Mũrangĩri wa Njera Kwĩruta Ũhoro wa Ma

Itũũra-inĩ rĩa Filipi, nĩ kwarĩ na mũirĩtu ũmwe warĩ ndungata na aarĩ na ndaimono. Ndaimono ĩyo yamũhũthagĩra kũratha mohoro, na nĩ ũndũ ũcio akahota gũthũkũmĩra arĩa maamwathaga mbeca nyingĩ. Rĩrĩa Paulo na Sila maathiire Filipi, mũirĩtu ũcio nĩ aamarũmĩrĩire thikũ nyingĩ. Ndaimono ĩyo yatũmaga anĩrĩre akoiga ũũ: “Athuri aya nĩ ndungata cia Ngai Ũrĩa ũrĩ Igũrũ Mũno.” Paulo aacokire akĩra ndaimono ĩyo ũũ: ‘Thĩinĩ wa rĩĩtwa rĩa Jesu ndakwĩra uume thĩinĩ wake!’ Ndaimono ĩyo ĩkiuma thĩinĩ wa mũirĩtu ũcio o hĩndĩ ĩyo.

Rĩrĩa arĩa maathaga mũirĩtu ũcio moonire atĩ ndangĩamateithirie kũgĩa na mbeca rĩngĩ, nĩ maarakarire mũno. Maakururirie Paulo na Sila makĩmatwara kũrĩ aciirithania na makiuga ũũ: ‘Athuri aya nĩ marauna watho na nĩ marathumbũra itũũra rĩothe!’ Aciirithania acio magĩathana Paulo na Sila mahũũrũo iboko na maikio njera. Mũrangĩri wa njera akĩmaikia njera ya thĩinĩ biũ na akĩmoherera ndungu magũrũ.

Paulo na Sila maagoocaga Jehova na nyĩmbo, nao andũ arĩa moohetwo hamwe nao nĩ maamathikagĩrĩria. No ũtukũ gatagatĩ, gũkĩgĩa na gĩthingithia kĩnene o rĩmwe, na gĩkĩinainia njera ĩyo yothe. Mĩrango ya njera ĩkĩhingũka, mĩnyororo ya arĩa moohetwo ĩkĩohoka, nacio ndungu ikĩregera. Mũrangĩri wa njera agĩtengʼera njera ya thĩinĩ na akĩona mĩrango ĩhingũkĩte. Agĩciria atĩ ohwo othe nĩ morĩte, na kwoguo akĩoya rũhiũ eyũrage.

Nake Paulo akĩmwĩra ũũ: ‘Ndũkegere ngero tondũ tũrĩ haha ithuothe!’ Mũrangĩri ũcio akĩguthũka thĩinĩ na akĩgwa mbere ya Paulo na Sila. Aamoririe ũũ: “Njagĩrĩirũo gwĩka atĩa nĩguo honoke?” Nao makĩmwĩra ũũ: ‘Ũrabatara gwĩtĩkia Jesu mũrĩ hamwe na andũ a nyũmba yaku.’ Paulo na Sila magĩcoka makĩmaruta ũhoro wa Jehova, na mũrangĩri ũcio hamwe na andũ othe a nyũmba yake makĩbatithio.