Gũkena Nĩ Ũndũ Wa Mwĩhia Ũrĩa Werira

Jesu anatĩtĩrithia bata wa wĩnyihia mahinda-inĩ matiganĩte hĩndĩ ya ũtungata wake. (Luka 14:​8-11) Nĩ erutanagĩria mũno gũteithia andũ arĩa mendaga gũtungatĩra Ngai na wĩnyihia. Nginyagia ihinda rĩrĩ, amwe ao no kũhoteke nĩ ehia oru mũno.

Afarisai na andĩki-Watho makamenya atĩ andũ ta acio, arĩa o monaga ta matarĩ kĩene, nĩ marakenio nĩ Jesu na ndũmĩrĩri ĩrĩa araheana. Magateta makoiga: “Mũndũ ũyũ amũkagĩra ehia na akarĩanĩra nao.” (Luka 15:2) Afarisai na andĩki-Watho meyonaga marĩ a bata, na makona andũ arĩa angĩ mahaana ta tĩri ũrĩa makinyangaga. Atongoria acio metaga andũ acio ‛am ha·’aʹrets, kiugo gĩa Kĩhibirania kĩrĩa kiugĩte “andũ matarĩ kĩene,” kuonania ũrĩa makoragwo mamanyararĩte.

Ngũrani nao, Jesu arũmbũyanagia na andũ othe na njĩra ya gĩtĩo, wendo, na tha. Arĩa aingĩ harĩ acio monagwo matarĩ kĩene, nginya arĩa moĩkaine atĩ nĩ ehia, marĩ na wendi mũnene wa gũthikĩrĩria Jesu. No hihi Jesu arona atĩa andũ acio maramũũkĩrĩra nĩ ũndũ wa gũteithia andũ a kĩrathi gĩa thĩ, na ekũmacokeria atĩa?

Macokio ma kĩũria kĩu makoneka wega thutha wa kũheana ngerekano o ta ĩrĩa aaheanĩte hau kabere arĩ Kaperinaumu. (Mathayo 18:​12-14) Jesu akaheana ũhoro ũcio ta arenda kuonania atĩ Afarisai nĩ athingu na magetĩkĩrĩka rũũru-inĩ rwa Ngai. Ngũrani nao, andũ a kĩrathi gĩa thĩ makonanio ta arĩ o mahĩtĩtie njĩra na kwoguo makora. Akoiga ũũ:

“Nĩ mũndũ ũrĩkũ thĩinĩ wanyu arĩ na ngʼondu igana rĩmwe, ĩmwe ĩngĩũra, ũtangĩtiga icio mĩrongo kenda na kenda werũ-inĩ agacarie ĩyo ĩmwe yũrĩte nginya arĩmĩona? Na rĩrĩa amĩona, amĩigagĩrĩra ciande-inĩ ciake na agakena mũno. Na akinya mũciĩ, etaga arata na andũ a itũũra rĩake, akameera atĩrĩ, ‘Kenai hamwe na niĩ, tondũ nĩ ndona ngʼondu yakwa ĩrĩa ĩrorĩte.’”​—Luka 15:​4-6.

Nĩ ũndũ ũrĩkũ Jesu arenda kũrutana? Agataarĩria ũũ: “Ngũmwĩra atĩrĩ, rĩrĩa mwĩhia ũmwe erira, ũguo noguo gũkoragwo na gĩkeno kĩnene igũrũ nĩ ũndũ wake, gũkĩra nĩ ũndũ wa andũ athingu mĩrongo kenda na kenda matarabatara kwĩrira.”​—Luka 15:7.

No mũhaka Afarisai makorũo nĩ mahutio Jesu agweta ũhoro wĩgiĩ kwĩrira. Meyonaga marĩ athingu na mationaga ta marabatara kwĩrira. Rĩrĩa amwe ao mokĩrĩire Jesu mĩaka ĩigana ũna mĩhĩtũku, atĩ tondũ nĩ aarĩanagĩra na etia a mbia cia igooti na ehia, aameerire ũũ: “Ndiokire gwĩta arĩa athingu, no ndokire gwĩta ehia.” (Mariko 2:​15-17) Tondũ Afarisai acio meyonaga marĩ athingu, mationaga bata wa kwĩrira, na kwoguo matitũmaga igũrũ gũkorũo na gĩkeno. Ĩndĩ gũkoragwo kũrĩ ngũrani rĩrĩa ehia merira.

Jesu agĩtĩtĩrithia atĩ gwĩtĩkĩrĩka rĩngĩ kwa andũ arĩa ehia nĩ kũrehaga gĩkeno kĩnene igũrũ, akaheana ngerekano ĩngĩ ĩronania ũndũ wĩkĩkaga mũciĩ akoiga: “Nĩ mũtumia ũrĩkũ ũrĩ na drakma ikũmi, ĩmwe ya cio ĩngĩũra, ũtagwatagia tawa na akahaata nyũmba yake akamĩcaria biũ nginya rĩrĩa arĩmĩona? Na rĩrĩa amĩona, etaga arata na andũ a itũũra rĩake, akameera, ‘Kenai hamwe na niĩ, tondũ nĩ ndona drakma yakwa ĩrĩa ĩrorĩte.’”​—Luka 15:​8, 9.

Ũndũ ũrĩa Jesu ararutana no ta ũrĩa ekũrutanĩte rĩrĩa aheanire ngerekano ya ngʼondu ĩrĩa yorĩte. Akoiga: “Ngũmwĩra atĩrĩ, ũguo noguo araika a Ngai magĩaga na gĩkeno rĩrĩa mwĩhia ũmwe erira.”​—Luka 15:10.

Ta wĩcirie ũndũ ũcio atĩ araika a Ngai nĩ makenaga mũno mwĩhia ũmwe erira! Ũndũ ũcio nĩ wa mwanya tondũ ehia arĩa merira na makaheo mweke wa gũgaakorũo Ũthamaki-inĩ wa Ngai nĩ magaakorũo matũũgĩrĩtio o na gũkĩra araika! (1 Akorintho 6:​2, 3) O na kũrĩ ũguo, araika matiiguaga ũiru. Kwoguo-rĩ, ithuĩ tũkĩagĩrĩirũo kũigua atĩa rĩrĩa mwĩhia erira biũ na acokerera Ngai?