Kũhonia Mũndũ Wĩna Mangũ Arĩ Na Tha

O ũrĩa Jesu na arutwo ake ana marathiĩ makĩhunjagia “thunagogi-inĩ . . . kũu Galili guothe,” noguo ũhoro wĩgiĩ maũndũ ma magegania marĩa Jesu areka ũrathiĩ ũgĩtheremaga. (Mariko 1:39) Ũhoro ũcio ũgakinya itũũra rĩmwe rĩrĩ na mũndũ ũrwarĩte mangũ. Luka, ũrĩa warĩ ndagĩtarĩ, arataarĩria atĩ mũndũ ũcio ‘aiyũrĩtwo nĩ mangũ.’ (Luka 5:12) Mũrimũ ũcio ũngĩkorũo ũtheremete mũno, nĩ ũthũkagia ciĩga imwe cia mwĩrĩ.

Kwoguo mũndũ ũcio arĩ na ruo rũingĩ mũno na agĩrĩirũo gũikara kũraihu na andũ arĩa angĩ. Makĩria ma ũguo, andũ mangĩkorũo marĩ hakuhĩ, agĩrĩirũo kwanĩrĩra atĩ “Ndĩ na thaahu! ndĩ na thaahu!” nĩguo matikamũkuhĩrĩrie ndakamagwatie mũrimũ ũcio. (Maũndũ ma Alawii 13:​45, 46, The Holy Bible in Gĩkũyũ Language) No hihi mũndũ ũcio wĩna mangũ egwĩka atĩa? Agathiĩ harĩ Jesu, akamũinamĩrĩra, akamũthaitha: “Mwathani, angĩkorũo no wende, theria.”​—Mathayo 8:2.

Hatarĩ nganja mũndũ ũcio arĩ na wĩtĩkio mũnene harĩ Jesu! Na no mũhaka mũrimũ ũcio ũkorũo nĩ ũtũmĩte ahaane kũiguĩrũo tha. Hihi Jesu egwĩka atĩa? Korũo nĩwe warĩ ho-rĩ, ũngĩekire atĩa? Nĩ ũndũ wa gũtindĩkwo nĩ tha, Jesu agatambũrũkia guoko na akahutia mũndũ ũcio. Akamwĩra: “Nĩ ngwenda. Thera.” (Mathayo 8:3) O hĩndĩ ĩyo mangũ macio make magathira, na andũ amwe arĩa marĩ ho makagegio nĩ ũndũ ũcio.

Na githĩ to wende gũthamakĩrũo nĩ mũthamaki wĩna tha, na ũhoti ta Jesu? Kuona ũrĩa aarũmbũyanirie na mũndũ ũcio warĩ na mangũ kũratũma tũgĩe na ma atĩ rĩrĩa Jesu agaatuĩka Mũthamaki wa thĩ yothe, ũrathi ũyũ wa Bibilia nĩ ũkaahinga: “Ũcio ũtarĩ na hinya, o ũcio mwagi-rĩ, nĩarĩmũiguagĩra tha; andũ acio akĩa, akĩhonokie mĩoyo yao.” (Thaburi 72:13) Hĩndĩ ĩyo, Jesu nĩ akaahingia wendi wa ngoro yake wa gũteithia arĩa othe ahinyĩrĩrĩku.

Ririkana atĩ o na Jesu atanahonia mũndũ ũcio uuma na mangũ, andũ aingĩ nĩ makoretwo magĩkenio mũno nĩ ũtungata wake. Rĩu andũ nĩ mekũigua ũhoro wĩgiĩ ũndũ ũyũ wa magegania arĩkia gwĩka. No Jesu ndarenda andũ mamwĩtĩkie nĩ ũndũ tu wa ũrĩa maiguĩte. Nĩ oĩ ũrathi ũrĩa ugĩte atĩ ‘ndangĩatũmire mũgambo wake ũiguwo njĩra-inĩ,’ atĩ nĩgetha etũũgĩrie. (Isaia 42:​1, 2) Nĩ ũndũ ũcio, Jesu akeera mũndũ ũcio uuma na mangũ: “Ndũkere mũndũ o na ũrĩkũ, no thiĩ wĩyonanie kũrĩ mũthĩnjĩri-Ngai, na ũrute igongona kũringana na ũrĩa watho wa Musa wathanĩte.”​—Mathayo 8:4.

Ĩndĩ o ta ũrĩa ũngĩĩrĩgĩrĩra, mũndũ ũcio nĩ mũkenu nĩ ũndũ wa kũhonio ũũ atĩ ndangĩhota gũkira na ũhoro ũcio. Agathiĩ na agatheremia ũhoro ũcio kũndũ guothe. Ũndũ ũcio ũgatũma andũ mende kũmenya makĩria. Nginya hagakinya handũ Jesu ndangĩthiĩ itũũra-inĩ akĩonagwo nĩ andũ, kwoguo kwa ihinda rĩigana ũna agaikara kũndũ gũtatũũragwo nĩ andũ. O na kũrĩ ũguo, andũ no maroka kuuma kũndũ na kũndũ nĩguo amarute na amahonie.