Mũtumia Gĩthima-inĩ

Thutha wa Pasaka, Jesu na arutwo ake nĩ maacokire Galili matuĩkanĩirie Samaria. Jesu nĩ aahurũkire handũ heetagwo gĩthima kĩa Jakubu hakuhĩ na itũũra rĩa Sukaru. Rĩrĩa aahurũkĩte hau, arutwo ake nĩ maathiire kũgũra irio itũũra-inĩ.

Mũtumia ũmwe agĩũka gũtaha maĩ hau gĩthima-inĩ. Jesu akĩmwĩra ũũ: “He maĩ nyue.” Nake akĩmũũria ũũ: ‘Ũranjarĩria nĩkĩ? Ndĩ mũtumia Mũsamaria. Ayahudi matiaragia na Asamaria.’ Jesu akĩmwĩra ũũ: ‘Korũo nĩ ũramenya nĩ niĩ ũ, nĩ ũngĩahoya maĩ na niĩ ngũhe maĩ marĩ muoyo.’ Mũtumia ũcio akĩmũũria ũũ: ‘Ũrenda kuuga atĩa? Ũtakĩrĩ nginya na ndoo.’ Jesu akĩmũcokeria: ‘Mũndũ wothe ũnyuaga maĩ marĩa heanaga ndakaanyota rĩngĩ.’ Nake mũtumia ũcio akĩmwĩra ũũ: “Mũthuri ũyũ, he maĩ macio.”

Jesu agĩcoka akĩmwĩra ũũ: ‘Thiĩ ũke na mũthuri waku.’ Nake akĩmwĩra: ‘Ndikoragwo na mũthuri.’ Jesu akĩmwĩra: ‘Hau nĩ waria ma. Ũkoretwo na athuri atano, na ũrĩa mũrĩ nake rĩu ti mũthuri waku.’ Mũtumia ũcio akĩmwĩra ũũ: ‘Nĩ ndona wĩ mũnabii. Andũ aitũ metĩkĩtie atĩ no tũthathaĩrie Ngai kĩrĩma-inĩ gĩkĩ, no Ayahudi metĩkĩtie atĩ twagĩrĩirũo gũthathaĩria o Jerusalemu tu. Njĩtĩkĩtie atĩ rĩrĩa Mesia agooka, nĩ agaatũruta ũrĩa twagĩrĩirũo gũthathaiya.’ Jesu aacokire akĩmwĩra ciugo ici ateerĩte mũndũ ũngĩ: ‘Niĩ nĩ niĩ Mesia.’

Mũtumia ũcio aatengʼerire nginya itũũra-inĩ rĩao na akĩra Asamaria ũũ: ‘Ngwĩciria nĩ ndona Mesia. Anjĩra maũndũ makwa mothe. Ũkai mũmuone!’ Magĩthiĩ nake nginya gĩthima-inĩ na magĩthikĩrĩria Jesu akĩrutana.

Asamaria nĩ maanyitire Jesu ũgeni aikarange itũũra-inĩ rĩao. Aarutanire kuo kwa ihinda rĩa thikũ igĩrĩ na andũ aingĩ makĩmwĩtĩkia. Andũ acio meerire mũtumia ũcio Mũsamaria ũũ: ‘Thutha wa gũthikĩrĩria mũndũ ũyũ, rĩu nĩ twamenya atĩ nĩwe mũhonokia wa thĩ.’