Ririkanai Mũtumia wa Loti

Loti aaikaraga na mamawe Iburahimu, bũrũri-inĩ wa Kanaani. Thutha wa ihinda, nĩ maagĩire nyamũ nyingĩ mũno cia kũrĩithia ũũ atĩ kũrĩa maikaraga gũtingĩamaiganire marĩ erĩ. Iburahimu akĩra Loti ũũ: ‘Tũtingĩikara handũ hamwe nawe rĩngĩ. Ndagũthaitha ũthuure mwena ũrĩa ũkwenda gũthiĩ, na niĩ nĩ ngũthiĩ ũcio ũngĩ.’ Na githĩ ũndũ ũcio ndũronania atĩ Iburahimu ndaarĩ na mwĩyendo?

Loti nĩ oonire mwena mũthaka wa bũrũri ũcio hakuhĩ na itũũra rĩa Sodomu. Warĩ na maĩ maingĩ na nyeki nduru. Nĩ ũndũ ũcio agĩthuura mwena ũcio na agĩthamĩra kũu na famĩlĩ yake. Thutha ũcio makĩambĩrĩria gũikara itũũra-inĩ rĩa Sodomu.

Andũ a Sodomu na itũũra rĩrĩa rĩarĩ hakuhĩ rĩa Gomora maarĩ aganu mũno, nginya Jehova akĩona nĩ wega aniine matũũra macio merĩ. Ĩndĩ Ngai nĩ eendaga kũhonokia Loti na famĩlĩ yake, na nĩ ũndũ ũcio agĩtũma araika erĩ mathiĩ mameere ũũ: ‘Ũkĩrai! Umai itũũra-inĩ rĩrĩ tondũ Jehova nĩ ekũrĩniina!’

Loti ndaaumire o hĩndĩ ĩyo. Nĩ aahũthĩrĩirie. Nĩ ũndũ ũcio araika acio makĩnyita Loti, mũtumia wake, na airĩtu ao erĩ moko na makĩmaruta itũũra-inĩ rĩu o na ihenya makĩmeera: ‘Mwĩtharei nĩguo mũhonokie mĩoyo yanyu, na mũtikehũgũre. Mwehũgũra no mũgũkua!’

Rĩrĩa maakinyire itũũra-inĩ rĩa Zoaru, Jehova nĩ aareheire matũũra ma Sodomu na Gomora mwaki uumĩte igũrũ. Matũũra macio merĩ nĩ maaniinirũo biũ. Rĩrĩa mũtumia wa Loti eehũgũrire akĩaga gwathĩkĩra Jehova, aatuĩkire gĩtugĩ gĩa cumbĩ! No Loti na airĩtu ake nĩ maahonokirio tondũ nĩ maathĩkĩire Jehova. No mũhaka akorũo nĩ maaiguire ũũru mũno nĩ ũndũ wa mũtumia wa Loti kwaga gwathĩka. Ũndũ ũcio ũratũruta ũrĩa gwathĩkĩra Jehova kũrĩ kwa bata.