Jesu Kũnyitwo

Jesu na atũmwo maagereire Mũkuru wa Kidironi merekeire Kĩrĩma-inĩ kĩa Mĩtamaiyũ. Kwarĩ ũtukũ gatagatĩ na mweri warĩ mũnene. Rĩrĩa maakinyire mũgũnda-inĩ wa Gethisemane, Jesu akĩmeera ũũ: “Ikarai haha na mũikare mwĩiguĩte.” Jesu agĩcoka agĩthiĩ makinya maigana ũna mũgũnda-inĩ ũcio na agĩturia maru. Arĩ na mĩtangĩko mĩingĩ, akĩhoya Jehova ũũ: “Reke wendi waku wĩkĩke.” Nake Jehova agĩtũma mũraika nĩguo amũmĩrĩrie. Rĩrĩa Jesu aacokire harĩ atũmwo ake, aamakorire makomete. Akĩmeera ũũ: ‘Ũkĩrai! Rĩrĩ tirĩo ihinda rĩa gũkoma! Ihinda rĩakwa rĩa kũneanwo kũrĩ thũ ciakwa nĩ ikinyu.’

O ihinda-inĩ rĩu, Judasi agĩkinya atongoretie kĩrĩndĩ kĩnene kĩarĩ na hiũ cia njora na njũgũma. Nĩ aamenyaga kũrĩa angĩoonire Jesu tondũ nĩ maathiaga mũgũnda-inĩ ũcio kaingĩ. Judasi nĩ eerĩte thigari atĩ nĩ angĩacionirie Jesu nĩ ũrĩkũ. Aathiire ĩmwe kwa ĩmwe harĩ Jesu na akĩmwĩra: ‘Mũrutani, geithĩka.’ Agĩcoka akĩmũmumunya. Nake Jesu akĩmũũria ũũ: ‘Judasi, ũrangunyanĩra na njĩra ya kũũmumunya?’

Jesu agĩthiĩ mbere ya kĩrĩndĩ kĩu na akĩũria ũũ: “Nũũ mũracaria?” Nao makĩmwĩra: “Nĩ Jesu ũrĩa Mũnazarethi.” Nake Jesu akĩmacokeria: “Nĩ niĩ we.” Maigua ũguo, magĩcoka na thutha makĩgwa thĩ. Jesu akĩũria kĩrĩndĩ kĩu o rĩngĩ: “Nũũ mũracaria?” Nao makĩmũcokeria o rĩngĩ: “Nĩ Jesu ũrĩa Mũnazarethi.” Jesu akĩmeera ũũ: ‘Nĩ ndamwĩra atĩ nĩ niĩ we. Rekei andũ aya angĩ mathiĩ.’

Rĩrĩa Petero aamenyire ũrĩa gwathiaga na mbere, aacomorire rũhiũ rwake rwa njora na agĩtinia ngombo ĩmwe ya mũthĩnjĩri-Ngai mũnene gũtũ ĩrĩa yetagwo Maliku. No Jesu akĩhutia gũtũ kwa mũndũ ũcio na akĩmũhonia. Agĩcoka akĩra Petero ũũ: ‘Cokia rũhiũ rwaku. Ũngĩrũa na rũhiũ, o nawe ũkooragwo o na rũhiũ.’ Thigari icio ikĩnyita Jesu na ikĩmuoha moko, nao atũmwo makĩũra. Kĩrĩndĩ kĩu gĩgĩcoka gĩkĩmũtwara kũrĩ Anasi, ũrĩa warĩ mũnene wa athĩnjĩri-Ngai. Anasi nĩ ooririe Jesu ciũria, agĩcoka akĩmũtũma kwa mũthĩnjĩri-Ngai ũrĩa mũnene wetagwo Kaiafa. No atũmwo meekire atĩa?