Jesu Gũcoka Igũrũ

Jesu na arutwo ake nĩ maacemanirie Galili, na akĩmahe watho ũyũ wa bata: ‘Thiĩi mũgatue andũ a mabũrũri mothe arutwo akwa. Mũmarute maũndũ marĩa ndĩmũrutĩte na mũmabatithagie.’ Agĩcoka akĩmeera ũũ: ‘Ririkanai, ndĩkoragwo hamwe na inyuĩ hĩndĩ ciothe.’

Ihinda-inĩ rĩa thikũ 40 thutha wa Jesu kũriũkio, nĩ aaumĩrĩire arutwo ake aingĩ matũũra-inĩ ma Galili na Jerusalemu. Aamarutire maũndũ maingĩ na akĩringa ciama nyingĩ. Agĩcoka agĩcemania na arutwo ake riita rĩa mũico Kĩrĩma-inĩ kĩa Mĩtamaiyũ.

Jesu akĩra atũmwo ake ũũ: ‘Mũtikaume Jerusalemu. Thiĩi na mbere gweterera kĩrĩa Awa aamwĩrĩire.’ No matiataũkĩirũo nĩ ũrĩa eendaga kuuga. Makĩmũũria ũũ: ‘Ihinda-inĩ rĩrĩ nĩrĩo ũgũtuĩka Mũthamaki wa Isiraeli?’ Nake akĩmeera: ‘Ihinda rĩa Jehova rĩa kũndua Mũthamaki ti ikinyu. Ihinda rĩtarĩ kũraihu nĩ mũrĩamũkĩra hinya wa roho mũtheru, na nĩ mũgaatuĩka aira akwa. Thiĩi mũkahunjie Jerusalemu, Judea, Samaria, na nginya ituri ciothe cia thĩ.’

Jesu agĩcoka akĩoywo na igũrũ na akĩhumbĩrũo nĩ itu. Arutwo ake maaikarire marorete igũrũ, no matiamuonire rĩngĩ.

Arutwo makiuma Kĩrĩma-inĩ kĩa Mĩtamaiyũ na magĩthiĩ Jerusalemu. Nĩ maacemanagia kaingĩ thĩinĩ wa nyũmba ĩmwe ya ngoroba na makahoya. Meetagĩrĩra Jesu amahe ũtongoria makĩria.