Igerio rĩa Wĩtĩkio

Iburahimu nĩ aarutĩte mũrũ wake Isaaka kwenda Jehova na kwĩhoka ciĩranĩro ciake ciothe. No Isaaka arĩ na mĩaka 25 ũguo, Jehova nĩ eerire Iburahimu eke ũndũ warĩ mũritũ mũno. Ũndũ ũcio warĩ ũrĩkũ?

Ngai eerire Iburahimu ũũ: ‘Oya mũrũguo ũcio wa mũmwe na ũthiĩ ũmũrute igongona kĩrĩma-inĩ bũrũri-inĩ wa Moria.’ Iburahimu ndaamenyaga Jehova aamwĩrire eke ũguo nĩkĩ. Ĩndĩ no aathĩkĩire Jehova.

Mũthenya ũyũ ũngĩ rũcinĩ tene, Iburahimu nĩ ooire Isaaka na ndungata ciake igĩrĩ na magĩthiĩ merekeire Moria. Thutha wa thikũ ithatũ, nĩ moonaga irĩma irĩ haraihu. Iburahimu akĩra ndungata ciake cieterere hau, nake na Isaaka mathiĩ makarute igongona. Iburahimu akĩnengera Isaaka ngũ akuue, nake akĩoya kahiũ. Isaaka akĩũria ithe ũũ: ‘Ĩrĩ kũ nyamũ ĩrĩa tũrathiĩ kũruta igongona?’ Iburahimu akĩmũcokeria: ‘Mũrũ wakwa, Jehova nĩ egũtũhe.’

Rĩrĩa maakinyire kĩrĩma-inĩ kĩu, nĩ maakire kĩgongona. Iburahimu agĩcoka akĩoha Isaaka moko na magũrũ na akĩmũigĩrĩra kĩgongona-inĩ kĩu.

Iburahimu akĩoya kahiũ na igũrũ. O hĩndĩ ĩyo, mũraika wa Jehova agĩtana kuuma igũrũ akiuga ũũ: ‘Iburahimu! Ndũgeke mũrũguo ũndũ mũũru! Rĩu nĩ ndamenya atĩ ũrĩ na wĩtĩkio harĩ Ngai tondũ nĩ ũkwĩhaarĩirie kũruta mwana waku igongona.’ Thutha ũcio, Iburahimu akĩona ndũrũme ĩhatĩte hĩa kĩhinga-inĩ. Akĩohora Isaaka na ihenya na akĩruta ndũrũme ĩyo igongona.

Kuuma mũthenya ũcio, Jehova eetaga Iburahimu mũrata wake. Hihi nĩ ũĩ nĩkĩ? Tondũ Iburahimu eekaga ũrĩa wothe Jehova eendaga, o na rĩrĩa ataramenya gĩtũmi kĩa Jehova kũmwĩra eke ũguo.

Jehova nĩ aacokerire o rĩngĩ kĩĩranĩro gĩkĩ eerĩte Iburahimu: ‘Nĩ ngaakũrathima na ndũme njiarũa ciaku cingĩhe.’ Ũguo nĩ kuuga atĩ Jehova nĩ angĩarathimire andũ othe ega kũgerera harĩ Iburahimu.