Petero Gũkaana Jesu

Rĩrĩa Jesu aarĩ na atũmwo ake nyũmba-inĩ ya ngoroba, aameerĩte ũũ: ‘Inyuothe nĩ mũkũndiganĩria ũtukũ wa ũmũthĩ.’ No Petero akĩmwĩra: ‘Niĩ ndingĩgũtiga! O na arĩa angĩ othe mangĩgũtiga, niĩ ndirĩ hingo ngagũtiga.’ Nake Jesu akĩmwĩra ũũ: ‘Mbere ya ngũkũ ĩkũgĩte, ũgũkorũo ũngaanĩte maita matatũ.’

Rĩrĩa thigari ciatwarire Jesu gwa Kaiafa, hakuhĩ atũmwo othe nĩ moorire. No erĩ ao nĩ maamumire thutha marĩ gatagatĩ-inĩ ga kĩrĩndĩ. Ũmwe wao aarĩ Petero. Nĩ aathiire nja gwa Kaiafa na akĩambĩrĩria guota mwaki. Mũirĩtu ũmwe warĩ ndungata akĩmuona handũ haarĩ na ũtheri na akĩmwĩra ũũ: ‘Wee nĩ ndĩrakũmenya! Muuma na Jesu!’

Petero akiuga ũũ: ‘Aca, niĩ tũtiuma nake! O na ndiũĩ ũraria ũhoro wa kĩĩ!’ Agĩcoka agĩthiĩ erekeire kĩhingo-inĩ. No o hĩndĩ ĩyo mũirĩtu ũngĩ warĩ ndungata nĩ aamuonire na akĩra kĩrĩndĩ ũũ: ‘Mũndũ ũyũ mauma na Jesu!’ Petero akiuga ũũ: ‘Niĩ o na ndiũĩ Jesu!’ Nake mũthuri ũmwe akiuga ũũ: ‘Ũrĩ ũmwe wao! Mwarĩrie waku nĩ ũrauga atĩ uumĩte Galili o ta Jesu.’ No Petero akĩĩhĩta akiuga: ‘Niĩ ndimũũĩ!’

O hĩndĩ ĩyo ngũkũ ĩgĩkũga, na Petero akĩona Jesu ehũgũra na akĩmũrora. Petero akĩririkana ciugo cia Jesu na akiuma nja akĩrĩra arĩ na ruo rũnene.

Ihinda-inĩ rĩu, igooti rĩa Sanhedrini nĩ rĩacemanirie gwa Kaiafa mũciĩ nĩguo rĩciirithie Jesu. Nĩ maatuĩte itua rĩa kũũraga Jesu, no rĩu meendaga kũmũcarĩria mahĩtia nĩguo mamũũrage. No gũtirĩ ihĩtia moonaga. Mũthia-inĩ, Kaiafa akĩũria Jesu ũũ: ‘Wee nĩwe Mũrũ wa Ngai?’ Nake Jesu akĩmwĩra ũũ: ‘Ĩĩ nĩ niĩ.’ Kaiafa akiuga ũũ: ‘Tũtirabatara ũira ũngĩ. Nĩ aruma Ngai!’ Igooti rĩgĩtĩkanĩria rĩkiuga ũũ: ‘Mũndũ ũyũ agĩrĩirũo nĩ gũkua.’ Maahũũrire Jesu hĩ, makĩmũtuĩra mata, makĩmũhumbĩra maitho, na makĩmũringa ngundi makĩmwĩraga ũũ: ‘Angĩkorũo ũrĩ mũnabii, twĩre nũũ wakũringa!’

Rĩrĩa gwakĩire, magĩtwara Jesu mbere ya Sanhedrini na makĩmũũria o rĩngĩ: ‘Wee nĩwe Mũrũ wa Ngai?’ Jesu akĩmacokeria ũũ: ‘Inyuĩ nĩ inyuĩ mũrauga atĩ nĩ niĩ we.’ Maaugire atĩ nĩ aruma Ngai na makĩmũtwara nyũmba-inĩ ya Pontio Pilato ũrĩa warĩ ngavana wa Roma. Nĩ ũndũ ũrĩkũ wacokire gwĩkĩka? Rekei tuone.