ITHOMO RĨA 46
Wagĩrĩirũo Kwĩyamũrĩra Jehova na Kũbatithio Nĩkĩ?
Mũndũ eyamũragĩra Jehova kũgerera mahoya akamwĩra atĩ arĩmũthathayagia o we wiki na akaiga wendi wa Jehova mbere ũtũũro-inĩ wake. (Thaburi 40:8) Thutha ũcio akabatithio. Rĩrĩa mũndũ abatithio, onagia andũ arĩa angĩ atĩ nĩ eyamũrĩire Jehova. Itua rĩa kwĩyamũrĩra Jehova nĩrĩo itua rĩrĩa rĩa bata mũno mũndũ angĩtua ũtũũro-inĩ. Rĩu nĩ itua rĩa bata mũno rĩngĩgarũra ũtũũro waku. Nĩ kĩĩ kĩngĩgũtindĩka ũtue itua rĩu?
1. Nĩ kĩĩ gĩtindĩkaga mũndũ kwĩyamũrĩra Jehova?
Wendo nĩguo ũtũtindĩkaga kwĩyamũrĩra Jehova. (1 Johana 4:10, 19) Bibilia ĩtwĩraga ũũ: “[Enda] Jehova Ngai waku na ngoro yaku yothe na muoyo waku wothe na meciria maku mothe na hinya waku wothe.” (Mariko 12:30) Tuonanagia atĩ nĩ twendete Ngai kũgerera ciugo na ciĩko citũ. O ta ũrĩa mwanake na mũirĩtu arĩa mendanĩte kuuma ngoro matuaga itua rĩa kũhikania, no taguo wendo witũ harĩ Jehova ũtũtindĩkaga kũmwĩyamũrĩra na kũbatithio.
2. Nĩ irathimo irĩkũ Jehova aheaga Aira ake arĩa abatithie?
Wabatithio, ũgaatuĩka wa famĩlĩ ya Jehova ĩrĩ gĩkeno. Nĩ ũkeeyonera na njĩra nyingĩ ũrĩa akwendete, na ũmũkuhĩrĩrie o na makĩria gũkĩra ũrĩa ũmũkuhĩrĩirie rĩu. (Thoma Malaki 3:16-18.) Jehova arĩkoragwo arĩ Baba wanyu, na makĩria ma ũguo nĩ ũkũgĩa na famĩlĩ ya kĩĩroho ya aarĩ na ariũ a Ithe witũ thĩinĩ wa thĩ yothe, arĩa mendete Jehova na makwendete. (Thoma Mariko 10:29, 30.) O na kũrĩ ũguo, nĩ kũrĩ makinya ũrabatara kuoya nĩguo ũbatithio. Nĩ ũrabatara kwĩruta ũhoro wĩgiĩ Jehova, ũmwende, na ũkorũo na wĩtĩkio harĩ Mũrũ wake. Thutha ũcio, no mũhaka wĩyamũrĩre Jehova. Ũngĩoya makinya macio na ũbatithio, nĩ ũkũgĩa na mweke wa gũkenera ũtũũro tene na tene. Kiugo kĩa Ngai kiugaga ũũ: “Ũbatithio . . . o naguo rĩu nĩ ũramũhonokia inyuĩ.”—1 Petero 3:21.
THUTHURIA MAKĨRIA
Reke tũthuthurie tuone nĩkĩ nĩ ũndũ wa bata kwĩyamũrĩra Jehova na kũbatithio.
3. Ithuothe no mũhaka tũthuure nũũ tũrĩtungatagĩra
Hĩndĩ ya Aisiraeli, andũ amwe meeciragia atĩ no mathathaiye Jehova na ihinda-inĩ o rĩu mathathaiye ngai ya maheeni yetagwo Baali. No Jehova nĩ aatũmire mũnabii wake wetagwo Elija nĩguo arũnge mwĩcirĩrie ũcio mũũru. Thomai 1 Athamaki 18:21, mũcoke mwarĩrĩrie kĩũria gĩkĩ:
Aisiraeli maabataraga gũtua itua rĩrĩkũ?
O ta Aisiraeli, o na ithuĩ no mũhaka tũthuure nũũ tũrĩtungatagĩra. Thomai Luka 16:13, mũcoke mwarĩrĩrie ciũria ici:
Nĩkĩ tũtingĩthathaiya Jehova na ihinda-inĩ o rĩu tũthathaiye mũndũ ũngĩ kana kĩndũ kĩngĩ?
Tũngĩonia Jehova atĩa atĩ nĩwe tũthuurĩte gũthathayagia?
4. Wĩcũranagie ũrĩa Jehova akwendete
Jehova nĩ atũheete iheo nyingĩ njega. Nĩ kĩĩ ithuĩ tũngĩmũhee? Mwĩrorerei VIDEO ĩno.
Jehova akuonetie wendo na njĩra ta irĩkũ? Thomai Thaburi 104:14, 15 na 1 Johana 4:9, 10, mũcoke mwarĩrĩrie ciũria ici:
Nĩ iheo irĩkũ ũkenagĩra makĩria kuuma kũrĩ Jehova?
Iheo icio itũmaga ũigue atĩa kũmwerekera?
Mũndũ angĩtũhe kĩheo kĩega, nĩ twendaga kũmuonia atĩ nĩ tũracokia ngatho nĩ ũndũ wakĩo. Thomai Gũcokerithia Maathani 16:17, mũcoke mwarĩrĩrie kĩũria gĩkĩ:
Wecũrania maũndũ mothe marĩa Jehova agwĩkĩire-rĩ, ũratindĩkwo kũmũhe kĩĩ?
5. Kwĩyamũrĩra Jehova nĩ kũrehaga irathimo nyingĩ
Andũ aingĩ metĩkĩtie atĩ kũgĩa igweta, wĩra mwega, kana mbeca no gũtũme magĩe na gĩkeno. Hihi ũndũ ũcio nĩ wa ma? Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
O na gũtuĩka mũthaaki ũcio ũgwetetwo video-inĩ ĩyo nĩ eendete gũthaaka mũbira-rĩ, nĩ kĩĩ gĩatũmire atigane na wĩra ũcio?
Aathuurire kwĩrutĩra biũ harĩ Jehova no ti harĩ mũbira. Nĩ ũkuona ta aatuire itua rĩega? Ũngiuga ũguo nĩkĩ?
Mũtũmwo Paulo atanatuĩka Mũkristiano, aathingataga wĩra warĩ na igweta. Nĩ aarutĩtwo watho wa Kĩyahudi nĩ mũrutani woĩkaine mũno. No nĩ aatigire maũndũ macio mothe nĩguo atuĩke Mũkristiano. Hihi Paulo nĩ eeririre nĩ ũndũ wa gwĩka ũguo? Thomai Afilipi 3:8, mũcoke mwarĩrĩrie ciũria ici:
Nĩ kĩĩ gĩatũmire Paulo oige atĩ maũndũ marĩa eekaga atanatuĩka Mũkristiano “matariĩ ta gĩko kĩingĩ”?
Nĩ ũndũ ũrĩkũ aagĩire naguo aatigana namo?
Ũkuona ta arĩ ũndũ ũrĩkũ ũngĩtũma ũkorũo na ũtũũro mwega, nĩ gũtungatĩra Jehova kana nĩ gwĩka maũndũ mangĩ ũtũũro-inĩ waku?
Rĩrĩa Paulo aatuĩkire Mũkristiano, aagĩire na maũndũ ma bata gũkĩra marĩa aatiganire namo
ANDŨ AMWE MOIGAGA: “Ti ũndũ wa ũũgĩ kũhũthĩra ũtũũro waku wothe gũtungatĩra Ngai.”
Wee nĩ ũkuona ta arĩ ũndũ wa ũũgĩ kwĩyamũrĩra Jehova? Ũngiuga ũguo nĩkĩ?
ŨRĨA TWERUTA
Wendo nĩguo ũtũtindĩkaga kwĩyamũrĩra Jehova na kũbatithio.
Ciũria cia gũcokera
Nĩ kĩĩ kĩngĩtũma tuuge atĩ Jehova nowe twagĩrĩirũo kwenda na ngoro itũ yothe na kũmũthathaiya?
Jehova arathimaga atĩa Aira ake arĩa abatithie?
Wee no wende kwĩyamũrĩra Jehova?
RIKĨRA
Rora wone kĩrĩa gĩatũmire mũini ũmwe na mũthaaki ũmwe wa mũbira mathuure kwĩyamũrĩra Jehova.
Andũ Ethĩ Moragia—Ngũhũthĩra Ũtũũro Wakwa Atĩa?—Makĩrora Harĩa Moimĩte (6:54)
Thoma wone itũmi ingĩ cia kwĩyamũrĩra Jehova.
Thĩinĩ wa video ĩno ya rwĩmbo-rĩ, rora wone gĩkeno kĩrĩa gĩkoragwo na andũ arĩa meyamũrĩire Jehova.
Thoma rũgano rwa “Ndatũire Ndĩyũragia, ‘Muoroto wa Ũtũũro nĩ Ũrĩkũ?’” wone nĩ kĩĩ gĩatindĩkire mũtumia ũmwe gũthuthuria kĩrĩa aaigaga mbere ũtũũro-inĩ wake.