Mũnene wa Thigari na Kairĩtu Kanini

Nĩ kwarĩ kairĩtu kamwe kanini kaaumĩte bũrũri wa Isiraeli, na gaikaraga bũrũri-inĩ wa Siria ũrĩa warĩ kũraihu na kwao. Kooetwo kuuma kũrĩ famĩlĩ yao nĩ thigari cia Siria, na rĩu kaarĩ ndungata ya mũtumia wa mũnene wa thigari wetagwo Naamani. Kairĩtu kau gaathathayagia Jehova o na gũtuĩka andũ arĩa gaaikaranagia nao maathathayagia ngai ingĩ.

Naamani aarĩ na mũrimũ mũũru mũno wa ngothi, na aakoragwo na ruo hingo ciothe. Kairĩtu kau kanini nĩ keendaga biũ kũmũteithia. Kwoguo gakĩra mũtumia wake ũũ: ‘Nĩ njũĩ mũndũ ũngĩhonia mũthuri waku. Isiraeli nĩ kũrĩ mũnabii wa Jehova wĩtagwo Elisha, na no amũhonie.’

Mũtumia wa Naamani akĩra mũthuriwe ũrĩa eerĩtwo nĩ kairĩtu kau. Naamani nĩ eehaarĩirie gwĩka ũndũ o wothe nĩguo ahone, na kwoguo agĩthiĩ Isiraeli kũrĩ Elisha. Eerĩgagĩrĩra Elisha amwamũkĩre ta mũndũ wa bata. No handũ ha Elisha kwaria nake, aatũmire ndungata yake ĩkageithie Naamani na ĩmũhe ndũmĩrĩri ĩno: ‘Thiĩ wĩthambe maita mũgwanja Rũũĩ-inĩ rwa Jorodani, na nĩ ũkũhona.’

Naamani nĩ aaiguire ũũru mũno. Aaugire ũũ: ‘Ngwĩcirĩtie atĩ mũnabii ũyũ egũkaĩra Ngai wake agĩcũgagia moko igũrũ rĩakwa nĩguo hone. Handũ ha ũguo aranjĩra thiĩ rũũĩ rũrĩ bũrũri-inĩ wa Isiraeli. Tũrĩ na njũũĩ njega mũno Siria ikĩrĩte cia Isiraeli. Kaĩ itangĩthiĩ kuo?’ Naamani akĩrakara mũno na akiuma kwa Elisha.

Ndungata cia Naamani nĩ ciamũteithirie gwĩciria maũndũ wega. Ciamwĩrire ũũ: ‘Na githĩ ndwagĩrĩirũo gwĩka ũndũ o wothe nĩguo ũhone? Mũnabii ũcio arakwĩra wĩke ũndũ mũhũthũ mũno. Kaĩ ũtangĩka ũguo akwĩra?’ Naamani nĩ eekire ũrĩa maamwĩrire. Aathiire Rũũĩ-inĩ rwa Jorodani na agĩtoboka kuo maita mũgwanja. Rĩrĩa aatobokire riita rĩa mũgwanja, aaumĩrire arĩ mũhonu biũ. Nĩ aakenire mũno na agĩthiĩ gũcokeria Elisha ngatho. Eerire Elisha ũũ: ‘Rĩu nĩ njũĩ atĩ Jehova nĩwe Ngai ũrĩa wa ma.’ Ũgwĩciria kairĩtu kau ka Isiraeli kaaiguire atĩa rĩrĩa Naamani aacokire arĩ mũhonu?