ITHOMO RĨA 6
Daudi Ndaarĩ na Guoya
Hihi wĩkaga atĩa rĩrĩa waigua guoya?— No kũhoteke ũthiaga harĩ mami kana baba wanyu nĩguo magũteithie. No nĩ harĩ mũndũ ũngĩ ũngĩgũteithia. Na nĩ arĩ hinya gũkĩra mũndũ ũngĩ o wothe. Nĩ ũĩ nũũ ũcio?— Nĩ Jehova Ngai. Ta reke twarĩrĩrie ũhoro wa kamwana kagwetetwo thĩinĩ wa Bibilia geetagwo Daudi. Nĩ kaamenyaga atĩ Jehova no agateithie, na kwoguo gatiarĩ na guoya.
Daudi aarutirũo nĩ aciari ake kwenda Jehova kuuma arĩ o kaana kanini. Ũndũ ũcio nĩ wateithirie Daudi kwaga kũigua guoya o na acemania na maũndũ ma kũmakania. Nĩ aamenyaga atĩ Jehova aarĩ Mũrata wake na nĩ angĩamũteithirie. Hĩndĩ ĩmwe Daudi akĩrĩithia ngʼondu, mũrũthi ũmwe mũnene nĩ wokire ũkĩnyita ngʼondu ĩmwe! Nĩ ũĩ ũrĩa Daudi eekire? Aatengʼeririe mũrũthi ũcio, akĩnyita nderu ciaguo, akĩũgũtha akĩũraga! Na thutha ũcio rĩrĩa nduba yatharĩkĩire ngʼondu, o nayo akĩmĩũraga! Ũgwĩciria nũũ wateithirie Daudi?— Nĩ Jehova.
Nĩ harĩ hĩndĩ ĩngĩ Daudi onanirie ũcamba mũnene. Aisiraeli maarũaga na andũ meetagwo Afilisiti. Mũthigari ũmwe wa Afilisiti aarĩ kĩmũndũ kĩnene mũno. Aarĩ irimũ! Eetagwo Goliathu. Irimũ rĩu nĩ rĩanyũrũragia thigari cia Aisiraeli o hamwe na Jehova. Goliathu eeraga thigari cia Aisiraeli igerie kũrũa nake. No Aisiraeli othe nĩ meetigagĩra kũrũa nake. Rĩrĩa Daudi aaiguire ũguo, akĩra Goliathu: ‘Niĩ nĩ ngũrũa nawe! Jehova nĩ ekũndeithia na nĩ ngũkũhoota!’ Nĩ ũkuona ta Daudi aarĩ na ũcamba?— Aarĩ na ũcamba mũnene. Hihi nĩ ũkwenda kũmenya ũrĩa gwekĩkire thutha ũcio?
Daudi oire kĩgũtha gĩake na tũhiga tũtano tũnyoroku, agĩthiĩ kũrũa na irimũ rĩu. Rĩrĩa Goliathu onire ũrĩa Daudi aarĩ kamũndũ kanini, akĩambĩrĩria kũmũnyũrũria. No Daudi akĩmwĩra: ‘Ũroka harĩ niĩ na rũhiũ rwa njora, no niĩ ndĩroka harĩ wee na rĩĩtwa rĩa Jehova!’ Agĩcoka agĩĩkĩra kahiga kĩgũtha-inĩ gĩake, agĩtengʼera erekeire harĩ Goliathu, akĩmũikĩria kahiga kau. Kahiga kau gakĩgũtha Goliathu thiithi! Irimũ rĩu rĩkĩgwa thĩ, rĩgĩkua! Afilisiti othe makĩigua guoya na makĩũra. Nũũ wahotithirie Daudi gũtooria irimũ?— Jehova nĩ aagateithirie tondũ aarĩ na hinya mũingĩ gũkĩra irimũ rĩu!
Daudi ndaarĩ na guoya tondũ nĩ aamenyaga atĩ Jehova nĩ ekũmũteithia
Ũngĩĩruta ũndũ ũrĩkũ kuumana na rũgano rwa Daudi?— Jehova arĩ hinya gũkĩra mũndũ ũngĩ o wothe. Na nĩ Mũrata waku. Kwoguo hĩndĩ ĩngĩ ũngĩigua guoya, ririkana atĩ Jehova no agũteithie kũgĩa na ũcamba!