Jakubu na Esau nĩ Maacokirie Thayũ

Jehova nĩ eerire Jakubu atĩ nĩ ekũmũgitĩra o ta ũrĩa aagitĩrire Iburahimu na Isaaka. Jakubu aathiire gũikaraga Harani, akĩhikanĩria kuo, akĩgĩa na famĩlĩ nene, na agĩtonga mũno.

Thutha ũcio Jehova nĩ eerire Jakubu ũũ: ‘Coka bũrũri-inĩ wanyu.’ Nĩ ũndũ ũcio, Jakubu na famĩlĩ yake makĩaambĩrĩria thabarĩ ya gũcoka. Marĩ o njĩra-inĩ magĩthiĩ, ndungata ciake nĩ ciokire kũrĩ we ikĩmwĩra: ‘Mũrũ wa nyũkwa Esau arĩ njĩra-inĩ okĩte hamwe na arũme 400!’ Jakubu nĩ eetigagĩra Esau ndakamwĩke ũũru hamwe na famĩlĩ yake. Aahoire Jehova ũũ: ‘Ndagũthaitha ũũhonokie, kuuma kũrĩ mũrũ wa maitũ.’ Mũthenya ũyũ ũngĩ Jakubu nĩ aatũmanĩire Esau kĩheo kĩa ngʼondu nyingĩ, mbũri, ngʼombe, ngamĩra, na ndigiri.

Ũtukũ ũcio rĩrĩa Jakubu aarĩ wiki, nĩ oonire mũraika! Mũraika ũcio akĩambĩrĩria kũgiana nake. Maagianire nginya gũgĩkĩa. O na gũtuĩka Jakubu nĩ aaguraririo, ndaakuire ngoro. Mũraika ũcio aamwĩrire ũũ: ‘Rĩu reke thiĩ.’ Ĩndĩ Jakubu akĩmwĩra: ‘Ndikũreka ũthiĩ ũtandathimĩte.’

Thutha ũcio mũraika ũcio nĩ aarathimire Jakubu. Ũndũ ũcio nĩ watũmire Jakubu amenye atĩ Jehova ndangĩarekire Esau amwĩke ũũru.

Rũcinĩ rũu, Jakubu nĩ aarorire na akĩona Esau arĩ haraihu arĩ na arũme 400. Jakubu aathiire arĩ mbere ya famĩlĩ yake na akĩinamĩrĩra mbere ya mũrũ wa nyina maita mũgwanja. Nake Esau agĩtengʼera kũrĩ Jakubu na akĩmũhĩmbĩria. Makĩrĩranĩra hamwe marĩ eerĩ na magĩcokia thayũ. Ũgwĩciria Jehova aaiguire atĩa nĩ ũndũ wa ũrĩa Jakubu aacokirie thayũ?

Thutha ũcio Esau agĩcoka gwake mũciĩ, nake Jakubu agĩthiĩ na mbere na thabarĩ. Jakubu aarĩ na anake 12. Meetagwo Rubeni, Simeoni, Lawii, Juda, Dani, Nafitali, Gadi, Asheri, Isakaru, Zebuluni, Jusufu, na Benjamini. Ũmwe wa anake acio ũrĩa wetagwo Jusufu, nĩwe Jehova aahũthĩrire kũhonokia andũ ake. Hihi nĩ ũĩ eekire ũguo atĩa? Nĩ tũkuona.