“Ĩkagai Maũndũ Mothe Nĩguo Mũgoocithie Ngai”

TONDŨ tũrĩ ndungata ciĩyamũrĩire Ngai, nĩ twagĩrĩirũo kũgoocithia Jehova maũndũ-inĩ mothe marĩa twaragia na tũgeka. Mũtũmwo Paulo nĩ aatũheire ũtaaro wa gũtũtongoragia ũndũ-inĩ ũcio rĩrĩa ooigire ũũ: “Kana nĩ kũrĩa mũrarĩa, kana nĩ kũnyua, kana nĩ ũndũ ũngĩ o wothe mũreka-rĩ, ĩkagai maũndũ mothe nĩguo mũgoocithie Ngai.” (1 Kor. 10:31) Ũguo nĩ kuuga tũrũmie ithimi cia Jehova cia ũthingu, iria cionanagia ngumo ciake na njĩra nginyanĩru. (Kol. 3:10) No mũhaka twĩgerekanagie na Ngai tũrĩ andũ atheru.​—Ef. 5:1, 2.

² Mũtũmwo Petero nĩ aaririkanirie Akristiano ũndũ ũcio rĩrĩa aamandĩkĩire ũũ: “Ta ciana njathĩki-rĩ, tigai gwĩkaga kũringana na merirĩria marĩa mwarĩ namo hau kabere rĩrĩa mũtaarĩ na ũmenyo, no o ta Ũrĩa Mũtheru o ũcio wamwĩtire, tuĩkai atheru inyuĩ ene mĩthiĩre-inĩ yanyu yothe, tondũ nĩ kwandĩke ũũ: ‘No mũhaka mũkorũo mũrĩ atheru, tondũ niĩ ndĩ mũtheru.’” (1 Pet. 1:14-16) O ta Aisiraeli a tene, andũ othe thĩinĩ wa kĩũngano gĩa Gĩkristiano magĩrĩirũo gũikaraga marĩ atheru. Ũguo nĩ kuuga atĩ magĩrĩirũo gũkorũo matarĩ na kameni, meyeheranĩtie na mehia na maũndũ ma thĩ ĩno. Na njĩra ĩyo magakorũo mamũrĩtwo nĩ ũndũ wa ũtungata mũtheru.​—Tham. 20:5.

³ Mũndũ atũũragia ũtheru na njĩra ya kũrũmia mawatho na motaaro ma Jehova marĩa monanĩtio wega thĩinĩ wa Maandĩko Matheru. (2 Tim. 3:16) Hĩndĩ ĩrĩa twerutaga Bibilia nĩ twarutirũo ũhoro wĩgiĩ Jehova na njĩra ciake, na ũndũ ũcio ũgĩtũma tũgucĩrĩrio harĩ we. Ningĩ nĩ twerutire bata wa gũcaria Ũthamaki wa Ngai mbere na kũiga wendi wa Jehova mbere ũtũũro-inĩ witũ. (Mat. 6:33; Rom. 12:2) Nĩguo twĩke ũguo, nĩ twabatarire kwĩhumba ũmũndũ mwerũ.​—Ef. 4:22-24.

ŨTHERU WA KĨĨROHO NA WA KĨĨMĨTUGO

⁴ Ti hĩndĩ ciothe ũkoragwo ũrĩ ũndũ mũhũthũ kũrũmia ithimi cia Jehova cia ũthingu. Thũ itũ Shaitani ũrĩa Mũcukani, acaragia ũrĩa angĩtweheria ũhoro-inĩ ũrĩa wa ma. Rĩmwe nĩ tũritũhagĩrũo nĩ ũndũ wa ũgucania mũũru wa thĩ ĩno na mĩerekera itũ ya mehia. Nĩ tũbataraga kũrũa mbaara ya kĩĩroho nĩguo tũhote gũtũũria wĩyamũrĩri witũ harĩ Jehova. Maandĩko matwĩraga tũtikagege rĩrĩa twacemania na ũkararia kana magerio. Nĩ tũrĩnyamarĩkaga nĩ ũndũ wa ũthingu. (2 Tim. 3:12) No tũkorũo na gĩkeno rĩrĩa tũracemania na magerio nĩ ũndũ wa kũmenya atĩ magerio macio maronania nĩ tũreka wendi wa Ngai.​—1 Pet. 3:14-16; 4:12, 14-16.

⁵ O na gũtuĩka Jesu aarĩ mũkinyanĩru, nĩ eerutire wathĩki kuumana na maũndũ marĩa aanyamarĩkire nĩmo. Gũtirĩ hĩndĩ aatooririo nĩ magerio ma Shaitani o na kana akĩĩrirĩria maũndũ ma gũkũ thĩ. (Mat. 4:1-11; Joh. 6:15) O na gũtirĩ hĩndĩ eeciririe aregerie wĩkindĩru wake. O na gũtuĩka ũthingu wake nĩ watũmire athũũrũo nĩ thĩ, nĩ aarũmirie ithimi cia Jehova cia ũthingu. Kahinda kanini Jesu atanakua, nĩ eerire arutwo ake atĩ o nao nĩ mangĩgaathũũrũo nĩ thĩ. Kuuma hĩndĩ ĩyo, arũmĩrĩri a Jesu nĩ macemanĩtie na magerio ĩndĩ nĩ makoragwo na ũmĩrĩru nĩ kũmenya atĩ Mũrũ wa Ngai nĩ aatooririe thĩ.​—Joh. 15:19; 16:33; 17:16.

⁶ Nĩguo tũtigakorũo tũrĩ a thĩ ĩno, nĩ tũrabatara kũrũmia ithimi cia Jehova cia ũthingu o ta ũrĩa Mwathi witũ eekire. Makĩria ma gwĩthema kwĩingĩrania na maũndũ ma gĩũteti na maũndũ mangĩ ma thĩ ĩno, no mũhaka tũregane na ithimi ciayo njũru ciĩgiĩ mĩtugo. Nĩ tuoyaga na ũritũ ũtaaro ũyũ ũrĩ thĩinĩ wa Jakubu 1:21: “Eheriai gĩko gĩothe na ũndũ o wothe mũũru, na mwĩtĩkĩre mũrĩ na ũhooreri kũhandwo kiugo kĩrĩa kĩngĩhota kũmũhonokia.” Kũgerera kwĩruta na gũthiaga mĩcemanio, no tũhote “kũhandwo kiugo” kĩa ũhoro wa ma thĩinĩ wa meciria na ngoro citũ, na njĩra ĩyo o na tũtingĩambĩrĩria kwĩrirĩria maũndũ ma thĩ ĩno. Mũtũmwo Jakubu aandĩkire ũũ: “Kaĩ mũtoĩ atĩ kũgĩa ũrata na thĩ nĩ kũgĩa ũthũ na Ngai? Nĩ ũndũ ũcio, mũndũ o wothe wendaga gũtuĩka mũrata wa thĩ etuaga thũ ya Ngai.” (Jak. 4:4) Nĩ ũndũ ũcio, Bibilia nĩ ĩtũhatagĩrĩria tũrũmie ithimi cia Jehova cia ũthingu na tũikare twĩyamũranĩtie na thĩ ĩno.

⁷ Kiugo kĩa Ngai nĩ gĩtũkaanagia kwĩingĩria mĩtugo-inĩ mĩũru na ya ũũra-thoni. Gĩtwĩraga ũũ: “Ngomanio itagĩrĩire na mĩthemba o yothe ya maũndũ matarĩ matheru kana ũkoroku itikanagwetwo gatagatĩ-inĩ kanyu, o ta ũrĩa kwagĩrĩire harĩ andũ aamũre.” (Ef. 5:3) Kwoguo tũtiagĩrĩirũo kũreka maũndũ ma ũũra-thoni, marĩ magigi, na matagĩrĩire maikare meciria-inĩ maitũ, kana kũreka maũndũ ta macio maingĩre ndeereti-inĩ citũ. Na njĩra ĩyo nĩ tuonanagia atĩ nĩ tũrenda kũrũmia ithimi cia Jehova cia ũthingu ciĩgiĩ mĩtugo.

ŨTHERU WA KĨĨMWĨRĨ

⁸ Makĩria ma gũkorũo marĩ atheru kĩĩroho na kĩĩmĩtugo, Akristiano nĩ mamenyaga bata wa gũkorũo marĩ atheru kĩĩmwĩrĩ. Tondũ Ngai nĩ mũtheru, nĩ eerĩte Aisiraeli maigage kambĩ yao ĩrĩ theru. O na ithuĩ no mũhaka tũkorũo tũrĩ atheru nĩguo Jehova “ndakone kĩndũ o gĩothe gĩtagĩrĩire” thĩinĩ witũ.​—Gũcok. 23:14.

⁹ Bibilia yonanagia atĩ ũtheru wa kĩĩroho na wa kĩĩmwĩrĩ nĩ ũhutanĩtie. Kwa ngerekano, Paulo aandĩkire ũũ: “Inyuĩ endwa akwa-rĩ, . . . nĩ twĩtheriei ũndũ o wothe ũrĩa ũngĩthahia mwĩrĩ na roho, tũgĩtũmaga ũtheru witũ ũkinyanĩre ũhoro-inĩ wa gwĩtigĩra Ngai.” (2 Kor. 7:1) Nĩ ũndũ ũcio, Akristiano othe, arũme na atumia, nĩ magĩrĩirũo kũigaga mĩĩrĩ yao ĩrĩ mĩtheru na njĩra ya gwĩthambaga hingo ciothe na gũthambagia nguo ciao. O na gũtuĩka maũndũ matihaanaine kũndũ guothe, ithuothe no tũhote kuona thabuni na maĩ ma kũigana nĩguo tũige mĩĩrĩ itũ ĩrĩ mĩtheru na tũtigĩrĩre atĩ ciana citũ nĩ theru.

¹⁰ Nĩ ũndũ wa wĩra witũ wa kũhunjia, nĩ tũkoragwo tũĩkaine wega kũrĩa tũikaraga. Kwoguo rĩrĩa twaiga mĩciĩ itũ ĩrĩ mĩtheru, na ĩrĩ na kĩhaarĩro kĩega thĩinĩ na nja, nĩ tũrutagĩra andũ arĩa tũrigainie nao ũira. Famĩlĩ yothe no ĩnyitanĩre ũndũ-inĩ ũcio. Ariũ a Ithe witũ nĩ magĩrĩirũo kũrũmbũiya mĩciĩ yao thĩinĩ na nja, makĩmenyaga atĩ mũciĩ mũtheru na ũrĩ na kĩhaarĩro kĩega nginya nja, nĩ ũgucagĩrĩria andũ arĩa angĩ. Gwĩka ũguo o hamwe na gũtongoria maũndũ-inĩ ma kĩĩroho, kuonanagia atĩ nĩ mararũgamĩrĩra nyũmba ciao na njĩra njega. (1 Tim. 3:4, 12) Aarĩ a Ithe witũ o nao marĩ na itemi rĩa kũrũmbũiya mĩciĩ yao, na makĩria mũno nyũmba thĩinĩ. (Tit. 2:4, 5) Ciana imenyeretio wega nĩ ciĩkaga ũrĩa ingĩhota nĩguo cikare irĩ theru na ikaiga rumu ciacio irĩ theru na irĩ bange wega. Na njĩra ĩyo famĩlĩ nĩ ĩnyitanagĩra kwĩmenyeria mĩbango ya ũtheru ĩrĩa ĩgaakorũo kuo thĩinĩ wa thĩ njerũ rungu rwa Ũthamaki wa Ngai.

¹¹ Andũ aingĩ a Jehova ũmũthĩ nĩ mahũthagĩra ngaari ciao, nduthi (kibikibi), kana indo ingĩ ta icio magĩthiĩ mĩcemanio. Kũndũ kũmwe andũ nĩ macibataraga magĩthiĩ ũtungata-inĩ. Ciagĩrĩirũo kũigwo irĩ theru na irĩ thondeke wega. Mĩciĩ itũ, ngaari kana nduthi citũ, ciagĩrĩire kuonania atĩ tũrĩ ndungata theru cia Jehova. Ũtaaro ũcio noguo twagĩrĩirũo kũhũthĩra harĩ mĩhuko itũ ya gũthiĩ kũhunjia na Bibilia.

¹² Mĩĩhumbĩre na mĩĩgemerie itũ yagĩrĩirũo gũtwarana na motaaro ma Bibilia. Gũtirĩ hĩndĩ tũngĩthiĩ mbere ya mũndũ ũrĩ na ũnene twĩhumbĩte na njĩra ĩtarĩ na kĩhaarĩro kĩega. Angĩkorũo nĩguo-rĩ, na githĩ tũtikĩagĩrĩirũo kwĩhumba wega o na makĩria rĩrĩa tũraruta wĩra wa Jehova wa kũhunjĩria andũ kana tũkĩrutana harĩa mbere kĩũngano-inĩ! Mwĩhumbĩre witũ na mwĩgemerie witũ no itũme andũ mahe ũthathaiya wa Jehova gĩtĩo kana mage kũũhe. Tũtiagĩrĩirũo kwĩgemia kana kwĩhumba na njĩra ĩtarĩ na kĩhaarĩro kĩega kana ĩronania atĩ tũtireciria arĩa angĩ. (Mik. 6:8; 1 Kor. 10:31-33; 1 Tim. 2:9, 10) Nĩ ũndũ ũcio, rĩrĩa tũrehaarĩria gũthiĩ ũtungata, mĩcemanio, kana igomano, nĩ twagĩrĩirũo kũririkana ũrĩa Maandĩko moigaga ũhoro-inĩ wĩgiĩ ũtheru wa kĩĩmwĩrĩ na mwĩhumbĩre ũrĩa wagĩrĩire. Hĩndĩ ciothe twendaga gũtĩa Jehova na kũmũgoocithia.

¹³ Ũguo noguo twagĩrĩirũo gwĩka rĩrĩa tũraceera wabici nene ya Aira a Jehova kana wabici ya rũhonge. Ririkana atĩ rĩĩtwa Betheli riugĩte “Nyũmba ya Ngai.” Nĩ ũndũ ũcio, twagĩrĩirũo gũkorũo na mĩthiĩre mĩega na kwĩhumba o ta ũrĩa twĩhumbaga rĩrĩa tũrathiĩ mĩcemanio Nyũmba-inĩ ya Ũthamaki.

¹⁴ Twagĩrĩirũo kwĩhumba na kwĩgemia na njĩra njega o na rĩrĩa tũrĩ maũndũ-inĩ ma gwĩkenia. No twĩyũrie ũũ, ‘Hihi no njonoke kũhunjĩria mũndũ nĩ ũndũ wa ũrĩa ndĩhumbĩte?’

MAŨNDŨ MARĨA MAGĨRĨIRE MA GWĨKENIA

¹⁵ Nĩguo mũndũ agĩe na ũgima mwega wa mwĩrĩ, nĩ abataraga kũhurũka wega na kũgĩa na mahinda ma gwĩkenia. Hĩndĩ ĩmwe Jesu nĩ eerire arutwo ake mathiĩ hamwe nake handũ hatarĩ na andũ ‘makahurũke hanini.’ (Mar. 6:31) Kũhurũka na gwĩkenia na njĩra ĩrĩa yagĩrĩire no gũtũme mũndũ ahoorerie meciria. No gũtũme tũcokwo nĩ hinya wa gũthiĩ na mbere na mawĩra maitũ.

¹⁶ Tondũ ũmũthĩ nĩ kũrĩ mĩthemba mĩingĩ mũno ya maũndũ ma gwĩkenia, Akristiano nĩ magĩrĩirũo kũhũthĩra ũũgĩ kuuma kũrĩ Ngai magĩthuura maũndũ ma gwĩkenia. O na gũtuĩka maũndũ ma gwĩkenia nĩ mega, ti mo maũndũ marĩa ma bata mũno ũtũũro-inĩ. Nĩ tũheetwo mũkaana atĩ “matukũ-inĩ ma kũrigĩrĩria,” andũ nĩ mangĩgaakorũo “mendete ikeno handũ ha kwenda Ngai.” (2 Tim. 3:1, 4) Maũndũ maingĩ marĩa andũ mekenagia namo ũmũthĩ matiagĩrĩire harĩ arĩa mendete kũrũmia ithimi cia Jehova cia ũthingu.

¹⁷ Akristiano a tene nĩ maabataraga gwĩthema maũndũ moru ma andũ arĩa maamathiũrũrũkĩirie arĩa meendete ikeno. Thĩinĩ wa ihaaro cia Roma, eroreri maakenagĩra kwĩrorera andũ arĩa angĩ makĩnyamarĩka. Maakenagĩra kwĩrorera maũndũ ma ũhinya, ũiti wa thakame, na ngomanio itagĩrĩire, ĩndĩ Akristiano a tene nĩ meethemaga maũndũ macio. Maũndũ maingĩ ma gwĩkenia thĩinĩ wa thĩ ũmũthĩ maiyũire maũndũ ta macio, marĩa makoragwo na muoroto wa kũhingia merirĩria ma andũ. Nĩ tũrabatara ‘kwĩrora biũ’ ũrĩa mĩthiĩre itũ ĩhaana na twĩtheme maũndũ ma gwĩkenia marĩa mangĩtũthũkia. (Ef. 5:15, 16; Thab. 11:5) O na gũtuĩka ũndũ wa gwĩkenia no ũkorũo ũtarĩ mũũru, harĩa tũrawĩkĩra no hakorũo hatagĩrĩire.​—1 Pet. 4:1-4.

¹⁸ Nĩ kũrĩ mĩthemba mĩingĩ mĩega ya maũndũ ma gwĩkenia marĩa Akristiano mangĩkenera. Akristiano aingĩ nĩ magunĩkĩte nĩ ũndũ wa kũrũmĩrĩra ũtaaro wa Kĩĩmaandĩko na motaaro mangĩ marĩ na ũigananĩru marĩa monekaga thĩinĩ wa mabuku maitũ.

¹⁹ Kũrĩ hĩndĩ famĩlĩ cigana ũna ingĩnyitwo ũgeni kwa mũrũ kana mwarĩ wa Ithe witũ. Kana aarĩ na ariũ a Ithe witũ manyitwo ũgeni iruga-inĩ rĩa ũhiki kana ũndũ-inĩ ũngĩ ta ũcio. (Joh. 2:2) Arĩa manyitanĩte ũgeni nĩo makoragwo na ũigĩrĩrĩki wa maũndũ marĩa megwĩkĩka kuo. Maũndũ nĩ mabataraga kũrorũo na kinyi rĩrĩa andũ aingĩ macemania gwĩkenia. Andũ amwe manahũthĩra wĩyathi wao ũũru rĩrĩa marekenia, magakĩra mĩhaka ĩgiĩ mĩthiĩre ĩrĩa yagĩrĩire ya Gĩkristiano, hihi makarĩa na makanyua gũkĩria gĩthimi, kana o na makeingĩria mehia-inĩ mangĩ maritũ. Nĩ ũndũ ũcio, Akristiano arĩa marĩ na ũtaũku nĩ monete bata wa kũnyihanyihia andũ arĩa megwĩta na mahinda marĩa mekũhũthĩra. Kũngĩkorũo kũrĩ na njohi na indo ingĩ ta icio, ciagĩrĩire kũnyuo na ũigananĩru. (Afil. 4:5) Twerutanĩria biũ gũtigĩrĩra atĩ mahinda marĩa tũcemanĩtie gwĩkenia nĩ ma gũcanjamũra na ma gwaka kĩĩroho, kũrĩa na kũnyua ti kuo kũrĩkoragwo kũrĩ ũndũ ũrĩa wa bata.

²⁰ Nĩ wega kũnyitanaga ũgeni. (1 Pet. 4:9) Rĩrĩa tũranyita Akristiano arĩa angĩ ũgeni nĩguo tũrĩanĩre, tũnyuanĩre, tũhurũke, o na kana tũnyitanĩre na njĩra ĩngĩ, nĩ wega gwĩciragia arĩa matarĩ ũhoti mũnene. (Luk. 14:12-14) Tũngĩkorũo tũnyitĩtwo ũgeni handũ ta hau, mĩthiĩre itũ yagĩrĩirũo gũtwarana na ũtaaro ũrĩa ũrĩ thĩinĩ wa Mariko 12:31. Hĩndĩ ciothe nĩ wega kuonanagia ngatho nĩ ũndũ wa ũtugi wa andũ arĩa angĩ.

²¹ Akristiano nĩ makenaga nĩ ũndũ wa iheo nyingĩ iria Ngai amaheete na kũmenya atĩ no ‘marĩe na manyue na makenere wĩra wao wothe mũritũ.’ (Koh. 3:12, 13) Rĩrĩa ‘tweka maũndũ mothe nĩguo tũgoocithie Ngai,’ arĩa manyitanĩte ũgeni o hamwe na arĩa manyitĩtwo ũgeni nĩ makenaga maririkana mahinda macio nĩ ũndũ wa gũkorũo mekĩrĩtwo hinya kĩĩroho.

MAŨNDŨ MA CUKURU

²² Ciana cia Aira a Jehova nĩ igunĩkaga nĩ ũndũ wa kũgĩa na gĩthomo kĩa mũthingi. Irĩ cukuru, nĩ ciĩrutanagĩria kũmenya gũthoma na kwandĩka wega. Maũndũ mangĩ marĩa marutanagwo cukuru no mateithie andũ ethĩ rĩrĩa marerutanĩria gũkinyĩra mĩoroto ya kĩĩroho. Mĩaka-inĩ ĩrĩa marĩ cukuru nĩ merutanagĩria ‘kũririkana Mũũmbi Wao Ũrĩa Mũnene’ na njĩra ya kũiga maũndũ ma kĩĩroho mbere.​—Koh. 12:1.

²³ Angĩkorũo ũrĩ Mũkristiano mwĩthĩ na ũrĩ cukuru, wĩtheme kũnyitanagĩra maũndũ-inĩ matarĩ ma o mũhaka na andũ arĩa angĩ ethĩ matarĩ Aira a Jehova. (2 Tim. 3:1, 2) Tondũ Jehova nĩ aheanĩte ũgitĩri ũrĩa wagĩrĩire, kũrĩ na maũndũ maingĩ ũngĩka nĩguo wĩtheme kũgucĩrĩrio nĩ maũndũ moru ma thĩ ĩno. (Thab. 23:4; 91:1, 2) Kwoguo nĩgetha ũhote kwĩgitĩra, hũthagĩra indo iria Jehova atũheete.​—Thab. 23:5.

²⁴ Akristiano aingĩ ethĩ nĩ magaga kwĩingĩria maũndũ-inĩ marĩa matakonainie na gĩthomo rĩrĩa marĩ cukuru, nĩguo mahote gwĩthema maũndũ ma thĩ. Arutani na arutwo arĩa angĩ no mage gũtaũkĩrũo nĩ itua rĩu. O na kũrĩ ũguo, ũndũ ũrĩa wa bata mũno nĩ gũkenia Ngai. Ũguo nĩ kuuga atĩ mũndũ nĩ abatiĩ kũhũthĩra thamiri yake ĩrĩa ĩmenyeretio nĩ Bibilia na atue itua rĩa kwaga kwĩingĩrania na macindano ma thĩ ĩno kana maũndũ ma gũtũũgĩria bũrũri. (Gal. 5:19, 26) Inyuĩ andũ ethĩ no mũhote kũrũmia ithimi cia Jehova cia ũthingu, mũngĩathĩkĩra ũtaaro wa Kĩĩmaandĩko kuuma kũrĩ aciari anyu Akristiano na mũgĩe na arata ega thĩinĩ wa kĩũngano.

WĨRA NA THIRITŨ

²⁵ Kũringana na Maandĩko, mũtwe wa famĩlĩ nĩwe ũheetwo ũigĩrĩrĩki wa kũhingĩria famĩlĩ yake mabataro. (1 Tim. 5:8) O na kũrĩ ũguo, marĩ ndungata cia Ngai nĩ mamenyaga atĩ magĩrĩirũo kũiga maũndũ ma Ũthamaki mbere ya wĩra wao. (Mat. 6:33; Rom. 11:13) Mangĩkorũo marĩ erutĩri Ngai, na makaiganĩra na gĩa kũrĩa na gĩa kwĩhumba, nĩ marĩhotaga gwĩthema mĩtangĩko o hamwe na mĩtego ya gũthingata indo cia kĩĩmwĩrĩ.​—1 Tim. 6:6-10.

²⁶ Akristiano othe arĩa meyamũrĩire Ngai na nĩ marutaga wĩra wa kĩĩmwĩrĩ nĩ magĩrĩirũo kũririkanaga motaaro ma Bibilia. Nĩ twagĩrĩirũo gũkorũo tũrĩ ehokeku rĩrĩa tũracaria mabataro maitũ, kwoguo nĩ twĩthemaga kwĩingĩrania na maũndũ maroina watho wa Ngai kana wa bũrũri. (Rom. 13:1, 2; 1 Kor. 6:9, 10) Ningĩ nĩ tũririkanaga mogwati ma gũkorũo na thiritũ njũru. Tondũ tũrĩ thigari cia Kristo nĩ twĩthemaga kwĩingĩria biacara-inĩ iragarara ithimi cia Ngai, iria ingĩtũma tũregerie mũrũgamo witũ wa Gĩkristiano, kana tũhwererekere kĩĩroho. (Isa. 2:4; 2 Tim. 2:3, 4) O na ningĩ nĩ twĩthemaga kũnyitanĩra na “Babuloni Ũrĩa Mũnene.”​—Kũg. 18:2, 4; 2 Kor. 6:14-17.

²⁷ Angĩkorũo nĩ tũrũmagia ithimi cia Ngai cia ũthingu tũtirĩhũthagĩra ngwatanĩro itũ ya Gĩkristiano kũhũũra biacara kana kũgaathĩrĩria maũndũ maitũ. Muoroto wa gũkorũo hamwe mĩcemanio-inĩ ya Gĩkristiano na igomano-inĩ ũkoragwo ũrĩ gũthathaiya Jehova. Tũcemanagia nĩguo tũrĩe metha-inĩ yake ya kĩĩroho na “twĩkĩrane ngoro.” (Rom. 1:11, 12; Ahib. 10:24, 25) Mahinda-inĩ ta macio andũ magĩrĩirũo kwarĩrĩria maũndũ ma kĩĩroho.

GŨTŨŨRIA ŨRŨMWE WA GĨKRISTIANO

²⁸ Kũrũmia ithimi cia Jehova cia ũthingu ningĩ nĩ kuuga atĩ andũ ake nĩ magĩrĩirũo ‘gũtũũria ũrũmwe wa roho thĩinĩ wa thayũ ũrĩa ũmanyitithanagia.’ (Ef. 4:1-3) Handũ ha gwĩcarĩria maũndũ ma kwĩguna, o mũndũ athingataga maũndũ mega ma kũguna arĩa angĩ. (1 Thes. 5:15) Hatarĩ nganja roho ũcio nĩguo ũkoragwo kĩũngano-inĩ kĩanyu. Gũtekũmakania kũrĩa tuumĩte, rũrĩrĩ rwitũ, ũhoti witũ, kana gĩthomo kĩrĩa tũrĩ nakĩo, ithuothe tũtongoragio nĩ ithimi imwe cia ũthingu. O na andũ arĩa matarĩ Aira a Jehova nĩ meyonagĩra ũndũ ũcio wa mwanya.​—1 Pet. 2:12.

²⁹ Mũtũmwo Paulo aandĩkire ũũ agĩtĩtĩrithia kĩrĩa gĩtũmaga tũkorũo na ũrũmwe: “Gũkoragwo na mwĩrĩ ũmwe, na roho ũmwe, o ta ũrĩa mwetirũo harĩ kĩĩrĩgĩrĩro kĩmwe kĩrĩa mwetĩirũo; Mwathani ũmwe, wĩtĩkio ũmwe, ũbatithio ũmwe; Ngai ũmwe na nĩwe Ithe wa andũ othe, o we ũrĩ igũrũ rĩa andũ othe na arutaga wĩra kũgerera andũ othe na kũrĩ andũ othe.” (Ef. 4:4-6) Ũndũ ũcio ũronania atĩ twagĩrĩirũo gũkorũo na ũrũmwe harĩ ũtaũku wa morutani ma mũthingi ma Bibilia o hamwe na marĩa marikĩru, na njĩra ĩyo tũkonania atĩ nĩ tũtĩĩte ũnene wa Jehova. Hatarĩ nganja, Jehova nĩ aheete andũ ake rũthiomi rũtheru rwa ũhoro wa ma nĩguo mamũtungatagĩre marĩ na ũrũmwe.​—Zef. 3:9.

³⁰ Arĩa othe mathathayagia Jehova nĩ macanjamũragwo nĩ thayũ na ũrũmwe ũrĩa ũkoragwo thĩinĩ wa kĩũngano gĩa Gĩkristiano. Nĩ twĩyoneire kĩĩranĩro gĩkĩ kĩa Jehova gĩkĩhinga: “Nĩ ngaamaiga marĩ na ũrũmwe, o ta ngʼondu irĩ kiugũ.” (Mik. 2:12) Twendaga gũtũũria ũrũmwe ũcio na njĩra ya kũrũmia ithimi cia Jehova cia ũthingu.

³¹ Gũkena nĩ arĩa metĩkĩrĩkĩte thĩinĩ wa kĩũngano gĩtheru kĩa Jehova! Gwĩtanio na rĩĩtwa rĩa Jehova gũkĩrĩte ũndũ ũngĩ o wothe tũngĩima. O ũrĩa tũrĩĩrutanagĩria gũtũũria ũrata witũ wa goro na Jehova, noguo tũrĩkagĩra kĩyo gĩa kũrũmia ithimi ciake cia ũthingu, na gwĩkĩra ngoro arĩa angĩ macirũmĩrĩre.​—2 Kor. 3:18.