Gideoni Gũtooria Amidiani

O ũrĩa mahinda maathiaga, Aisiraeli nĩ maatiganĩirie Jehova rĩngĩ na makĩambĩrĩria gũthathaiya ngai cia maheeni. Kwa ihinda rĩa mĩaka mũgwanja, Amidiani nĩ maaiyaga nyamũ cia kũrĩithia cia Aisiraeli na magathũkangia irio ciao. Nĩguo Aisiraeli matigatharĩkĩrũo nĩ Amidiani, maathiaga kwĩhitha ngurunga-inĩ na irĩma-inĩ. Nĩ maathaithire Jehova amahonokie, na nĩ ũndũ ũcio Jehova agĩtũma mũraika kũrĩ mũndũ wetagwo Gideoni. Mũraika ũcio eerire Gideoni ũũ: ‘Jehova nĩ agũthuurĩte nĩguo ũrũĩrĩre Aisiraeli.’ Gideoni akĩmũũria: ‘Ingĩhota atĩa kũhonokia Aisiraeli? Niĩ ndĩ mũndũ ũtarĩ bata.’

No Gideoni angĩamenyire atĩa atĩ Jehova nĩ aamũthuurĩte? Aaigire guoya wa ngʼondu nja na akĩra Jehova ũũ: ‘Angĩkorũo guoya ũyũ wa ngʼondu ũgaakorũo ũrĩ mũigũ nĩ ũndũ wa ime rũciũ rũcinĩ, na gũkũ nja guothe gũkorũo gwĩ kũũmũ, nĩ ngaamenya atĩ nĩ ũrenda ngahonokie Aisiraeli.’ Mũthenya ũyũ ũngĩ rũcinĩ, guoya ũcio wa ngʼondu warĩ mũigũ nĩ ũndũ wa ime, no nja guothe kwarĩ kũũmũ. No Gideoni agĩcoka akiuga atĩ nĩ ekwenda mũthenya ũyũ ũngĩ rũcinĩ guoya ũcio wa ngʼondu ũkorũo ũrĩ mũũmũ, na kũu nja guothe gũkorũo kũrĩ kũigũ. Rĩrĩa ũndũ ũcio wahingire, Gideoni nĩ aagĩire na ma biũ atĩ Jehova nĩ aamũthuurĩte. Kwoguo agĩcokanĩrĩria thigari ciake nĩguo mathiĩ makarũe na Amidiani.

Jehova eerire Gideoni ũũ: ‘Nĩ ngũhootanĩra Aisiraeli. Na tondũ ũrĩ na thigari nyingĩ mũno, mũngĩhootana no mwĩcirie atĩ mwahootana na hinya wanyu. Ĩra mũndũ wothe ũrĩ na guoya ainũke.’ Nĩ ũndũ ũcio, thigari 22,000 igĩcoka mũciĩ, gũgĩtigara thigari 10,000. Jehova agĩcoka akiuga: ‘O na rĩu andũ acio no aingĩ mũno. Matware rũũĩ-inĩ na ũmeere manyue maĩ. Arĩa mekũnyua maĩ makĩĩhũgaga nĩ ũndũ wa thũ, no o tu ũgũtigwo nao.’ Andũ 300 no o tu maanyuire maĩ makĩĩhũgaga. Jehova akiuga atĩ andũ acio 300 nĩ mangĩahootire mbũtũ ya Amidiani ya thigari 135,000.

Ũtukũ ũcio Jehova eerire Gideoni ũũ: ‘Rĩrĩ nĩrĩo ihinda rĩa gũtharĩkĩra Amidiani!’ Gideoni akĩhe thigari ciake coro na nyũngũ irĩ na imũrĩ thĩinĩ. Agĩciĩra ũũ: ‘Ndorai na mwĩke o ũrĩa ngwĩka.’ Gideoni akĩhuuha coro wake, akĩũraga nyũngũ, akĩhiũria kĩmũrĩ, na akĩanĩrĩra akiuga ũũ: ‘Nĩ rũhiũ rwa Jehova na rwa Gideoni!’ Nacio thigari ciake ciothe 300 igĩka o taguo. Amidiani makĩmaka mũno na makĩũra merekeire mĩena yothe. Nĩ ũndũ wa gũtukanĩrũo makĩambĩrĩria kũrũa o ene. O rĩngĩ, Jehova agĩteithia Aisiraeli kũhoota thũ ciao.