Mũndũ No Arute Wĩra Mwega Mũthenya Wa Thabatũ?

Jesu nĩ ahingĩtie maũndũ maingĩ ũtungata-inĩ wake gĩcigo-inĩ kĩa Galili. O na kũrĩ ũguo, akiuga “no mũhaka hunjie ũhoro ũrĩa mwega wa Ũthamaki wa Ngai matũũra-inĩ marĩa mangĩ o namo,” areciria ũhoro wa kũndũ kũngĩ kũingĩ to Galili tu. Nĩ ũndũ ũcio agathiĩ “na mbere kũhunjia thunagogi-inĩ cia Judea.” (Luka 4:​43, 44) Ũndũ ũcio nĩ wagĩrĩire tondũ rĩu nĩ kĩndũ mweri wa Machi kana Ĩpuro, na harĩ na gĩkũngũĩro gĩkuhĩrĩirie thĩinĩ wa Jerusalemu.

Ngũrani na ũrĩa tũthomaga ũhoro wĩgiĩ ũtungata wa Jesu Galili, Injiri ciarĩrĩirie ũhoro mũnini mũno wĩgiĩ ũtungata wake thĩinĩ wa Judea. O na gũtuĩka andũ aingĩ thĩinĩ wa Judea matiramwamũkĩra wega, Jesu ndaraga kũhunjia na kĩyo na kũruta mawĩra mega kũrĩa guothe arathiĩra.

Thutha wa kahinda, Jesu agathiĩ Jerusalemu, itũũra inene rĩa Judea, nĩ ũndũ wa Pasaka ya mwaka wa 31. Hakuhĩ na Kĩhingo kĩa Ngʼondu harĩa hakoragwo na mĩhangʼo mĩingĩ, harĩ na karia kanene karĩ na ithaku getagwo Bethzatha. Andũ aingĩ arwaru, atumumu, na cionje nĩ mokaga karia-inĩ kau. Nĩkĩ? Tondũ andũ metĩkĩtie atĩ no mahonio mangĩingĩra karia-inĩ kau hĩndĩ ĩrĩa maĩ maunjugwo.

Kũrĩ mũthenya wa Thabatũ, karia-inĩ kau Jesu akona mũndũ ũkoretwo arĩ mũrwaru ihinda rĩa mĩaka 38. Jesu akamũũria: “Nĩ ũkwenda kũhona?” Mũndũ ũcio akamũcokeria: “Mũthuri ũyũ, ndirĩ na mũndũ ũngĩndeithia gũtonya karia-inĩ rĩrĩa maĩ maunjugwo, na rĩrĩa ndathiĩ gũtonya, mũndũ ũngĩ agatonya mbere yakwa.”​—Johana 5:6, 7.

Jesu akagweta ũndũ ũkũgegia mũndũ ũcio na arĩa angĩ othe mangĩũigua, akoiga: “Ũkĩra! Oya karĩrĩ gaku na wĩtware.” (Johana 5:8) Na mũndũ ũcio ageeka o ũguo. O rĩo thutha wa kũhonio, akoya karĩrĩ gake na akambĩrĩria gũthiĩ!

Handũ ha gũkenio nĩ ũndũ ũcio wa magegania wekĩka, Ayahudi mona mũndũ ũcio makahiũha kũmwĩra: “Nĩ mũthenya wa Thabatũ, na Watho ndwĩtĩkĩrĩtie ũkuue karĩrĩ kau.” No we akamacokeria: “Mũndũ ũrĩa ũhonirie anjĩrire, ‘Oya karĩrĩ gaku na wĩtware.’” (Johana 5:​10, 11) Ayahudi acio maramenereria mũndũ ũrahonania mũthenya wa Thabatũ.

Makamũũria, “Nĩ mũndũ ũrĩkũ ũcio ũkwĩrire, ‘Oya karĩrĩ gaku na wĩtware’?” Maroria mũndũ ũcio kĩũria kĩu nĩkĩ? Tondũ Jesu nĩ ‘ehera atonya kĩrĩndĩ-inĩ,’ na mũndũ ũcio wahonio ndaramenya rĩĩtwa rĩa Jesu. (Johana 5:​12, 13) No mũndũ ũcio nĩ egũcemania na Jesu rĩngĩ. Thutha ũcio marĩ hekarũ-inĩ, mũndũ ũcio agacemania na Jesu na akamenya atĩ nĩwe wamũhonetie karia-inĩ.

Mũndũ ũcio ageetha Ayahudi arĩa mekũmũrĩtie nũ wamũhonetie. Akameera atĩ nĩ Jesu. Mamenya ũguo, Ayahudi magathiĩ kũrĩ Jesu. Hihi mathiĩ kũmenya kũrĩa Jesu araruta ũhoti wa gwĩka maũndũ macio manene? Aca. Handũ ha ũguo, mathiĩ gwethera Jesu mahĩtia nĩ ũndũ wa kũruta wĩra mwega mũthenya wa Thabatũ. Makambĩrĩria nginya kũmũnyarira!