Jehova Kũgitĩra Jehoshafatu

Jehoshafatu, Mũthamaki wa Juda, nĩ aanangire magongona ma Baali na ngai cia mĩhianano bũrũri-inĩ ũcio. Eendaga andũ mamenye mawatho ma Jehova. Kwoguo agĩtũma anene na Alawii mathiĩ Juda guothe nĩguo marutane mawatho ma Jehova.

Mabũrũri marĩa maarĩ hakuhĩ na Juda nĩ meetigagĩra gũtharĩkĩra andũ a Juda tondũ nĩ moonaga atĩ Jehova aarĩ hamwe nao. O na nĩ maatwarĩire Mũthamaki Jehoshafatu iheo. No Amoabi na Aamoni na andũ arĩa maaikaraga hakuhĩ na gĩcigo gĩa Seiru nĩ maathiire gũtharĩkĩra andũ a Juda. Jehoshafatu nĩ aamenyaga atĩ nĩ aabataraga ũteithio wa Jehova. Aacokanĩrĩirie arũme othe, atumia, o hamwe na ciana kũu Jerusalemu. Agĩcoka akĩhoya ũũ arĩ mbere yao: ‘Jehova, tũtarĩ nawe tũtingĩtooria. Twagũthaitha ũtwĩre ũrĩa tũgwĩka.’

Jehova agĩcokia mahoya macio, akĩmeera ũũ: ‘Tigai gwĩtigĩra. Nĩ ngũmũteithia. Rũgamai mwĩhandĩte, muone ũrĩa ngũmũhonokia.’ Jehova aamahonokirie atĩa?

Mũthenya ũyũ ũngĩ rũcinĩ, Jehoshafatu nĩ aathuurire aini na akĩmeera mathiĩ mbere ya thigari. Maaumire Jerusalemu magĩthiĩ nginya handũ heetagwo Tekoa, harĩa mbaara yarũagĩrũo.

Rĩrĩa aini acio maagoocaga Jehova na mũgambo mũnene makenete, Jehova nĩ aarũĩrĩire andũ ake. Aatũmire Aamoni na Amoabi matukanĩrũo nginya makĩambĩrĩria kũrũa o ene, na gũtirĩ o na ũmwe wao wahonokire. No Jehova nĩ aagitĩrire andũ a Juda, thigari ciao, o hamwe na athĩnjĩri-Ngai. Andũ othe a mabũrũri marĩa maamarigicĩirie nĩ maamenyire ũrĩa Jehova aamekĩire na makĩmenya atĩ Jehova no aamagitagĩra. Jehova ahonokagia andũ ake na njĩra nyingĩ. Ndabataraga gũteithio nĩ andũ nĩguo eke ũguo.