Jesu Kuumĩrĩra Ategi a Thamaki

Hĩndĩ ĩmwe thutha wa Jesu kuumĩrĩra atũmwo ake, Petero nĩ aatuire itua rĩa gũthiĩ gũtega thamaki Iria-inĩ rĩa Galili. Toma, Jakubu, Johana, na arutwo angĩ nĩ maathiire hamwe nake. Maageririe gũtega thamaki ũtukũ wothe no gũtirĩ kĩndũ maanyitire.

Mũthenya ũyũ ũngĩ rũcinĩ tene, nĩ moonire mũndũ arũgamĩte rũteere-inĩ rwa iria. Mũndũ ũcio akĩmoria ũũ anĩrĩire: ‘Harĩ kĩndũ mũnyitĩte?’ Nao makĩmũcokeria: “Aca!” Nake akĩmeera: “Ikiai neti mwena wa ũrĩo wa gatarũ na nĩ mũkũnyita kĩndũ.” Rĩrĩa maaikirie neti, yaiyũrire thamaki nginya makĩremwo nĩ kũmĩgucia. O rĩmwe Johana akĩmenya atĩ mũndũ ũcio aarĩ Jesu, na akiuga ũũ: “Nĩ Mwathani!” O hĩndĩ ĩyo, Petero akiuma gatarũ-inĩ akĩrũga maĩ-inĩ, na agĩthiĩ erekeire rũteere-inĩ rwa iria. Nao arutwo acio angĩ makĩmũrũmĩrĩra marĩ gatarũ-inĩ.

Rĩrĩa maakinyire rũteere-inĩ, maakorire mũgate na thamaki cigĩrĩirũo mwaki-inĩ. Jesu akĩmeera marehe thamaki imwe iria maanyitĩte nĩguo ciongererũo harĩ icio ciarĩ mwaki-inĩ. Agĩcoka akĩmeera ũũ: ‘Ũkai mwĩgagũre.’

Marĩkia kũrĩa, Jesu akĩũria Petero ũũ: ‘Nĩ ũnyendete gũkĩra ũrĩa wendete gũtega thamaki?’ Petero akĩmwĩra: ‘Ĩni, Mwathani, wee nĩ ũĩ nĩ ngwendete.’ Jesu akĩmwĩra: ‘Kĩheage tũgondu twakwa gĩa kũrĩa.’ Jesu akĩmũũria ũũ o rĩngĩ: ‘Petero, nĩ ũnyendete?’ Nake Petero akĩmwĩra: ‘Mwathani, wee nĩ ũĩ nĩ ngwendete.’ Jesu akĩmwĩra: “Rĩithagia tũgondu twakwa.” Jesu agĩcoka akĩmũũria o ũguo riita rĩa gatatũ. Petero akĩigua kĩeha mũno na akĩra Jesu ũũ: ‘Mwathani, nĩ ũĩ maũndũ mothe. Nĩ ũĩ nĩ ngwendete.’ Nake Jesu akĩmwĩra: “Heaga tũgondu twakwa gĩa kũrĩa.” Agĩcoka akĩmwĩra ũũ: “Thiĩ na mbere kũnũmĩrĩra.”