Josia Aarĩ na Arata Ega

Nĩ ũgwĩciria ta arĩ ũndũ mũritũ gwĩka ũrĩa kwagĩrĩire?​— Andũ aingĩ meciragia atĩ nĩ ũndũ mũritũ. Bibilia ĩtwĩraga atĩ warĩ ũndũ mũritũ mũno harĩ kamwana geetagwo Josia gwĩka ũrĩa kwagĩrĩire. No kaarĩ na arata ega arĩa maagateithirie. Ta reke twĩrute ũhoro makĩria wĩgiĩ Josia na arata ake.

Ithe wa Josia eetagwo Amoni, na aarĩ mũthamaki wa Juda. Aarĩ mũũru mũno na aahoyaga mĩhianano. Rĩrĩa ithe wa Josia aakuire, Josia nĩwe watuĩkire mũthamaki wa Juda arĩ na mĩaka ĩnana tu! Nĩ ũgwĩciria Josia aarĩ mũru ta ithe?​— Aca, ndaarĩ mũũru!

O na rĩrĩa Josia aarĩ mũnini mũno, nĩ eendaga gwathĩkĩra Jehova. Nĩ ũndũ ũcio agĩthuura arata o arĩa meendete Jehova. Na nĩ maamũteithirie gwĩka ũrĩa kwagĩrĩire. Arata amwe a Josia maarĩ a?

Ũmwe wao aarĩ Zefania. Zefania aarĩ mũnabii na nĩ eeraga andũ a Juda atĩ mahoya mĩhianano, harĩ maũndũ moru mekũmakora. Josia nĩ aathikĩrĩirie Zefania na akĩhoya Jehova, handũ ha mĩhianano.

Mũrata ũngĩ wa Josia aarĩ Jeremia. Maarĩ a riika rĩmwe, na maaikaraga kũndũ gwakuhanĩrĩirie marĩ ciana. Nĩ meendanĩte mũno ũũ atĩ rĩrĩa Josia aakuire, Jeremia aandĩkire rwĩmbo rwa kuonania ũrĩa eendete Josia. Erĩ nĩ maateithanagia gwĩka ũrĩa kwagĩrĩire, na gwathĩkĩra Jehova.

Ũngĩĩruta ũndũ ũrĩkũ kuumana na kĩonereria kĩa Josia?​— O na rĩrĩa Josia aarĩ o kamwana kanini, nĩ eendaga gwĩka ũrĩa kwagĩrĩire. Nĩ aamenyaga atĩ no mũhaka arata ake makorũo marĩ andũ mendete Jehova. Ũgĩthuura arata, thuuraga arĩa mendete Jehova na mangĩgũteithia gwĩka ũrĩa kwagĩrĩire!