Ũkristiano Gũtherema Mabũrũri-inĩ Maingĩ

Atũmwo nĩ maathĩkĩire watho wa Jesu wa kũhunjia ũhoro mwega thĩinĩ wa thĩ yothe. Mwaka wa 47 Mahinda Maitũ (M.M.), ariũ a Ithe witũ a Antiokia nĩ maatũmire Paulo na Baranaba mathiĩ makahunjie. Ahunjia acio erĩ nĩ maathiire icigo ciothe cia Asia Nini nginya kũndũ ta Deribe, Listra, na Ikoniamu.

Paulo na Baranaba maahunjagĩria andũ othe gũtekũmakania kana nĩ athĩni, itonga, andũ ethĩ, kana akũrũ. Andũ aingĩ nĩ meetĩkirie ũhoro wĩgiĩ Kristo. Rĩrĩa Paulo na Baranaba maahunjagĩria Serigio Paulo ũrĩa warĩ ngavana wa Kuporo, mũrogi ũmwe nĩ aageririe kũmagiria. Paulo eerire mũrogi ũcio ũũ: ‘Jehova nĩ egũgũũkĩrĩra.’ O hĩndĩ ĩyo, mũrogi ũcio agĩtuĩka mũtumumu. Thutha wa Ngavana Serigio Paulo kwĩyonera ũndũ ũcio, agĩtuĩka mwĩtĩkia.

Paulo na Baranaba maahunjagia kũndũ guothe, mũciĩ kwa mũciĩ, thoko-inĩ, njĩra-inĩ, na thunagogi-inĩ. Rĩrĩa maahonirie mũndũ warĩ muonju itũũra-inĩ rĩa Listra, andũ arĩa meeyoneire meeciririe atĩ Paulo na Baranaba maarĩ ngai na makĩgeria kũmathathaiya. No Paulo na Baranaba makĩmagiria na makĩmeera ũũ: ‘Thathaiyai Ngai wiki! Ithuĩ tũrĩ o andũ.’ Thutha ũcio nĩ gwokire Ayahudi amwe na magĩtũma kĩrĩndĩ gĩũkĩrĩre Paulo na Baranaba. Kĩrĩndĩ gĩkĩhũũra Paulo na mahiga, gĩkĩmũkururia nginya nja wa itũũra, na gĩkĩmũtiga nĩguo akue. O na kũrĩ ũguo, Paulo ndaakuire! O hĩndĩ ĩyo ariũ a Ithe witũ nĩ maathiire makĩmũhonokia na makĩmũtwara itũũra rĩngĩ. Thutha ũcio Paulo agĩcoka Antiokia.

Mwaka-inĩ wa 49 M.M., Paulo nĩ aathiire rũgendo rũngĩ. Thutha wa gũcoka Asia Nini kũrĩ ariũ a Ithe witũ, nĩ aathiire kũhunjia ũhoro ũrĩa mwega kũndũ kũraihu o na makĩria, nginya Europe. Aathiire Athene, Efeso, Filipi, Thesalonike, na kũndũ kũngĩ kũingĩ. Sila, Luka, na mũndũ ũngĩ mwĩthĩ wetagwo Timotheo nĩ maathiire na Paulo rũgendo-inĩ rũu rwake. Maarutire wĩra wa kwambĩrĩria ciũngano na gũciteithia igĩe na hinya. Paulo aaikarire Korintho ihinda rĩa mwaka ũmwe na nuthu agĩkĩra aarĩ na ariũ a Ithe witũ ngoro. Nĩ aahunjirie, akĩrutana, na akĩandĩkĩra ciũngano nyingĩ marũa. Ningĩ nĩ aarutaga wĩra wa gũthondeka hema. Thutha wa ihinda nĩ aacokire Antiokia.

Thutha-inĩ mwaka wa 52 M.M., Paulo nĩ aathiire iceera rĩake rĩa gatatũ, na aambĩrĩirie Asia Nini. Aathiire mwena wa rũgongo nginya o Filipi na agĩcoka agĩikũrũka nginya Korintho. Aaikarire mĩaka ĩigana ũna Efeso akĩrutana, akĩhonanagia, na agĩteithagĩrĩria kĩũngano gĩa kũu. Ningĩ nĩ aaheanaga mĩario o mũthenya nyũmba-inĩ ĩmwe yathomithagĩrio andũ. Andũ aingĩ nĩ maamũthikĩrĩirie na magĩcenjia mĩtugo yao. Thutha wa kũhunjia ũhoro ũrĩa mwega mabũrũri-inĩ maingĩ, Paulo agĩcoka Jerusalemu.