atũmwo 24:15.) Nĩ ciũria ta irĩkũ ũngĩenda gũkaamoria?

11, 12. Thĩinĩ wa thĩ njerũ-rĩ, ũkoria andũ aya ciũria irĩkũ (a) Habili? (b) Nuhu? (c) Iburahimu? (d) Ruthu? (e) Abigaili? (f) Esiteri?

¹¹ Rĩrĩa ũgaacemania na Habili-rĩ, hihi nĩ ũkenda kũmũũria ũrĩa aciari ake maahanaga? Kana no ũmũrie ũũ: “Hihi nĩ waarĩirie akerubi arĩa maagitagĩra mũgũnda wa Edeni? Hihi nĩ maakwarĩirie?” Ĩ nake Nuhu? No ũmũrie ũũ: “Nĩ kũrĩ hĩndĩ wetigĩrire Anefili? Wahotire atĩa kũrũmbũiya mabataro ma nyamũ icio ciothe ihinda rĩu rĩothe mwarĩ thabina-inĩ?” Ũngĩgacemania na Iburahimu-rĩ, no ũmũrie ũũ: “Nĩ harĩ handũ muonanire na Shemu? Nũũ wakũrutire ũhoro wa Jehova? Hihi warĩ ũndũ mũhũthũ kuuma bũrũri wa Uru?”

¹² Ta wĩcirie ciũria cigana ũna iria hihi ũngĩenda gũkooria atumia ehokeku arĩa makaariũkio. “Ruthu, nĩ kĩĩ gĩakũgucĩrĩirie gũtuĩka mũthathaiya wa Jehova?” “Abigaili, hihi nĩ wetigagĩra ũkĩra Nabali ũrĩa wateithĩtie Daudi?” “Esiteri, gwathire atĩa harĩ wee na Moridekai thutha wa rũgano rwanyu thĩinĩ wa Bibilia gũthira?”

13. (a) Nĩ ciũria ta irĩkũ arĩa makaariũkio magaakũũria? (b) Hihi wee ũiguaga atĩa igũrũ rĩgiĩ gũgaacemania na athuri na atumia arĩa a tene arĩa maarĩ na wĩtĩkio?

¹³ Hatarĩ nganja athuri na atumia acio ehokeku nĩ magaakorũo na ciũria cia gũkũũria o nawe. Na githĩ ndũgakorũo ũrĩ ũndũ wa gũcanjamũra kũmeera igũrũ rĩgiĩ matukũ ma mũthia na ũrĩa Jehova aarathimĩte andũ ake hĩndĩ ya moritũ! No mũhaka makorũo nĩ magaakena mũno kũmenya ũrĩa Jehova aahingirie ciĩranĩro ciake. Thĩinĩ wa thĩ njerũ, tũtikabatara gwĩciria ũhoro wa ndungata njĩhokeku cia Ngai iria igwetetwo thĩinĩ wa Bibilia. Nĩkĩ? Tondũ magaakorũo hamwe na ithuĩ! Kwoguo, thiĩ na mbere gwĩka ũrĩa wothe ũngĩhota gũtũma andũ acio matuĩke arata aku. Thiĩ na mbere kwĩgerekania na wĩtĩkio wao. Thiĩ na mbere gũtungatĩra Jehova ũkenete o tao, marĩ arata aku a hakuhĩ tene na tene!