Ngerekano Ya Aruti Wĩra Mũgũnda-inĩ Wa Mĩthabibũ

Jesu akorũo era arĩa maramũthikĩrĩria thĩinĩ wa Perea atĩ “andũ aingĩ arĩa marĩ mbere magaatuĩka a thutha, nao arĩa marĩ thutha matuĩke a mbere.” (Mathayo 19:30) Agatĩtĩrithia ũndũ ũcio akĩhũthĩra ngerekano ĩno ĩgiĩ aruti wĩra mũgũnda-inĩ wa mĩthabibũ:

“Ũthamaki wa igũrũ ũtariĩ ta mũndũ warĩ na mũgũnda, ũrĩa woimagarire rũcinĩ tene agĩthiĩ kwandĩka andũ a kũruta wĩra mũgũnda-inĩ wake wa mĩthabibũ. Maaiguanĩra na aruti a wĩra atĩ ekũmarĩha dinari ĩmwe mũthenya, akĩmatũma mũgũnda wa mĩthabibũ. Ningĩ akiumagara ta thaa ithatũ cia rũcinĩ, akĩona andũ angĩ marũgamĩte thoko-inĩ matarĩ andĩke wĩra nĩ mũndũ; na akĩmeera atĩrĩ, ‘O na inyuĩ thiĩi mũgũnda-inĩ wa mĩthabibũ, na nĩ ngũmũrĩha kĩrĩa kĩmwagĩrĩire.’ Nĩ ũndũ ũcio magĩthiĩ. Ningĩ agĩcoka akiumagara ta thaa thita cia mũthenya na thaa kenda na agĩka o ta ũguo. Macũngĩrĩro-inĩ, akiumagara ta thaa ikũmi na ĩmwe, agĩkora andũ angĩ marũgamĩte, na akĩmoria, ‘Mwatinda haha mũrũgamĩte mũthenya wothe mũtarĩ wĩra mũraruta nĩkĩ?’ Makĩmũcokeria ũũ, ‘Nĩ tondũ gũtirĩ mũndũ ũtwandĩkire wĩra.’ Akĩmeera, ‘O na inyuĩ thiĩi mũgũnda-inĩ.’”​—Mathayo 20:​1-7.

Kwahoteka rĩrĩa acio marathikĩrĩria Jesu maigua akĩgweta “Ũthamaki wa igũrũ” na “mũndũ warĩ na mũgũnda,” meciria ũhoro wa Jehova Ngai. Maandĩko monanagia Jehova arĩ na mũgũnda wa mĩthabibũ, ũrĩa ũrũgamĩrĩire rũrĩrĩ rwa Isiraeli. (Thaburi 80:​8, 9; Isaia 5:​3, 4) Arĩa marĩ kĩrĩkanĩro-inĩ kĩa Watho maringithanĩtio na aruti wĩra mũgũnda-inĩ ũcio. No Jesu ndararia ũhoro wa mahinda mahĩtũku. Araria ũhoro wa ũndũ ũrekĩka arĩ gũkũ thĩ.

Atongoria a ndini na Afarisai nĩo magĩrĩire gũkorũo makĩruta wĩra ũtungata-inĩ wa Jehova hingo ciothe. Matariĩ ta aruti wĩra a mahinda mothe, arĩa merĩgagĩrĩra kũheo mũcara wa mũthenya mũgima, na nĩguo dinari ĩmwe.

Athĩnjĩri-Ngai na angĩ arĩa marĩ gĩkundi-inĩ kĩu monaga ũtungata wa Ayahudi arĩa angĩ ũrĩ wa gĩkĩro gĩa thĩ, matariĩ ta aruti wĩra wa kĩbarũa mũgũnda-inĩ wa Ngai wa mĩthabibũ. Ngerekano-inĩ ya Jesu, acio nĩo arĩa marandĩkwo wĩra “thaa ithatũ cia rũcinĩ” kana mathaa mathiangĩte, thaa thita, thaa kenda, na mũico-inĩ thaa ikũmi na ĩmwe.

Arũme na atumia arĩa marũmagĩrĩra Jesu monagwo matariĩ ta ‘kĩrĩndĩ kĩrume.’ (Johana 7:49) Mĩaka mĩingĩ, makoretwo makĩruta wĩra wa gũtega thamaki kana mawĩra mangĩ ma kĩrathi gĩa thĩ. Mwaka wa 29, “mwene mũgũnda ũcio wa mĩthabibũ” nĩ aatũmire Jesu ete andũ acio a kĩrathi gĩa thĩ moke marutĩre Ngai wĩra marĩ arutwo a Kristo. Nĩo “a thutha” arĩa Jesu agwetire atĩ maandĩkirũo thaa ikũmi na ĩmwe mũgũnda-inĩ wa mĩthabibũ.

Akĩrĩkĩrĩria ngerekano yake, Jesu agataarĩria ũrĩa gwekĩkire gwakinya hwaĩ-inĩ akoiga: “Rĩrĩa gwakinyire hwaĩ-inĩ, mwene mũgũnda ũcio wa mĩthabibũ akĩra mũndũ ũrĩa warũgamĩrĩire mũgũnda atĩrĩ, ‘Ĩta aruti a wĩra ũmarĩhe mũcara wao, wambĩrĩrie na arĩa mokire thutha na ũrigie na arĩa mokire mbere.’ Rĩrĩa andũ arĩa mookĩte thaa ikũmi na ĩmwe maakinyire, makĩrĩhwo dinari ĩmwe o mũndũ. Kwoguo, arĩa mookĩte mbere maakinya, magĩĩciria atĩ mekũrĩhwo makĩria, ĩndĩ o nao makĩrĩhwo dinari ĩmwe o mũndũ. Marĩkia kũrĩhwo, makĩambĩrĩria kũnugunĩra mwene mũgũnda makiugaga, ‘Aya mokire thutha maruta wĩra ithaa rĩmwe; na watũrĩha ũndũ ũmwe nao na ithuĩ twatinda na mĩnoga ya mũthenya mũgima tũkĩhĩa nĩ riũa!’ No agĩcokeria ũmwe wao akĩmwĩra, ‘Mũndũ ũyũ, ndirĩ ũndũ mũru ndagwĩka. Tũiguanĩire dinari ĩmwe, kana tiguo? Oya kĩrĩa gĩkwagĩrĩire na wĩthiĩre. Nĩ niĩ ndenda kũrĩha acio a thutha o ta ũrĩa ndakũrĩha. Githĩ ndiagĩrĩirũo gwĩka ũrĩa ngwenda na indo ciakwa? Kana nĩ waigua ũiru tondũ nĩ ndeka wega?’ Ũguo noguo arĩa a thutha magaatuĩka a mbere nao a mbere matuĩke a thutha.”​—Mathayo 20:​8-16.

No gũkorũo arutwo nĩ mareyũria ciũria igũrũ rĩgiĩ gacunjĩ kau ka mũico ka ngerekano ya Jesu. Hihi atongoria a ndini a Kĩyahudi arĩa meyonaga marĩ “a mbere” magaatuĩka “a thutha” na njĩra ĩrĩkũ? Na arutwo a Jesu magaatuĩka “a mbere” atĩa?

Arutwo a Jesu arĩa Afarisai na andũ angĩ monaga marĩ “a thutha,” merekeire gũtuĩka “a mbere,” maheo mũcara wao wĩ wothe. Kũgerera gĩkuũ kĩa Jesu, rũrĩrĩ rwa Isiraeli nĩ rũngĩgatiganĩrio, na ithenya rĩa ruo Ngai athuure rũrĩrĩ rũngĩ rwerũ, “Isiraeli a Ngai.” (Agalatia 6:16; Mathayo 23:38) Johana Mũbatithania aaragia ũhoro wa andũ a rũrĩrĩ rũu rwerũ, rĩrĩa oigire ũhoro wĩgiĩ ihinda andũ mangĩkabatithio na roho mũtheru. Acio makoretwo marĩ “a thutha” nĩo mangĩgakorũo marĩ a mbere kũbatithio na roho mũtheru na maheo mweke wa gũkorũo marĩ aira a Jesu “nginya ituri ciothe cia thĩ.” (Atũmwo 1:​5, 8; Mathayo 3:11) O na gũtuĩka arutwo a Jesu nĩ marataũkĩrũo nĩ ũgarũrũku ũcio Jesu ataarĩria, nĩ maramenya atĩ no mokĩrĩrũo nĩ atongoria a ndini arĩa megũtuĩka “a thutha.”