GĨCUNJĨ GĨA 8
Kũũrĩra Mũthamaki Mũũru
FAMĨLĨ YA JUSUFU KŨŨRĨRA MISIRI
JUSUFU GŨTHAMĨRIA FAMĨLĨ YAKE NAZARETHI
Jusufu agokĩria Mariamu nĩguo amũhe ndũmĩrĩri hiũ. Mũraika wa Jehova akorũo hĩndĩ amuumĩrĩra kĩroto-inĩ amwĩra ũũ: “Ũkĩra, woe mwana ũcio na nyina mũũrĩre Misiri, na mũikare kuo nginya rĩrĩa ngaakwĩra, tondũ Herode arĩ hakuhĩ kwambĩrĩria gũcaria mwana ũcio nĩguo amũũrage.”—Mathayo 2:13.
O hĩndĩ ĩyo, Jusufu, Mariamu, na mũriũ wao makora ũtukũ. Mageka ũguo ihinda rĩrĩa rĩagĩrĩire, tondũ Herode nĩ amenyete atĩ atuĩria arĩa a njata nĩ maamũhenirie. Aamerĩte atĩ makĩinũka macokere gwake mamũhe riboti. Handũ ha ũguo, moimire bũrũri ũcio matamwĩrĩte. Herode nĩ mũrakaru mũno. Na tondũ no arenda kũũraga Jesu, agathana atĩ tũhĩĩ tuothe twa mĩaka ĩĩrĩ gũcoka na thĩ thĩinĩ wa Bethilehemu na matũũra marĩa marigicĩirie tũũragwo. Itua rĩake rĩa kũũragithia twana twa mĩaka ĩĩrĩ gũcoka na thĩ, riumanĩte na ũhoro ũrĩa aaheirũo nĩ atuĩria a njata kuuma mwena wa Irathĩro.
Kũũragwo gwa tũhĩĩ tuothe nĩ ũndũ wa kĩeha mũno! Tũtingĩhota kũmenya nĩ tũhĩĩ tũigana tuoragirũo, no kĩrĩro kĩnene na kĩeha kĩrĩa maanyina ma twana tũu maarĩ nakĩo, nĩ kĩahingirie ũrathi wa Bibilia waheanĩtwo nĩ mũnabii wa Ngai wetagwo Jeremia.—Jeremia 31:15.
Ihinda-inĩ rĩrĩ, Jusufu na famĩlĩ yake nĩ marĩkĩtie kũũrĩra Misiri, na nĩkuo maraikara rĩu. Mũthenya ũmwe, mũraika wa Jehova akoimĩrĩra Jusufu kĩroto-inĩ. Akamwĩra: “Ũkĩra, woe mwana ũcio na nyina mũthiĩ bũrũri wa Isiraeli, tondũ arĩa meendaga kũũraga mwana ũcio nĩ makuĩte.” (Mathayo 2:20) Nĩ ũndũ ũcio Jusufu akamenya atĩ rĩu no acokie famĩlĩ yake bũrũri wa kwao. Na ũndũ ũcio ũkahingia ũrathi ũngĩ wa Bibilia ũrĩa woigĩte atĩ Mũrũ wa Ngai angĩgetwo kuuma Misiri.—Hosea 11:1.
Kwahoteka Jusufu arenda gũtwara famĩlĩ yake ĩikarage Judea, hihi hakuhĩ na taũni ya Bethilehemu, kũrĩa maaikaraga matanorĩra Misiri. No akamenya atĩ mũriũ wa Herode mũũru mũno wĩtagwo Arikelau nĩwe mũthamaki wa Judea. Thĩinĩ wa kĩroto kĩngĩ, Ngai akamenyithia Jusufu ũgwati ũrĩa ũrĩ ho. Kwoguo Jusufu na famĩlĩ yake magathiĩ rũgongo makĩria nginya Nazarethi gĩcigo-inĩ kĩa Galili, kũraihu na Jerusalemu, itũũra rĩrĩa Ayahudi mathathayagĩria. Jesu agakũrĩra itũũra-inĩ rĩu, na ũndũ ũcio ũkahingia ũrathi ũngĩ ũrĩa woigĩte: “Ageetagwo Mũnazarini.”—Mathayo 2:23.