GĨCUNJĨ GĨA 3
Ngai Akoragwo na Muoroto Ũrĩkũ Harĩ Andũ?
1. Muoroto wa Ngai harĩ andũ nĩ ũrĩkũ?
NGAI akoragwo na muoroto mwega mũno harĩ andũ. Oombire mũthuri na mũtumia wa mbere, nĩo Adamu na Hawa, matũũrage mũgũnda-inĩ warĩ mũthaka. Muoroto wake warĩ magĩe ciana, matue thĩ yothe paradiso, na matungate nyamũ.—Kĩambĩrĩria 1:28; 2:8, 9, 15; rora Kohoro ga 6 Mũico-inĩ wa Ibuku.
2. (a) Tũmenyaga atĩa atĩ Ngai nĩ akaahingia muoroto wake? (b) Bibilia yugaga atĩa ũhoro-inĩ wĩgiĩ gũtũũra tene na tene?
2 Hihi nĩ ũkuona ta kũrĩ hĩndĩ tũgaatũũra thĩinĩ wa paradiso? Jehova atwĩraga ũũ: “Nĩ niĩ nduĩte gwĩka ũndũ ũcio, na nĩ ngaaũhingia.” (Isaia 46:9-11; 55:11) Hatarĩ nganja, nĩ akaahingia muoroto wake na gũtirĩ ũndũ ũngĩmũgirĩrĩria. Jehova oigĩte atĩ oombire thĩ arĩ na gĩtũmi. “Ndaamĩũmbire hatarĩ gĩtũmi.” (Isaia 45:18) Endaga andũ matũũre thĩinĩ wa thĩ yothe. Nĩ andũ a mũthemba ũrĩkũ Ngai endaga matũũre thĩinĩ wa thĩ, na endaga matũũre kuo ihinda rĩigana atĩa? Bibilia yugaga ũũ: “Andũ arĩa athingu [kana, athĩki] nĩ makaagaya thĩ, na magaatũũra thĩinĩ wayo tene na tene.”—Thaburi 37:29; Kũguũrĩrio 21:3, 4.
3. Tondũ andũ nĩ marwaraga na magakua-rĩ, kwahoteka wĩyũrie atĩa?
3 No ũmũthĩ andũ nĩ marwaraga na magakua, na kũndũ kũingĩ nĩ marũaga na makoragana. Ma nĩ atĩ, ũcio tiguo warĩ muoroto wa Ngai. Kaĩ gwathiire atĩa, na gwathiire ũguo nĩkĩ? Bibilia noyo tu ĩngĩhota gũtaarĩria.
THŨ YA NGAI
4, 5. (a) Nũũ waririe na Hawa kũgerera nyoka mũgũnda-inĩ wa Edeni? (b) Mũndũ mwĩhokeku angĩgarũrũka atĩa atuĩke mũici?
4 Bibilia ĩtwĩraga atĩ Ngai nĩ akoragwo na thũ, nĩyo “[ĩtagwo] Mũcukani na Shaitani.” Shaitani aahũthĩrire nyoka kwarĩria Hawa thĩinĩ wa mũgũnda wa Edeni. (Kũguũrĩrio 12:9; Kĩambĩrĩria 3:1) Aatũmire yoneke ta arĩ yo yaaragia.—Rora Kohoro ka 7 Mũico-inĩ wa Ibuku.
5 Hihi Ngai nĩwe wombire Shaitani ũrĩa Mũcukani? Aca. Mũraika ũmwe warĩ kũrĩa igũrũ Ngai agĩthondeka thĩ nĩgetha Adamu na Hawa matũũre kuo, nĩwe wagarũrũkire agĩtuĩka Mũcukani. (Ayubu 38:4, 7) Ũndũ ũcio ũngĩahotekire atĩa? Nĩ ta ũrĩa mũndũ mwĩhokeku angĩgarũrũka atuĩke mũici. Ndaaciarirũo arĩ mũici. No angĩrirĩria kĩndũ kĩene na aikare agĩciragia ũhoro wakĩo, merirĩria macio no mathiĩ na mbere kũgĩa na hinya. Angĩcoka one kamweke, no kũiya angĩiya kĩndũ kĩu. Na njĩra ĩyo agatuĩka mũici.—Thoma Jakubu 1:13-15; rora Kohoro ga 8 Mũico-inĩ wa Ibuku.
6. Mũraika ũmwe aatuĩkire thũ ya Ngai atĩa?
6 Ũguo nĩguo gwathiire harĩ mũraika ũcio wacokire gũtuĩka Shaitani. Thutha wa Jehova kũũmba Adamu na Hawa, aameerire magĩe ciana na ‘maiyũrie thĩ.’ (Kĩambĩrĩria 1:27, 28) Kwahoteka mũraika ũcio eeciririe ũũ: ‘Andũ acio othe no mathathayagie handũ ha gũthathaiya Jehova!’ O ũrĩa eeciragia ũndũ ũcio, noguo aawĩriragĩria. Eendaga andũ mamũthathayagie. Kwoguo, akĩheenia Hawa na akĩmũhĩtithia. (Thoma Kĩambĩrĩria 3:1-5.) Nĩ ũndũ ũcio, agĩtuĩka Shaitani kana Mũcukani, thũ ya Ngai.
7. (a) Adamu na Hawa maakuire nĩkĩ? (b) Nĩ kĩĩ gĩtũmaga tũkũre na tũkue?
7 Adamu na Hawa nĩ maagire gwathĩkĩra Ngai na makĩrĩa itunda rĩrĩa maakaanĩtio. (Kĩambĩrĩria 2:17; 3:6) Nĩ meehĩirie Jehova, na thutha ũcio magĩkua o ta ũrĩa Jehova ooigĩte. (Kĩambĩrĩria 3:17-19) Tondũ ciana iria maacokire kũgĩa ciarĩ na mehia, o nacio nĩ ciakuire. (Thoma Aroma 5:12.) Nĩguo tũtaũkĩrũo kĩrĩa gĩatũmire o na ciana ciao ikorũo irĩ na mehia, reke twĩcirie ngerekano ĩno. Ta wĩcirie ũkĩruga mĩgate kana keki na karaĩ kahonderu handũ. Mũgate kana keki o yothe ũkũrugĩra hau ĩgũkorũo ĩrĩ honderu o ta karaĩ kau. Rĩrĩa Adamu aagire gwathĩkĩra Ngai, aatuĩkire mũndũ mwĩhia. Tondũ tũrĩ ciana cia Adamu, ithuothe tũkoragwo na mehia o take. Kwoguo, tondũ ithuothe tũrĩ ehia nĩ tũkũraga na tũgakua.—Aroma 3:23; rora Kohoro ga 9 Mũico-inĩ wa Ibuku.
8, 9. (a) Shaitani eendaga Adamu na Hawa metĩkie ũndũ ũrĩkũ? (b) Jehova aagire kũũraga aremi acio o rĩo nĩkĩ?
8 Shaitani nĩ aambĩrĩirie ũremi kwerekera Jehova rĩrĩa aaheenereirie Adamu na Hawa mage gwathĩkĩra Ngai. Eendaga Adamu na Hawa metĩkie atĩ Jehova nĩ mũheenania na mwathani mũũru ũrĩa ũtaamendagĩra maũndũ mega. Shaitani eendaga kuuga atĩ ti Ngai ũbatiĩ kwĩra andũ ũrĩa magĩrĩirũo gwĩka, na atĩ Adamu na Hawa nĩo maagĩrĩirũo gwĩtuĩra wega na ũũru. Jehova angĩekire atĩa? Nĩ angĩoragire aremi acio nĩguo aniine ũremi ũcio. No hihi ũndũ ũcio nĩ ũngĩonanirie atĩ Shaitani nĩ mũheenania? Aca.
9 Nĩ ũndũ ũcio, Jehova ndoragire aremi acio o hĩndĩ ĩyo. Handũ ha ũguo, aaheire andũ ihinda meyathe. Ũndũ ũcio nĩ ũngĩonanirie wega atĩ Shaitani nĩ mũheenania na wonanie atĩ Jehova nĩ oĩ kĩrĩa gĩtwagĩrĩire. Nĩ tũkeeruta makĩria ũhoro ũcio thĩinĩ wa Gĩcunjĩ gĩa 11. No wee wonaga atĩa itua rĩu Adamu na Hawa maatuire? Hihi nĩ maagĩrĩirũo gwĩtĩkia Shaitani na maremere Ngai? Kĩrĩa gĩothe maarĩ nakĩo nĩ Jehova wamaheete. Aamaheete muoyo mũkinyanĩru, kũndũ kwega gwa gũikara, na wĩra mwega maakenagĩra. No hatirĩ ũndũ o na ũmwe mwega Shaitani aamekĩire. Korũo warĩ kuo hĩndĩ ĩyo-rĩ, ũngĩekire atĩa?
10. Nĩ itua rĩrĩkũ rĩa bata o ũmwe witũ abatiĩ gũtua?
10 Mahinda-inĩ maya o mũndũ nĩ arabatara gũtua itua, o ta ũrĩa Adamu na Hawa maabataraga gwĩka, na muoyo witũ wĩhocetie harĩ itua rĩu. No tũthuure gwathĩkĩra Jehova arĩ we Mwathani witũ na tuonanie atĩ Shaitani nĩ mũheenania, kana tũthuure kũrũmĩrĩra Shaitani. (Thaburi 73:28; thoma Thimo 27:11.) Ũmũthĩ no andũ anini mũno mathĩkagĩra Ngai. Ũrĩa kũrĩ nĩ atĩ, ti Ngai ũtongoragia thĩ ĩno. No angĩgĩkorũo tiwe ũmĩtongoragia-rĩ, nũũ ũkĩmĩtongoragia?
NŨŨ ŨTONGORAGIA THĨ?
Korũo mothamaki mothe ma thĩ ti ma Shaitani-rĩ, hihi nĩ angĩerire Jesu atĩ nĩ ekũmũhe?
11, 12. (a) Tũmenyaga ũndũ ũrĩkũ kuumana na kĩrĩa Shaitani erĩire Jesu? (b) Nĩ maandĩko marĩkũ monanagia atĩ Shaitani nĩwe ũtongoragia thĩ?
11 Jesu nĩ aamenyaga nũũ kũna ũtongoragia thĩ. Hĩndĩ ĩmwe, Shaitani nĩ “[aamuonirie] mothamaki mothe ma thĩ na riri wamo.” Agĩcoka akĩmwĩra ũũ: “Maũndũ maya mothe nĩ ngũkũhe ũngĩndurĩria maru wĩke gĩĩko gĩa gũũthathaiya.” (Mathayo 4:8, 9; Luka 4:5, 6) Ta wĩyũrie, ‘Korũo mothamaki macio matiarĩ ma Shaitani-rĩ, hihi nĩ angĩoigire atĩ nĩ ekũhe Jesu?’ Aca. Mothamaki mothe nĩ ma Shaitani.
12 No wĩyũrie ũũ: ‘Kũngĩhoteka atĩa Shaitani akorũo nĩwe ũtongoragia thĩ? Na githĩ Jehova Ngai Mwene-Hinya-Wothe tiwe wombire igũrũ na thĩ?’ (Kũguũrĩrio 4:11) Hatarĩ nganja nĩwe waciũmbire, no Jesu ooigire atĩ Shaitani nĩwe “mũnene wa thĩ ĩno.” (Johana 12:31; 14:30; 16:11) Mũtũmwo Paulo eetire Shaitani ũrĩa Mũcukani “ngai wa mũtabarĩre ũyũ wa maũndũ.” (2 Akorintho 4:3, 4) Nake mũtũmwo Johana aandĩkire atĩ “thĩ yothe ĩkoragwo rungu rwa hinya wa ũrĩa mũũru.”—1 Johana 5:19.
THĨ YA SHAITANI ĨKAANIINWO ATĨA?
13. Tũrabatara thĩ njerũ nĩkĩ?
13 Thĩ ĩno ĩrathiĩ o na mbere gũthũka. Kũrĩ na mbaara, ungumania, ũhinga, na ũhinya. O na andũ mangĩgeria atĩa matingĩhota kũniina mathĩna macio mothe. No kahinda gatarĩ kũraihu, Ngai nĩ ekũniina thĩ ĩno njũru hĩndĩ ya mbaara ya Hari–Magedoni, na arehe thĩ yake njerũ ĩrĩa ĩgaakorũo na ũthingu.—Kũguũrĩrio 16:14-16; rora Kohoro ga 10 Mũico-inĩ wa Ibuku.
14. Nũũ Ngai athuurĩte atuĩke Mũthamaki wa Ũthamaki wake? Bibilia yarathĩte atĩa igũrũ rĩgiĩ Jesu?
14 Jehova nĩ athuurĩte Jesu Kristo atuĩke Mũthamaki wa thirikari Yake ya igũrũ kana Ũthamaki Wake. Mĩaka ngiri nyingĩ mĩhĩtũku, Bibilia nĩ yarathĩte atĩ Jesu nĩ angĩgaathana arĩ “Mũnene wa Thayũ,” na ĩkonania atĩ thirikari yake ĩngĩkehanda tene na tene. (Isaia 9:6, 7) Jesu aarutire arũmĩrĩri ake mahoyage igũrũ rĩgiĩ thirikari ĩyo rĩrĩa aameerire mahoyage ũũ: “Ũthamaki waku nĩ ũũke. Wendi waku nĩ wĩkwo gũkũ thĩ o ta kũu igũrũ.” (Mathayo 6:10) Thĩinĩ wa Gĩcunjĩ gĩa 8 nĩ tũkeeruta ũrĩa Ũthamaki wa Ngai ũkeeheria mothamaki macio mangĩ, na ũtuĩke noguo tu ũrathana thĩinĩ wa thĩ. (Thoma Danieli 2:44.) Ũthamaki ũcio wa Ngai nĩ ũgaacoka ũtue thĩ yothe paradiso.—Rora Kohoro ga 11 Mũico-inĩ wa Ibuku.
THĨ NJERŨ ĨRĨ HAKUHĨ!
15. “Thĩ njerũ” nĩ kĩĩ?
15 Bibilia ĩranĩire ũũ: “Kũrĩ na igũrũ rĩerũ na thĩ njerũ twetereire, na thĩinĩ wacio nĩ gũgaatũũra ũthingu.” (2 Petero 3:13; Isaia 65:17) Rĩrĩa Bibilia ĩkwaria ũhoro wĩgiĩ “thĩ,” rĩmwe ĩkoragwo ĩkĩaria ũhoro wa andũ arĩa marĩ thĩinĩ wa thĩ. (Kĩambĩrĩria 11:1) Kwoguo, “thĩ njerũ” ĩrĩ na ũthingu nĩ andũ arĩa othe mathĩkagĩra Ngai na makarathimwo nĩwe.
16. Nĩ kĩheo kĩrĩkũ Ngai akaahe arĩa magaatũũra thĩinĩ wa thĩ njerũ, na twagĩrĩirũo gwĩka atĩa nĩguo tũkaaheo kĩheo kĩu?
16 Jesu eeranĩire atĩ arĩa othe magaatũũra thĩinĩ wa thĩ njerũ ya Ngai nĩ makaaheo “muoyo wa tene na tene.” (Mariko 10:30) Twagĩrĩirũo gwĩka atĩa nĩguo tũkaaheo kĩheo kĩu? Nĩguo wone macokio, thoma Johana 3:16 na 17:3. Reke rĩu tuone ũrĩa Bibilia yugaga igũrũ rĩgiĩ ũtũũro thĩinĩ wa Paradiso gũkũ thĩ.
17, 18. Tũmenyaga atĩa atĩ nĩ gũgaakorũo na thayũ na ũgitĩri thĩinĩ wa thĩ yothe?
17 Waganu, mbaara, wĩki-naĩ, na ũhinya nĩ igaathira. Andũ othe aganu nĩ makaaniinwo. (Thaburi 37:10, 11) Ngai nĩ “[akaaniina] mbaara kũndũ guothe thĩinĩ wa thĩ.” (Thaburi 46:9; Isaia 2:4) Thĩ ĩgaakorũo ĩiyũire andũ mendete Ngai na mamwathĩkagĩra. Gũgaakorũo na thayũ tene na tene.—Thaburi 72:7.
18 Andũ a Jehova magaakorũo na ũgitĩri. Mahinda-inĩ ma Bibilia, rĩrĩa Aisiraeli maathĩkagĩra Ngai, maakoragwo na ũgitĩri tondũ nĩ aamagitagĩra. (Maũndũ ma Alawii 25:18, 19) Thĩinĩ wa Paradiso, gũtirĩ mũndũ kana kĩndũ tũgetigagĩra. Tũgaaikaraga tũrĩ na ũgitĩri hĩndĩ ciothe.—Thoma Isaia 32:18; Mika 4:4.
19. Tũngĩkorũo na ma nĩkĩ atĩ nĩ gũgaakorũo na irio nyingĩ thĩinĩ wa thĩ njerũ?
19 Gũgaakorũo na irio nyingĩ. Bibilia yugaga ũũ: “Nĩ gũgaakorũo na ngano nyingĩ thĩinĩ wa thĩ; ĩgaakorũo ĩrĩ nyingĩ mũno irĩma igũrũ.” (Thaburi 72:16) Jehova, “o we Ngai witũ, nĩ agaatũrathima,” na “thĩ nĩ ĩkaaruta maciaro mayo.”—Thaburi 67:6.
20. Tũmenyaga atĩa atĩ thĩ nĩ ĩgaatuĩka paradiso?
20 Thĩ yothe nĩ ĩgaatuĩka paradiso. Andũ magaakorũo na nyũmba njega na mĩgũnda mĩthaka. (Thoma Isaia 65:21-24; Kũguũrĩrio 11:18.) Thĩ yothe ĩgaathakara o ta mũgũnda wa Edeni. Jehova nĩ agaatũheaga kĩrĩa gĩothe tũrabatara. Bibilia yugaga ũũ igũrũ rĩgiĩ Jehova: “Ũkumbatũraga guoko gwaku na ũkahingia merirĩria ma kĩndũ gĩothe kĩrĩ muoyo.”—Thaburi 145:16.
21. Tũmenyaga atĩa atĩ nĩ gũgaakorũo na thayũ gatagatĩ ka andũ na nyamũ?
21 Nĩ gũgaakorũo na thayũ gatagatĩ ka andũ na nyamũ. Nyamũ itigaacoka kũgera andũ ngero. Twana tũtigetigĩraga nginya tũrĩ hakuhĩ na nyamũ iria ũmũthĩ ikoragwo irĩ njũru.—Thoma Isaia 11:6-9; 65:25.
22. Jesu ageekĩra atĩa arĩa othe arwaru?
22 Gũtirĩ mũndũ ũkaarwara. Jesu nĩ aahonirie andũ aingĩ rĩrĩa aarĩ gũkũ thĩ. (Mathayo 9:35; Mariko 1:40-42; Johana 5:5-9) No arĩ Mũthamaki wa Ũthamaki wa Ngai, akaahonia andũ othe. Gũtirĩ mũndũ ũgaacoka kuuga ũũ: “Ndĩ mũrwaru.”—Isaia 33:24; 35:5, 6.
23. Kũrĩ na kĩĩrĩgĩrĩro kĩrĩkũ harĩ arĩa makuĩte?
23 Arĩa makuĩte nĩ magaacokio muoyo. Ngai nĩ eranĩire atĩ nĩ akaariũkia andũ milioni nyingĩ arĩa makuĩte. “Nĩ gũkaariũkio andũ arĩa athingu na arĩa matarĩ athingu.”—Thoma Johana 5:28, 29; Atũmwo 24:15.
24. Ũiguaga atĩa igũrũ rĩgiĩ gũtũũra thĩinĩ wa Paradiso?
24 Ithuothe tũrĩ na mweke wa gũthuura. No tũthuure kwĩruta igũrũ rĩgiĩ Jehova na tũmũtungatĩre, kana tũthuure gwĩka ũrĩa tũkwenda. Tũngĩthuura gũtungatĩra Jehova, no tũkorũo na ũtũũro mwega mahinda mokĩte. Rĩrĩa mũndũ ũmwe eerire Jesu akaamũririkana thutha wa gũkua, Jesu aamwĩrire ũũ: “Nĩ ũgaakorũo hamwe na niĩ thĩinĩ wa Paradiso.” (Luka 23:43) Reke rĩu twĩrute ũhoro makĩria wĩgiĩ Jesu Kristo na ũrĩa agaatũma ciĩranĩro cia Ngai ihinge.