Kĩama Gĩa Kerĩ Taũni-inĩ Ya Kana

Thutha wa gũikara thikũ igĩrĩ Samaria, Jesu agathiĩ gĩcigo-inĩ gĩa kwao mũciĩ. Nĩ arutĩte wĩra mũnene wa kũhunjia Judea, no ndaracoka Galili kũhurũka. Handũ ha ũguo, akongerera ũtungata wake gĩcigo-inĩ kĩrĩa aakũrĩire. No gũkorũo ndarerĩgĩrĩra kwamũkĩrũo wega kũu, tondũ o ta ũrĩa oigĩte, “mũnabii ndaheagwo gĩtĩo bũrũri-inĩ wao.” (Johana 4:44) Handũ ha gũikara hamwe nake, arutwo ake magacoka kwao mĩciĩ kũrĩ famĩlĩ ciao na magacokerera mawĩra marĩa maarutaga hau kabere.

Jesu arambĩrĩria kũhunjia ndũmĩrĩri ĩrĩkũ? Ĩroiga ũũ: “Ũthamaki wa Ngai nĩ ũkuhĩrĩirie. Mwĩrirei, na mũgĩe na wĩtĩkio harĩ ũhoro ũrĩa mwega.” (Mariko 1:15) Na hihi andũ maramĩiyũkia atĩa? Andũ aingĩ a Galili makaamũkĩra Jesu wega na makamũhe gĩtĩo. Matireka ũguo nĩ ũndũ tu wa ndũmĩrĩri yake. Andũ amwe a kuuma Galili maarĩ Jerusalemu hĩndĩ ya Pasaka mĩeri ĩigana ũna mĩhĩtũku na makĩona ciama iria Jesu aaringire.​—Johana 2:23.

Jesu arambĩrĩria kũ ũtungata wake mũnene Galili? Arambĩrĩria Kana, kũrĩa hĩndĩ ĩmwe aagarũrĩte maĩ magĩtuĩka ndibei iruga-inĩ rĩa ũhiki. Arĩ kũu riita rĩrĩ rĩa kerĩ, akamenya ũhoro wa mwanake ũrwarĩte mũno, na arĩ hakuhĩ gũkua. Nĩ mũriũ wa ndungata ya Herode Antipa, mũthamaki ũrĩa watinithirie Johana Mũbatithania mũtwe. Ndungata ĩyo ĩkaigua atĩ Jesu nĩ oimĩte Judea agathiĩ Kana. Nĩ ũndũ ũcio, mũthuri ũcio akoima gwake mũciĩ Kaperinaumu agathiĩ Kana gwetha Jesu. Agathaitha Jesu arĩ na kĩeha, akamwĩra: “Mwathani, nĩ tũthiĩ mwana wakwa atanakua.”​—Johana 4:49.

Mũthuri ũcio akagegio nĩ icokio rĩa Jesu amwĩra: “Wĩthiĩre; mũrũ waku nĩ ahona.” (Johana 4:50) Ndungata ĩyo ya Herode ĩgetĩkia Jesu na ĩkambĩrĩria rũgendo rwa gũcoka mũciĩ. Ĩrĩ njĩra-inĩ, ngombo ciayo ikamĩtũnga irĩ na ũhoro mwega. Mũriũ wake arĩ muoyo na nĩ mũhonu! Akĩgeria kũnyitithania ũhoro ũcio agaciũria, “Arahonire rĩ?”

Ikamũcokeria: “Mũrimũ ũcio ũrathirire ira ta thaa mũgwanja.”​—Johana 4:52.

Mũthuri ũcio akamenya atĩ mathaa macio nomo Jesu aramwĩrire, “Mũrũ waku nĩ ahona.” Thutha ũcio, mũthuri ũcio mũtongu ũũ atĩ arĩ na nginya ngombo, hamwe na nyũmba yake yothe magatuĩka arũmĩrĩri a Kristo.

Jesu aringĩte ciama igĩrĩ itũũra rĩa Kana, kũgarũra maĩ magatuĩka ndibei na thutha ũcio kũhonia mũriũ wa ndungata ya mũthamaki arĩ ũraihu wa kilomita ta 26. O na gũtuĩka icio tocio ciama iria aringĩte, kĩama gĩa kũhonia mũriũ wa ndungata ya mũthamaki nĩ kĩa mwanya tondũ nĩkĩo kĩa mbere kuuma acoka Galili. Hatarĩ nganja we nĩ mũnabii wĩtĩkĩrĩkĩte nĩ Ngai, no hihi ‘mũnabii ũyũ ekũheo gĩtĩo bũrũri-inĩ wao’ na gĩkĩro kĩrĩkũ?

Ũndũ ũcio ũkuoneka wega Jesu acoka kwao Nazarethi. Nĩ maũndũ marĩkũ egũcemania namo kũu?