Iburahimu na Sara Gwathĩkĩra Ngai

Nĩ kwarĩ na taũni yetagwo Uru hakuhĩ na itũũra rĩa Babeli, na andũ aingĩ a kũu maathathayagia ngai nyingĩ handũ ha Jehova. No nĩ kwarĩ mũndũ ũmwe wathathayagia Jehova taũni-inĩ ĩyo ya Uru, na eetagwo Iburahimu.

Jehova eerire Iburahimu ũũ: ‘Tiga mũciĩ waku na andũ anyu, ũthiĩ bũrũri ũrĩa ngũkuonia.’ Agĩcoka akĩmwĩra: ‘Nĩ ũgaatuĩka rũrĩrĩ rũnene, na nĩ ngekĩra andũ aingĩ maũndũ mega thĩinĩ wa thĩ yothe nĩ ũndũ waku.’

Iburahimu ndaamenyaga kũrĩa Jehova eendaga athiĩ, no nĩ aamwĩhokire. Marĩ hamwe na mũtumia wake Sara, Ithe wao Tera, na mũndũ ũmwe wa famĩlĩ yao wetagwo Loti, nĩ maabangire indo ciao na makĩambĩrĩria thabarĩ.

Iburahimu aarĩ na mĩaka 75 rĩrĩa maakinyire na famĩlĩ yake bũrũri-inĩ ũrĩa Jehova aamwĩrĩire. Bũrũri ũcio wetagwo Kanaani. Arĩ kũu, Ngai nĩ aamwarĩirie na akĩmwĩra ũũ: ‘Bũrũri ũyũ wothe ũrona ũkũrigicĩirie nĩ ngaũhe ciana ciaku.’ Ĩndĩ Iburahimu na Sara maarĩ akũrũ na matiarĩ na ciana. Gũkĩrĩ ũguo-rĩ, Jehova angĩahingirie kĩĩranĩro kĩu atĩa?