ITHOMO RĨA 7
Hihi Kũrĩ Hĩndĩ Ũiguaga ta Ũtiganĩirio na Wĩna Guoya?
Ta rora kahĩĩ gaka karĩ mbica-inĩ. Karoneka karĩ na kĩeha nĩ ũndũ wa kũigua ta gatiganĩirio na karĩ na guoya, kana tiguo? Wee ũrĩ waigua ũguo?— Ithuothe nĩ tũiguaga ũguo rĩmwe na rĩmwe. Bibilia nĩ yaragia ũhoro wa arata a Jehova arĩa o nao maaiguaga ũguo rĩmwe na rĩmwe. Ũmwe wao nĩ Elija. Ta reke twĩrute ũhoro wake.
Jezebeli eendaga kũũraga Elija
Elija aatũũraga thĩinĩ wa Isiraeli tene mũno Jesu atanaciarũo. Mũthamaki wa Isiraeli wetagwo Ahabu ndaahoyaga Ngai ũrĩa wa ma, Jehova. Ahabu marĩ na mũtumia wake Jezebeli maahoyaga ngai ya maheeni yetagwo Baali. Na nĩ ũndũ ũcio andũ aingĩ thĩinĩ wa Isiraeli makĩambĩrĩria kũhoya Baali. Jezebeli aarĩ mũũru mũno na eendaga kũũraga andũ arĩa othe maahoyaga Jehova, nginya Elija! Nĩ ũĩ ũrĩa Elija eekire?—
Elija nĩ kũũra orire! Aathiire kũndũ kũraya werũ-inĩ na akĩĩhitha ngurunga-inĩ. Ũgwĩciria eekire ũguo nĩkĩ?— Nĩ ũndũ wa guoya. No Elija ndaabataraga gũkorũo na guoya. Nĩkĩ? Tondũ nĩ aamenyaga atĩ Jehova nĩ angĩamũteithirie. Jehova nĩ onetie Elija hinya wake mbere ĩyo. Hĩndĩ ĩmwe, Jehova nĩ aacoketie mahoya ma Elija na njĩra ya gũtũma mwaki ũikũrũke kuuma igũrũ. Kwoguo hatarĩ nganja Jehova nĩ angĩateithirie Elija nginya hĩndĩ ĩyo!
Jehova aateithirie Elija atĩa??
Elija arĩ ngurunga-inĩ, Jehova akĩmwarĩria akĩmũũria: ‘Nĩ kĩĩ ũreka haha?’ Nake Elija akĩmũcokeria: ‘No niĩ wiki ndigĩtwo harĩ arĩa makũhoyaga. Ndĩ o nyiki, na nĩ ndĩretigĩra kũũragwo.’ Elija eeciragia atĩ andũ arĩa angĩ othe maahoyaga Jehova nĩ mooragĩtwo. No Jehova akĩmwĩra: ‘Aca, ũcio ti ũhoro wa ma. Kũrĩ na andũ angĩ ngiri mũgwanja mahoyaga. Gĩa na ũcamba. Ndĩ na wĩra mũingĩ mũno ndĩrenda gũkũhe!’ Nĩ ũgwĩciria ta Elija aakenire nĩ kũigua ũguo?—
Ũngĩĩruta ũndũ ũrĩkũ kuumana na ũrĩa gwekĩkire harĩ Elija?— Ndũrabatara kũigua ta ũtiganĩirio na wĩna guoya. Ũrĩ na arata mendete Jehova na makwendete. Ningĩ Jehova nĩ arĩ hinya mũingĩ na hingo ciothe nĩ arĩgũteithagia! Hihi nĩ wakena nĩ kũmenya atĩ gũtirĩ hĩndĩ ũkoragwo ũtiganĩirio?—