Jehova Gũtũma Jeremia Akahunjie

Jehova nĩ aathuurire Jeremia atuĩke mũnabii kũrĩ andũ a Juda. Aamwĩrire amahunjĩrie na amakaanie gwĩka maũndũ moru. No Jeremia akiuga ũũ: ‘Niĩ ndĩ o kamwana. Ndingĩhota kwarĩria andũ.’ Nake Jehova akĩmwĩra ũũ: ‘Tiga gwĩtigĩra. Nĩ ngũkwĩra ũrĩa ũkuuga. Nĩ ngũgũteithia.’

Jehova eerire Jeremia ete athuri arĩa maatongoragia, acoke oragĩre nyũngũ ya rĩũmba mbere yao na ameere ũũ: ‘Jerusalemu ĩkanangwo o ta nyũngũ ĩno ya rĩũmba.’ Rĩrĩa Jeremia eekire ũrĩa eerĩtwo nĩ Jehova, athuri acio nĩ maarakarire mũno. Mũthĩnjĩri-Ngai ũmwe wetagwo Pashuru akĩhũũra Jeremia na akĩmuoha magũrũ. Ũtukũ ũcio wothe Jeremia ndangĩahotire kuuma harĩa aarĩ. Pashuru aamũrekereirie mũthenya ũyũ ũngĩ rũcinĩ. Jeremia aaugire ũũ: ‘Ndingĩhota gũkirĩrĩria rĩngĩ. Ndikũhunjia rĩngĩ!’ No hihi nĩ aatigire? Aca. Rĩrĩa eecũranirie ũndũ ũcio rĩngĩ, ooigire ũũ: ‘Ndũmĩrĩri ya Jehova nĩ ta mwaki ũrĩ thĩinĩ wakwa. Ndingĩtiga kũhunjia.’ Jeremia no aathiire na mbere kũhe andũ mũkaana.

Thutha wa mĩaka mĩingĩ, gũkĩgĩa mũthamaki ũngĩ Juda. Athĩnjĩri-Ngai na anabii a maheeni matiakenagio nĩ ndũmĩrĩri ĩrĩa Jeremia aaheanaga. Meerire anene a Juda ũũ: ‘Mũndũ ũyũ agĩrĩirũo kũũragwo.’ Nake Jeremia akiuga ũũ: ‘Akorũo nĩ mũkũnjũraga, mũkũũraga mũndũ ũtarĩ na mahĩtia. Ndũmĩrĩri ĩrĩa heanaga nĩ ya Jehova no ti yakwa.’ Rĩrĩa anene acio maaiguire ũhoro ũcio makiuga ũũ: ‘Mũndũ ũyũ ndagĩrĩire kũũragwo.’

Jeremia nĩ aathiire na mbere kũhunjia, na ũndũ ũcio ũkĩrakaria anene acio mũno. Makĩra mũthamaki amũũragithie, nake mũthamaki akĩmeera meeke ũrĩa mekwenda nake. Maanyitire Jeremia na makĩmũikia irima iriku rĩarĩ na ndoro magĩciria atĩ nĩ egũkuĩra kuo. Jeremia akĩambĩrĩria gũtonyerera ndoro-inĩ ĩyo.

No mũndũ ũmwe wetagwo Ebedi-meleku warutaga wĩra nyũmba-inĩ ya Mũthamaki akĩra mũthamaki ũũ: ‘Anene nĩ maikĩtie Jeremia irima. Tũngĩmũtiga hau no egũkua.’ Mũthamaki akĩra Ebedi-meleku oe andũ 30 athiĩ nao makarute Jeremia irima-inĩ rĩu. Na githĩ tũtikĩagĩrĩirũo gũkorũo tũhaana ta Jeremia, ũrĩa ũtarekire ũndũ o na ũmwe ũmũgirĩrĩrie kũhunjia?