Adamu na Hawa nĩ Maaremeire Ngai

Mũthenya ũmwe rĩrĩa Hawa aarĩ wiki, nĩ aarĩirio nĩ nyoka. Yamũririe ũũ: ‘Hihi nĩ ũhoro wa ma atĩ Ngai nĩ amũgirĩtie kũrĩa matunda ma mĩtĩ yothe?’ Hawa aamĩcokeirie ũũ: ‘Tũrĩ etĩkĩrie kũrĩa matunda ma mĩtĩ yothe tiga o ũmwe tu. Tũngĩrĩa matunda ma mũtĩ ũcio no gũkua tũgũkua.’ Nayo nyoka ĩkĩmwĩra ũũ: ‘Mũtigũkua. No mwarĩa, mũkũhaana ta Ngai.’ Hihi ũcio warĩ ũhoro wa ma? Aca. Macio maarĩ maheeni. No Hawa nĩ eetĩkirie nyoka. O ũrĩa Hawa eeroragĩra itunda rĩu, noguo aarĩcumĩkagĩra. Aarĩtuire akĩrĩa, agĩcoka akĩhe Adamu. Adamu nĩ ooĩ atĩ mangĩaremeire Ngai nĩ mangĩakuire, no nĩ aarĩire itunda rĩu.

Mũthenya o ro ũcio, Jehova nĩ aarĩirie Adamu na Hawa. Nĩ aamoririe kĩrĩa gĩatũmire mage kũmwathĩkĩra. Hawa eegwatirie nyoka, nake Adamu akĩĩgwatia Hawa. Tondũ Adamu na Hawa nĩ maaregire gwathĩka, Jehova nĩ aamaingatire mũgũnda-inĩ wa Edeni. Nĩguo atigĩrĩre atĩ gũtirĩ hĩndĩ magaacoka mũgũnda-inĩ ũcio, Jehova nĩ aaigire araika na rũhiũ rwa njora rwa mwaki kĩhingo-inĩ kĩa mũgũnda ũcio.

Jehova nĩ ooigire atĩ o na ũrĩa waheenetie Hawa nĩ angĩaherithirio. Ũhoro wa ma nĩ atĩ nyoka tiyo yaheenirie Hawa tondũ nyoka itiaragia. Nĩ mũraika ũmwe mũũru watũmire nyoka ĩyo yarie. Mũraika ũcio etagwo Shaitani kana Mũcukani. Eekire ũguo nĩguo aheenie Hawa. Jehova nĩ akaaniina Shaitani mahinda mokĩte, nĩguo atige kũheenagia andũ mageka maũndũ moru.