3 Twagĩrĩire Kũhoya Atĩa?

ŨHORO-INĨ wĩgiĩ mahoya, ndini nyingĩ ciĩkagĩrĩra maũndũ ta ũrĩa mũndũ agĩrĩirũo gũikara akĩhoya, ciugo iria abatiĩ kũhũthĩra, na mũtaratara ũrĩa agĩrĩire kũrũmĩrĩra. No Bibilia nĩ ĩtũteithagia kũmenya atĩ macio timo maũndũ marĩa tũbatiĩ gwĩkĩrĩra, no nĩ harĩ maũndũ marĩa ma bata tũbatiĩ gwĩciria rĩrĩa tũrenda kũhoya na njĩra ĩrĩa yagĩrĩire.

Bibilia nĩ ĩgwetaga ũhoro wĩgiĩ ndungata njĩhokeku cia Ngai ciahoire irĩ kũndũ gũtiganĩte, cikarĩte na njĩra itiganĩte. Amwe maahoire manĩrĩire, arĩa angĩ makĩhoya na ngoro kũringana na harĩa maarĩ. Na amwe maahoire marorete igũrũ, na angĩ mainamĩtie mothiũ. Handũ ha kũhũthĩra mĩhaano, rũthaario kana mabuku ma mahoya, maahoyaga kuuma ngoro makĩhũthĩra ciugo ciao ene. Nĩ kĩĩ gĩatũmire mahoya mao maiguwo nĩ Ngai?

O ta ũrĩa gĩcunjĩ kĩrĩa kĩhĩtũku kĩonanĩtie, meerekagĩria mahoya mao o harĩ Ngai ũmwe, nĩwe Jehova. Kũrĩ o na ũndũ ũngĩ wa bata. Rĩandĩko rĩa 1 Johana 5:14 riugaga ũũ: “Ũyũ nĩguo ũũma ũrĩa tũkoragwo naguo harĩ we, atĩ tũngĩhoya ũndũ o na ũrĩkũ kũringana na wendi wake, nĩ atũiguaga.” Mahoya maitũ nĩ mabatiĩ gũkorũo maringaine na wendi wa Ngai. Hihi ũguo nĩ kuuga atĩa?

Nĩguo tũhote kũhoya mahoya mararingana na wendi wa Ngai, no mũhaka twambe tũmenye wendi wake nĩ ũrĩkũ. Nĩ ũndũ ũcio, kwĩruta Bibilia no gũtũteithie kũmenya ũrĩa twagĩrĩirũo kũhoya. Hihi ũguo nĩ kuuga atĩ no mũhaka tũkorũo tũthiĩte cukuru gũthomera Bibilia nĩguo Ngai athikĩrĩrie mahoya maitũ? Aca, no Ngai nĩ endaga twĩrute wendi wake, tũtaũkĩrũo nĩguo nĩgetha tũwĩkage. (Mathayo 7:21-23) Mahoya maitũ nĩ mabatiĩ gũtwarana na maũndũ marĩa tũreruta.

Rĩrĩa tũreruta ũhoro wĩgiĩ Jehova na wendi wake nĩ twĩkĩraga wĩtĩkio witũ hinya, na wĩtĩkio ũcio nĩ wa bata rĩrĩa tũrahoya. Jesu ooigire ũũ: “Maũndũ marĩa mothe mũrĩhoyaga mũrĩ na wĩtĩkio, nĩ mũrĩheagwo.” (Mathayo 21:22) Gũkorũo na wĩtĩkio ti kuuga atĩ mũndũ agĩrĩirũo gwĩtĩkia maũndũ mothe. Handũ ha ũguo, nĩ gwĩtĩkia ũndũ ũrĩ na ũira mũrũmu naguo, o na angĩkorũo ũndũ ũcio ndũroneka na maitho. (Ahibirania 11:1) Bibilia ĩrĩ na ũira mũingĩ wonanagia atĩ Jehova, o ũcio ũtangĩoneka arĩ kuo, nĩ wa kwĩhokeka, na nĩ akoragwo ehaarĩirie gũcokia mahoya ma andũ arĩa makoragwo na wĩtĩkio. Makĩria ma ũguo, no tũhoe Jehova atuongerere wĩtĩkio, na nĩ akenaga gũtũhe kĩrĩa tũrabatara.—Luka 17:5; Jakubu 1:17.

Reke tuone ũndũ ũngĩ wa bata wĩgiĩ ũrĩa twagĩrĩirũo kũhoya. Jesu ooigire ũũ: “Gũtirĩ mũndũ ũũkaga kũrĩ Awa atagereire harĩ niĩ.” (Johana 14:6) Kwoguo nĩguo mahoya maitũ makinye kũrĩ Ithe witũ Jehova, marabatara kũgera harĩ Jesu. Nĩkĩo Jesu eerire arũmĩrĩri ake mahoyage kũgerera harĩ rĩĩtwa rĩake. (Johana 14:13; 15:16) No ũguo ti kuuga atĩ twagĩrĩirũo kũhoya Jesu. Handũ ha ũguo, twagĩrĩirũo kũhoya kũgerera harĩ rĩĩtwa rĩa Jesu, tondũ Jesu nĩwe watũmire tũhotage gũkuhĩrĩria Ithe witũ mũtheru na mũkinyanĩru.

Hĩndĩ ĩmwe arutwo a Jesu maamwĩrire ũũ: “Mwathani, tũrute kũhoya.” (Luka 11:1) Ũrĩa kũrĩ nĩ atĩ, ti kwenda meendaga kũmenya maũndũ ta macio twarĩrĩria. No meendaga kũmenya maũndũ marĩa maagĩrĩirũo kũhoya igũrũ rĩamo, nĩ ta mooragia Jesu, ‘Twagĩrĩirũo kũhoya igũrũ rĩgiĩ maũndũ marĩkũ?’