Korinelio Kũheo Roho Mũtheru

Thĩinĩ wa Kaisarea nĩ kwarĩ mũnene ũmwe wa thigari cia Roma wetagwo Korinelio. O na gũtuĩka ndaarĩ Mũyahudi, nĩ aaheetwo gĩtĩo mũno nĩ Ayahudi. Nĩ aateithagia athĩni na arĩa maabataraga ũteithio. Korinelio nĩ eetĩkĩtie Jehova na nĩ aahoyaga kaingĩ. Mũthenya ũmwe, mũraika nĩ aamumĩrĩire na akĩmwĩra ũũ: ‘Ngai nĩ aiguĩte mahoya maku. Tũma andũ itũũra-inĩ rĩa Jopa, kũrĩa Petero aikaraga, mamwĩre oke gwaku.’ Korinelio agĩtũma andũ atatũ o hĩndĩ ĩyo itũũra-inĩ rĩa Jopa, rĩrĩa rĩarĩ kĩndũ ta kilomita 50 mwena wa mũhuro wa Kaisarea.

O ihinda-inĩ rĩu, Petero arĩ itũũra-inĩ rĩa Jopa nĩ oonire kĩoneki. Oonire nyamũ iria Ayahudi mataagĩrĩirũo nĩ kũrĩa na agĩcoka akĩigua mũgambo wamwĩra acirĩe. Petero akĩrega kũrĩa na akiuga ũũ: ‘Niĩ ndirĩ ndarĩa nyama cia nyamũ itarĩ theru ũtũũro-inĩ wakwa wothe.’ Mũgambo ũcio ũkĩmwĩra ũũ: ‘Tiga kuuga nyamũ icio ti theru. Ngai nĩ acitheretie.’ Ningĩ akĩrũo ũũ: ‘Harĩ na andũ atatũ marĩ gwaku mũrango-inĩ. Thiĩ hamwe nao.’ Petero agĩthiĩ na akĩmoria kĩrĩa gĩatũmĩte mathiĩ gwake. Makĩmwĩra ũũ: ‘Twatũmwo nĩ Korinelio mũnene wa thigari cia Roma. No mũhaka ũke gwake mũciĩ itũũra-inĩ rĩa Kaisarea.’ Petero akĩnyita andũ acio ũgeni na makĩraara gwake. Mũthenya ũrĩa warũmĩrĩire, magĩthiĩ hamwe nao Kaisarea marĩ na ariũ a ithe witũ amwe kuuma Jopa.

Rĩrĩa Korinelio oonire Petero, akĩmũturĩria maru. No Petero akĩmwĩra ũũ: ‘Rũgama! Niĩ ndĩ mũndũ o tawe. Ngai anjĩrire njũke gũkũ gwaku o na akorũo Ayahudi matithiaga kwa andũ a Ndũrĩrĩ. Ndagũthaitha ũnjĩre kĩrĩa gĩtũmĩte ũndũmanĩre.’

Korinelio akĩra Petero ũũ: ‘Ndĩrahoyaga Ngai thikũ inya hĩtũku, nake mũraika aranjĩra ngũtũmanĩre. Ndagũthaitha ũtũrute ũhoro wa Jehova.’ Petero akiuga ũũ: ‘Nĩ ndĩrutĩte atĩ Ngai ndarĩ mũthutũkanio. Nĩ etĩkĩraga mũndũ o wothe wendaga kũmũthathaiya.’ Petero nĩ aamarutire maũndũ maingĩ megiĩ Jesu. Thutha ũcio Korinelio hamwe na andũ arĩa othe maarĩ nake makĩheo roho mũtheru, na makĩbatithio.