Kũrĩkanĩra na Jehova

Kĩndũ mĩeri ĩĩrĩ kuuma Aisiraeli mauma Misiri, nĩ maakinyire Kĩrĩma-inĩ gĩa Sinai na makĩamba hema ho. Jehova agĩta Musa ambate kĩrĩma-inĩ na akĩmwĩra: ‘Nĩ ndahonokirie Aisiraeli. Mangĩnjathĩkĩra na mathikagĩrĩrie maathani makwa, megũtuĩka andũ akwa a mwanya.’ Musa agĩikũrũka kuuma kĩrĩma-inĩ na agĩthiĩ akĩra Aisiraeli ũrĩa Jehova ooigĩte. Meekire atĩa? Maauigire ũũ: ‘Tũrĩkaga ũrĩa wothe Jehova atwĩra twĩke.’

Musa nĩ aacokire akĩambata kĩrĩma-inĩ rĩngĩ. Jehova akĩmwĩra ũũ: ‘Mũthenya-inĩ wa gatatũ nĩ ngaaria na Aisiraeli. Meere matikagerie kwambata Kĩrĩma-inĩ gĩa Sinai.’ Musa agĩikũrũka na akĩmeera mehaarĩrie nĩguo mathikĩrĩrie Jehova akĩmarĩria.

Mũthenya-inĩ wa gatatũ, Aisiraeli makĩona heni na itu rĩirũ Kĩrĩma-inĩ gĩa Sinai. Magĩcoka makĩigua marurumĩ na mũgambo wa coro. Thutha ũcio Jehova agĩikũrũka kĩrĩma-inĩ kĩu arĩ thĩinĩ wa mwaki. Aisiraeli makĩmaka mũno nginya makĩambĩrĩria kũinaina. Kĩrĩma kĩu gĩothe gĩkĩiyũra ndogo na gĩkĩinaina mũno, naguo mũgambo wa coro ũgĩthiĩ ũnenehete. Ngai agĩcoka akiuga: ‘Niĩ nĩ niĩ Jehova. Ndũkanahoe ngai ingĩ tiga niĩ.’

Musa agĩcoka akĩambata kĩrĩma-inĩ rĩngĩ na Jehova akĩmũhe mawatho megiĩ ũrĩa andũ maagĩrĩirũo nĩ kũmũtungatĩra, na ũrĩa maagĩrĩirũo nĩ gwĩka maũndũ. Musa akĩandĩka mawatho macio agĩcoka akĩmathomera Aisiraeli. Nao Aisiraeli makiuga ũũ: ‘Tũrĩkaga ũrĩa wothe Jehova atwĩra twĩke.’ Na njĩra ĩyo, makĩgĩa kĩrĩko na Ngai. No hihi nĩ mangĩagĩtũũririe?